रामनामी समाज के अनूठा परंपरा हमर लोक संस्कृति के अमूल्य धरोहर : मुख्यमंत्री साय
रायपुर, मुख्यमंत्री विष्णुदेव साय ह 72वां राष्ट्रीय फिल्म पुरस्कार म छत्तीसगढ़ के अद्वितीय रामनामी समुदाय के समृद्ध विरासत ऊपर आधारित डॉक्यूमेंट्री फिल्म ‘राम-नामी’ ला ‘सर्वश्रेष्ठ डॉक्यूमेंट्री’ के राष्ट्रीय सम्मान मिले म खुसी जतावत एला जम्मो प्रदेश बर बड़ गौरव के बात बताइन हे।
मुख्यमंत्री साय ह फिल्म के निर्देशक भरतबाला गणपति अउ ओकर जम्मो टीम ला ए बड़ उपलब्धि बर गाड़ा-गाड़ा बधाई अउ सुभकामना दीन हे। ओमन कहिन कि ए सम्मान ह छत्तीसगढ़ के समृद्ध लोक संस्कृति, आध्यात्मिक परंपरा अउ सांस्कृतिक विरासत ला राष्ट्रीय स्तर म मिले एक बड़े पहचान (चिनहा) आय।
मुख्यमंत्री ह कहिन कि रामनामी समाज के अनूठा परंपरा ह सरधा, समर्पण अउ भारतीय सांस्कृतिक मूल्य के जीवंत रूप आय। ए विरासत ला बढ़िया ढंग ले देस-दुनिया के सोझा (सामने) लाये के काम ए डॉक्यूमेंट्री ह करे हे।
मुख्यमंत्री साय ह बिसवास जताइन कि ए सम्मान ह छत्तीसगढ़ के लोक परंपरा, जनजातीय अउ लोक समुदाय के सांस्कृतिक विरासत अउ राज के अलग-अलग सांस्कृतिक चिनहा ला राष्ट्रीय अउ अंतरराष्ट्रीय स्तर म नवा पहचान देवाए म बड़े भूमिका निभाही।
