रायपुर, मुख्यमंत्री विष्णु देव साय ह कहिन कि छत्तीसगढ़ के युवा शक्ति प्रदेश के भविष्य के सबो ले बड़े पूंजी हे। युवा सिरिफ रोजगार खोजइया नइ, बकि अपन कौशल, नवाचार अउ उद्यमिता ले रोजगार के नवा अवसर पैदा करवइया बनं। मुख्यमंत्री ह इंदिरा गांधी कृषि विश्वविद्यालय के कृषक मंडपम म आयोजित तीन दिनी ‘यूथ इनोवेशन एवं एंटरप्रेन्योरशिप कॉन्क्लेव-2026’ म विद्यार्थी, युवा नवाचारकर्ता अउ स्टार्टअप उद्यमी मन के संग सीधा बातचीत करत ये गोठ कहिन। ओमन कहिन कि सरकार युवा मन के विचार ल नवाचार अउ सफल उद्यम म बदलै बर तकनीकी सहयोग, आधारभूत ढांचा, वित्तीय सहायता अउ अनुकूल नीतिगत माहौल उपलब्ध करावत हे।
मुख्यमंत्री ह बताइन कि युवा मन ल उद्यमिता के क्षेत्र म आगू बढ़ाय बर ‘मुख्यमंत्री स्टार्टअप एवं निपुण योजना’ के तहत 500 करोड़ रूपिया के प्रावधान करे गे हे। नवा औद्योगिक नीति-2024 म घलो नवा उद्यमी, महिला, अनुसूचित जाति-जनजाति, अन्य पिछड़ा वर्ग अउ दिव्यांगजन मन के उद्यमिता ल प्रोत्साहित करे बर प्रावधान करे गे हे। ओमन युवा मन ले नवा औद्योगिक नीति के अध्ययन करके उपलब्ध अवसर मन के फायदा उठाय अउ सिंगल विंडो सिस्टम के माध्यम ले उद्योग स्थापना के प्रक्रिया मन ल समझै के आह्वान करिन।
मुख्यमंत्री ह कहिन कि नवा औद्योगिक नीति लागू होय के बाद प्रदेश ल आब तक करीब 8.23 लाख करोड़ रूपिया के निवेश प्रस्ताव मिल चुके हे। ऊर्जा, आर्टिफिशियल इंटेलिजेंस (AI), डेटा सेंटर, सेमीकंडक्टर, टेक्सटाइल समेत कई उभरते क्षेत्र म निवेश के संभावना बढ़वत हे। ओमन कहिन कि छत्तीसगढ़ के कृषि अउ वन संपदा म घलो युवा मन बर उद्यमिता के बड़े अवसर हे। इमली, महुआ, सीताफल अउ औषधीय पौधा कस वनोपज के प्रोसेसिंग (प्रसंस्करण), पैकेजिंग, ब्रांडिंग अउ मार्केटिंग के जरिये लोकल स्तर म रोजगार अउ नवा कारोबार विकसित करे जा सकहि।
मुख्यमंत्री ह कृषि आधारित स्टार्टअप मन ऊपर जोर देत कहिन कि छत्तीसगढ़ म धान के अनेक विशिष्ट अउ सुगंधित किसिम हे। कृषि उत्पादन के संग प्रोसेसिंग, पैकेजिंग, ब्रांडिंग, वैल्यू एडिशन अउ निर्यात के पूरा श्रृंखला विकसित करे के जरूरत हे। युवा मन के संग बातचीत म स्टार्टअप फंडिंग, लोन, रोजगार सृजन, हॉर्टिकल्चर, सोशल मीडिया, इन्फ्लुएंसर इकोसिस्टम अउ फिल्म सिटी ले जुड़े अवसर ऊपर घलो चर्चा होइस। ओमन युवा मन ले असफलता ले नइ डरय अउ नवा प्रयोग मन के संग आगू बढ़ै के आह्वान करिन।
मुख्यमंत्री ह इंदिरा गांधी कृषि विश्वविद्यालय परिसर स्थित सुभाष चंद्र बोस बायोटेक्नोलॉजी इन्क्यूबेशन सेंटर के घलो अवलोकन करिन। ओमन अत्याधुनिक प्रयोगशाला अउ स्टार्टअप मन बर उपलब्ध सुविधा मन के जनकारी लीन। ओमन कहिन कि ये केंद्र युवा मन बर ‘आइडिया ले इनोवेशन अउ इनोवेशन ले एंटरप्राइज’ तक के यात्रा म महत्वपूर्ण मंच बनहि। ये बेरा म मुख्यमंत्री ह ‘एक पेड़ माँ के नाम’ अभियान के तहत पेड़ घलो लगइन। कॉन्क्लेव म एग्रीटेक, खाद्य प्रसंस्करण, जैव प्रौद्योगिकी, एआई, डीप-टेक, नवीकरणीय ऊर्जा अउ पर्यावरण ले जुड़े स्टार्टअप मन अपन नवाचार अउ उत्पाद प्रदर्शित करत हें।
