- उपमुख्यमंत्री ह गंडईखुर्द म प्रदेश के पहिली विकास बुता के रूप म शेड निरमान के प्रस्ताव ला दीस मंजूरी
- ग्रामीण विकास ला नवा रस्ता देही वीबी-जी राम जी योजना–उपमुख्यमंत्री विजय शर्मा
- ग्रामीण परिवार मन ला मिलही 125 दिन के रोजगार, रोज के मजूरी ह बढ़के होईस 300 रुपिया
- योजना म 318 किसम के विकास बुता सामिल, पानी बचाए ले लेके गांव के अधोसंरचना तक ला मिलही बढ़ावा
रायपुर, ग्रामीण परिवार मन ला रोजगार अऊ आजीविका के नवा गारंटी देइया विकसित भारत गारंटी फॉर रोजगार एवं आजीविका मिशन ग्रामीण (वीबी-जी राम जी) योजना के राज्य स्तरीय शुभारंभ आज कबीरधाम जिला के बोड़ला विकासखंड के तहत ग्राम पंचायत गंडईखुर्द ले करे गीस। ए कार्यक्रम म उपमुख्यमंत्री अऊ पंचायत व ग्रामीण विकास मंत्री विजय शर्मा ह मुख्य अतिथि के रूप म सामिल होइन। राष्ट्रीय स्तर म ए योजना के शुभारंभ केंद्रीय ग्रामीण विकास मंत्री शिवराज सिंह चौहान ह आंध्र प्रदेश के तिरुपति ले करिन। ए बखत ओ मन वर्चुअल माध्यम (वीडियो कॉन्फ्रेंसिंग) ले ग्राम पंचायत गंडईखुर्द म रखे गए राज्य स्तरीय शुभारंभ समारोह म घलो जुड़े रहीन।
केंद्रीय ग्रामीण विकास मंत्री शिवराज सिंह चौहान ह कहिन कि आज ले विकसित भारत गारंटी फॉर रोजगार एवं आजीविका मिशन ग्रामीण (वीबी-जीरामजी) योजना लागू होवत हे। ए योजना के उदेस्य ए हे कि देस के कोई घलो गरीब ह बुता के अभाव म बेरोजगार झन रहय। ओ मन ए बड़हन पहल बर प्रधानमंत्री नरेंद्र मोदी के आभार जतावत कहिन कि योजना ले जहां ग्रामीण मंतू मन ला 125 दिन के रोजगार मिलही, उहें गांव-गांव म विकास के बुता मन ला घलो नवा गति मिलही अऊ ग्रामीण इलाका के सूरत बदल जाही। चौहान ह कहिन कि मंतू मन के पसीना के सम्मान हमर सबले पहिली प्राथमिकता हे। गरीब मन के सेवा हमर बर भगवान के सेवा हे।
उपमुख्यमंत्री अऊ पंचायत व ग्रामीण विकास मंत्री विजय शर्मा ह कहिन कि आज पूरा देस म विकसित भारत गारंटी फॉर रोजगार एवं आजीविका मिशन (वीबी-जीरामजी) योजना के शुभारंभ होवत हे अऊ छत्तीसगढ़ म एकर राज्य स्तरीय सरुआत ग्राम पंचायत गंडईखुर्द ले करे गए हे। ए मउका म ओ मन प्रदेश म योजना के तहत पहिली बुता के रूप म ग्राम पंचायत गंडईखुर्द म शेड निरमान के प्रस्ताव ला मंजूरी प्रदान करिन। ओ मन कहिन कि ए ह सिरिफ रोजगार देबा के योजना नो हे, बल्कि विकसित गांव ले विकसित भारत के निरमान के अभियान हे। बछर 2047 तक विकसित भारत के संकल्प ला पूरा करे बर हर एक गांव अऊ पंचायत के जम्मो विकास जरूरी हे। ओ मन कहिन कि केंद्र सरकार ह छत्तीसगढ़ बर 3,300 करोड़ रुपिया के प्रावधान करे हे, जेकर ले अलग-अलग विकास बुता करे जाही अऊ रोजगार के कतको कमी नई राहय।
उप मुख्यमंत्री शर्मा ह बताइन कि योजना के तहत 318 किसम केबुता मन ला सामिल करे गए हे। एमां पानी बचाए (जल संरक्षण) ले जुड़े 107, ग्रामीण अधोसंरचना के 90, आजीविका बढ़ाए के 86 अऊ आपदा प्रबंधन ले जुड़े 35 किसम के बुता सामिल हें। ओ मन बताइन कि अब जॉब कार्ड के जगह म ‘जीआरजी कार्ड’ जारी करे जाही। ओ मन कहिन कि जॉब कार्ड म केवाईसी (KYC) करवाए म छत्तीसगढ़ ह देस के अगाड़ी राज्य मन म हे। योजना के तहत डबरी, चेकडैम, बोल्डर चेकडैम, रिचार्ज पिट, पानी संचयन, नहर लाइनिंग, ग्रामीण सड़क (धरसा), मुरमीकरण जइसन बुता करके पानी के स्तर बढ़ाए अऊ कुदरती साधन मन ला बचाए म बिसेस जोर दिए जाही। हर एक पंचायत ला अपन गांव के जरूरत के हिसाब ले कार्ययोजना बनाके अटल डिजिटल सेवा केंद्र, मुक्तिधाम म शेड, ग्रामीण अधोसंरचना समेत पहिली प्राथमिकता वाले बुता सुरू करे बर परही।
उप मुख्यमंत्री ह कहिन कि योजना के तहत बाउंड्री वॉल, रसोई शेड, टॉयलेट, सामुदायिक पशु शेड, सोलर अऊ स्ट्रीट लाइट, ग्रामीण चौपाल, हाईमास्ट लाइट, स्व-सहायता समूह मन बर वर्क शेड, कोल्ड स्टोरेज, खातू अऊ अनाज गोदाम, सामुदायिक आटा चक्की, कृषि प्रसंस्करण केंद्र अऊ हैंडलूम प्रोसेसिंग केंद्र जइसन बुता घलो करे जा सकही। एकर ले रोजगार के संग-संग ग्रामीण आजीविका ला घलो मजबूती मिलही। ओ मन कहिन कि विकसित भारत के संकल्प तभे पूरा होही, जब गांव ह आत्मनिर्भर अऊ समृद्ध बनही। ए च उदेस्य ले गांव मन ला ए, बी अऊ सी श्रेणी म बांटके योजनाबद्ध विकास करे जाही। ओ मन बताइन कि छत्तीसगढ़ म पाछू ढाई बछर म 11 लाख आवास मन के निरमान पूरा करे गए हे, जो गामीन विकास बर सरकार के संकलप के गवाही हे। ओ मन जम्मो जनप्रतिनिधि अऊ ग्रामीण मन ले बिनती करिन कि ओ मन बड़ सोच के संग अपन गांव के विकास के कार्ययोजना तैयार करंय, जेकर ले बछर 2047 तक विकसित भारत के लछ (लक्ष्य) ला पाए जा सके।
पंडरिया विधायक भावना बोहरा ह कहिन कि आज के दिन ह प्रदेश बर ऐतिहासिक हे अऊ सबो झन ए ऐतिहासिक मउका के साक्छी बने हें। ए योजना के तहत मनरेगा म अब ग्रामीण परिवार मन ला 125 दिन के रोजगार मिलही अऊ अकुशल मंतू मन के रोज के मजूरी ला 261 रुपिया ले बढ़ाके 300 रुपिया रोज कर दिए गए हे।
कार्यक्रम म छत्तीसगढ़ गौ सेवा आयोग के अध्यक्ष विशेष पटेल, छत्तीसगढ़ कृषक कल्याण बोर्ड के अध्यक्ष सुरेश चंद्रवंशी, पुलिस जवाबदेही प्राधिकरण के सदस्य भगत पटेल, जिला पंचायत अध्यक्ष ईश्वरी साहू, जिला पंचायत उपाध्यक्ष कैलाश चंद्रवंशी, जिला पंचायत सदस्य राम कुमार भट्ट के संग आन जनप्रतिनिधि अऊ बड़ संख्या म ग्रामीण मन उपस्थित रीहिन।
गंडईखुर्द ला मिलीस पहिली सौगात, शेड निरमान प्रस्ताव ला मंजूरी
उपमुख्यमंत्री अऊ पंचायत व ग्रामीण विकास मंत्री विजय शर्मा ह वीबी-जी राम जी योजना के तहत प्रदेश के पहिली विकास बुता के रूप म ग्राम पंचायत गंडईखुर्द म शेड निरमान के प्रस्ताव ला मंजूरी दीस। ओ मन कहिन कि योजना के सरुआत विकास बुता के संग होवत हे। ए मंजूरी के संग च गंडईखुर्द ह वीबी-जी राम जी योजना के तहत प्रदेश के पहिली अइसन ग्राम पंचायत बन गे, जहां विकास बुता के प्रस्ताव पास होईस। ओ मन कहिन कि आबइ वाला समे म एही किसम ले हर एक पंचायत के जरूरत के हिसाब ले विकास बुता मन ला पहिली सुबिधा देके योजना के लाभ गांव-गांव तक पहुंचाए जाही।
मानव श्रृंखला म सामिल होइन उप मुख्यमंत्री, जनप्रतिनिधि अऊ ग्रामीण
कार्यक्रम के बखत वीबी-जी राम जी योजना के अब्बड़ प्रचार-प्रसार अऊ मनखे मन ला जागरूक करे के उदेस्य ले उप मुख्यमंत्री शर्मा, जनप्रतिनिधि मन, अधिकारी, कर्मचारी, स्व-सहायता समूह के नोनी-बऊ मन, युवा अऊ बड़ संख्या म ग्रामीण मन ह मानव श्रृंखला (हाथ म हाथ जोड़के लामी लाइन) बनाके योजना के संदेस दिइन। ए मउका म सबो झन ग्रामीण विकास, रोजगार निरमान, आजीविका बढ़ाए अऊ विकसित भारत के संकल्प ला जन-जन तक पहुंचाए के गोठ कहिन। मानव श्रृंखला के माध्यम ले ग्रामीण मन ला योजना के उदेस्य, फायदा अऊ एमां जनभागीदारी के महत्व के बारे म घलो बताए गीस।
पर्यावरण ला बचाए बर बड़ पैमाना म होईस पौधरोपण
पर्यावरण के रच्छा अऊ आबइ वाली पीढ़ी मन बर साफ-सुथरा अऊ सुग्घर पर्यावरण तय करे के उदेस्य ले ग्राम पंचायत गंडईखुर्द म “एक पेड़ मां के नाम” अभियान के तहत बड़ पैमाना म रुख-राई (पौधरोपण) लगाए गीस। उपमुख्यमंत्री विजय शर्मा, पंडरिया विधायक भावना बोहरा समेत जनप्रतिनिधि मन, अधिकारी मन अऊ ग्रामीण मन ह रुख लगाके पर्यावरण बचाए के संदेस दिइन।
