- सुशासन, किसान कल्याण अउ सामाजिक समरसता ले सशक्त होत हे छत्तीसगढ़ : मुख्यमंत्री विष्णुदेव साय
- रायपुर म झेरिया यादव समाज के सामाजिक भवन बर 15 लाख रुपिया के घोषणा
- ग्राम बरौदा म नवनिर्मित सामाजिक भवन के लोकार्पण
रायपुर, मुख्यमंत्री विष्णुदेव साय ह कहिन हे कि प्रदेश सरकार ह समाज के हर बगर (प्रत्येक वर्ग) के विकास, किसान मन के समृद्धि, महिला मन के सशक्तिकरण, पारदर्शी सुशासन अउ सांस्कृतिक विरासत ला संजोए के संकल्प के संग लगातार काम करत हे। ओमन कहिन कि प्रधानमंत्री नरेंद्र मोदी के अगुवाई म डबल इंजन सरकार ह ढाई साल म जादातर (अधिकांश) मोदी गारंटी मन ला पूरा करके जनता के बिसवास ला मजबूत करे हे।
मुख्यमंत्री साय ह आज राजधानी रायपुर के ग्राम-बरौदा म आयोजित झेरिया यादव समाज के महासम्मेलन अउ सामाजिक भवन लोकार्पण समारोह ला संबोधित करत रहिन। ए मउका म ओमन रायपुर म झेरिया यादव समाज के सामाजिक भवन बर 15 लाख रुपिया के घोषणा करिन अउ ग्राम बरौदा म नवा बने सामाजिक भवन के लोकार्पण घलो करिन।
मुख्यमंत्री साय ह कहिन कि यादव समाज ह भारतीय संस्कृति, जीवन-मूल्य अउ गौ-सेवा के समृद्ध परंपरा ला आगे बढ़ाए वाला आय। भगवान श्रीकृष्ण के रद्दा (आदर्शों) म चले वाला ए समाज ह धरम, सेवा अउ सामाजिक समरसता के सँदेसा देथे। ओमन कहिन कि जुड़े (संगठित) अउ चेतकार (जागरूक) समाज च मजबूत देस के नेव (आधारशिला) होथे अउ अइसन सामाजिक सम्मेलन ह समाज सुधार अउ सामाजिक एकता ला नवा रद्दा देथे।
मोदी गारंटी मन ला पूरा करे म छत्तीसगढ़ अगुआ
मुख्यमंत्री साय ह कहिन कि सरकार बने के बाद पहिली च कैबिनेट बैठक म 18 लाख प्रधानमंत्री आवास मंजूर करे के ऐतिहासिक फैसला लिये गिस। बिसेस पिछड़ी जनजाति (पीवीटीजी) बर 32 हजार प्रधानमंत्री आवास मंजूर करे गे हे, जेकर ले समाज के आखिरी मनखे तक विकास के लाभ पहुँचाए जात हे।
किसान मन ला 3100 रुपिया प्रति क्विंटल धान के मूल्य
मुख्यमंत्री ह कहिन कि प्रदेश सरकार ह किसान मन ले 3100 रुपिया प्रति क्विंटल के दर ले धान खरीदी करत हे। किसान मन के भलाई सरकार के सबले पहिली प्राथमिकता म हे अउ खेती-किसानी ला फायदा के सौदा बनाए बर लगातार बड़े कदम उठाए जात हे।
महतारी वंदन योजना ले महिला मन के आर्थिक सशक्तिकरण
मुख्यमंत्री साय ह कहिन कि महतारी वंदन योजना के माध्यम ले प्रदेश के दाई-बहिनी मन के खाता म हर महीना एक हजार रुपिया के रासि डारे जात हे। ए योजना ह महिला मन ला आर्थिक रूप ले मजबूत बनाए म नवा ताकत दीस हे अउ परिवार मन के आर्थिक सुरच्छा ला बढ़ाई हे।
बस्तर म सांति अउ विकास के नवा जुग
मुख्यमंत्री ह कहिन कि कभू बस्तर के विकास म सबले बड़े बाधा नक्सलवाद रहिस, मइन अब उहाँ सांति अउ विकास के नवा माहौल बने हे। सड़क, अक्छर (शिक्षा), सवास्थ, मकान अउ रोजगार जइसन सुबिधा मन के तेजी ले बिसतार होत हे अउ विकास के गंगा आखिरी गाँव तक पहुँचत हे।
रामलला दर्शन योजना ले आसा (आस्था) ला मिलिस सम्मान
मुख्यमंत्री साय ह कहिन कि छत्तीसगढ़ ह भगवान श्रीराम के ननिहाल आय। रामलला दर्शन योजना के माध्यम ले अब तक 50 हजार ले जादा भगत मन ला अयोध्या धाम म प्रभु श्रीराम के दरसन करे के मउका मिल चुके हे। ओमन कहिन कि सरकार ह “विकास घलो अउ विरासत घलो” के मूलमंत्र ऊपर काम करत हे।
सुशासन अउ डिजिटल सेवा मन ले असान होत हे जनजीवन
मुख्यमंत्री साय ह कहिन कि छत्तीसगढ़ ह देस के पहिली अइसन राज आय जहाँ सुशासन अउ अभिसरण विभाग के स्थापना करे गे हे। सरकारी सेवा मन ला साफ-सुथरा (पारदर्शी), जवाबदेह अउ समे म पूरा करे बर डिजिटल करे के काम तेजी ले चलत हे। मुख्यमंत्री हेल्पलाइन 1076 के माध्यम ले मनखे मन 24 घंटा, हफ्ता के सातों दिन अपन सिकाएत दरज करवा सकत हें। सिकाएत मन के तुरते निरवारन बर अलग-अलग बिभाग के करीबन 8 हजार अधिकारी अउ कर्मचारी मन ला चार स्तर के ब्यवस्था ले जोड़े गे हे। संग म हर एक पंचायत म अटल डिजिटल सेवा केंद्र सुरु करे जात हे, जहाँ लोगन मन ला अलग-अलग किसम के परमान-पतर अउ सरकारी सेवा मन एक च जगह म असानी ले मिलत हे।
ए कारयकरम म बिधायक अनुज शर्मा, रामकुमार यादव, छत्तीसगढ़ झेरिया यादव समाज के प्रदेश अद्द्छ (अध्यक्ष) जगनीक यादव, भगत सिंह यादव, आशा संतोष यादव संग जम्मो प्रदेश भर ले आए समाज के पदाधिकारी अउ बड़ भारी संख्या म समाज के मनखे मन उपस्थित रहिन।
