- छत्तीसगढ़ टूरिज्म बोर्ड के चेन्नई रोड शो म टूर ऑपरेटर्स ले सीधा गोठ-बात, छत्तीसगढ़ घूमे बर पर्यटकमन ला जोड़े ऊपर जोर
- 130 ले जादा टूर ऑपरेटरमन देखाईन भारी रुचि
- तमिल भाषा म पहली बेर होईस पर्यटन स्थलमन के प्रभावी प्रस्तुतीकरण
रायपुर: छत्तीसगढ़ के पर्यटन ला दक्षिण भारत के प्रमुख पर्यटन बाजार ले जोड़े अउ राज्य म पर्यटकमन के संख्या बढ़ाए के कोती छत्तीसगढ़ टूरिज्म बोर्ड ह चेन्नई म “छत्तीसगढ़ टूरिज्म रोड शो” के भव्य आयोजन करिस। फिक्की के सहयोग ले आयोजित ए रोड शो म चेन्नई के 130 ले जादा ट्रैवल एजेंट अउ टूर ऑपरेटरमन उत्साह के संग भाग लीन। कार्यक्रम के बखत आयोजित बिजनेस-टू-बिजनेस (B2B) बैठकमन म छत्तीसगढ़ अउ चेन्नई के पर्यटन व्यापारीमन के बिच म सार्थक गोठ-बात होईस, जेखर ले भविष्य म पर्यटक समूहमन ला छत्तीसगढ़ घूमे बर भेजे अउ कारोबारी साझेदारी बढ़ाए के संभावनामन मजबूत होईस।
दक्षिण भारत के पर्यटन बाजार ले छत्तीसगढ़ ला जोड़े के पहल
चेन्नई म आयोजित ए रोड शो छत्तीसगढ़ ला दक्षिण भारत के प्रमुख पर्यटन बाजारमन ले जोड़े के रणनीतिक पहल के रूप म आगू आईस। रोड शो म छत्तीसगढ़ के पर्यटन उत्पादमन, प्रमुख पर्यटन स्थलमन अउ निवेश के संभावनामन ला चेन्नई के पर्यटन व्यापारीमन के आघू म प्रस्तुत करे गिस। B2B बैठकमन के माध्यम ले दोनों राज्यमन के स्टेकहोल्डर्स ला सीधा गोठ-बात अउ संभावित व्यावसायिक सहयोग के मौका मिलिस। कार्यक्रम म होए चर्चा म पर्यटन व्यापारीमन कोती ले उत्साहजनक प्रतिक्रिया मिलिस।
कार्यक्रम म छत्तीसगढ़ टूरिज्म बोर्ड के अध्यक्ष नीलू शर्मा प्रमुख रूप ले मौजूद रीहिन। ओंकर संबोधन ह चेन्नई के पर्यटन व्यापारीमन ला छत्तीसगढ़ के पर्यटन ले जोड़े अउ राज्य के पर्यटन संभावनामन बर प्रोत्साहित करे म बड़ भूमिका निभाईस।
ए मौका म पर्यटन विभाग, छत्तीसगढ़ शासन के सचिव डॉ. एस. भारतीदासन (IAS) अउ छत्तीसगढ़ टूरिज्म बोर्ड के प्रबंध संचालक सौमिल रंजन चौबे (IAS) घलो मौजूद रीहिन। चौबे ह छत्तीसगढ़ के प्रमुख पर्यटन स्थलमन, पर्यटन उत्पादमन अउ राज्य म उपलब्ध निवेश के संभावनामन ऊपर विस्तृत प्रस्तुतीकरण दीन।
तमिल भाषा म पहली बेर छत्तीसगढ़ पर्यटन के प्रस्तुतीकरण
रोड शो के सबले खास आकर्षण रीहिस—छत्तीसगढ़ के पर्यटन स्थलमन अउ संभावनामन ला पहली बेर तमिल भाषा म स्थानीय स्टेकहोल्डर्स के आघू प्रस्तुत करे जाना। ए पहल ह चेन्नई के पर्यटन व्यापारीमन अउ स्थानीय पर्यटकमन के संग भावनात्मक जुड़ाव बनाए म बड़ भूमिका निभाईस।
सचिव डॉ. एस. भारतीदासन ह अपन संबोधन म तमिल अउ अंग्रेजी भाषा म छत्तीसगढ़ के प्राकृतिक, सांस्कृतिक अउ विरासत संपदा के बड़े संभावनामन ला रेखांकित करिन। ओमन राज्य के पर्यटन संपदा ला देश के प्रमुख पर्यटन बाजारमन ले जोड़े के जरूरत ऊपर बल दीन।
तमिलनाडु के पर्यटन क्षेत्र के प्रमुख प्रतिनिधिमन के मौजूदगी
रोड शो म भारत सरकार के पर्यटन मंत्रालय के सहायक निदेशक एस. पद्मावती, फिक्की छत्तीसगढ़ टूरिज्म कमेटी के चेयरपर्सन अउ फिक्की छत्तीसगढ़ के अध्यक्ष जसप्रीत सिंह भाटिया, फिक्की तमिलनाडु स्टेट काउंसिल के को-कन्वीनर श्रीहरन बालन अउ तमिलनाडु पर्यटन के निदेशक डॉ. वी.पी. जयसीलन (IAS) संग पर्यटन क्षेत्र के कतको प्रमुख प्रतिनिधि मौजूद रीहिन।
चेन्नई म पदस्थ छत्तीसगढ़ कैडर के वरिष्ठ अधिकारीमन साझा करिन आत्मीय जुड़ाव
रोड शो के एकठन खास उपलब्धि ए घलो रीहिस कि छत्तीसगढ़ कैडर के वरिष्ठ IAS अधिकारी के.सी. देवासेनापति अउ एलेक्स पॉल मेनन, जो अभी चेन्नई म पदस्थ हेन, विशेष रूप ले कार्यक्रम म शामिल होइन। दोनों अधिकारीमन छत्तीसगढ़ ले अपन आत्मीय जुड़ाव अउ राज्य के पर्यटन संभावनामन ऊपर सारगर्भित विचार साझा करिन। ओंकर सहभागिता ह कार्यक्रम ला एक अलग भावनात्मक रूप प्रदान करिस।
व्यापारिक साझेदारी के संग दिखेस सांस्कृतिक निकटता
चेन्नई रोड शो म छत्तीसगढ़ अउ तमिलनाडु के बिच पर्यटन क्षेत्र म व्यावसायिक साझेदारी के संग-संग आत्मीय जुड़ाव अउ सांस्कृतिक निकटता घलो साफ-साफ दिखाई दीस। एक ही मंच म छत्तीसगढ़ ले जुड़े वरिष्ठ प्रशासनिक अधिकारीमन, पर्यटन विभाग, छत्तीसगढ़ के पर्यटन व्यापारीमन अउ चेन्नई के पर्यटन व्यापारीमन के सहभागिता ह आयोजन ला खास बनाईस।
B2B बैठकमन ह दोनों राज्यमन के पर्यटन स्टेकहोल्डर्स ला संभावित व्यापारिक सहयोग, पर्यटक समूहमन के आवागमन अउ पर्यटन उत्पादमन के प्रचार-प्रसार बर सीधा गोठ-बात के मंच दीस। एकर ले छत्तीसगढ़ के पर्यटन ला दक्षिण भारतीय बाजार म नवा पहचान अउ नवा कारोबारी अवसर मिले के उम्मीद बढ़ी हे।
ए तरकुन ले चेन्नई के “छत्तीसगढ़ टूरिज्म रोड शो” खाली पर्यटन प्रचार के आयोजन नई रीहिस, भलुक दक्षिण भारत के पर्यटन बाजार के संग छत्तीसगढ़ के मजबूत व्यावसायिक अउ सांस्कृतिक संबंधमन के दिशा म एकठन महत्वपूर्ण कदम बनके आगू आईस।
