जगदलपुर, बस्तर म बाढ़ के हालात के बीच मुख्यमंत्री विष्णु देव साय सोमबार ल प्रभावित इलाका मन के दौरा म पहुंचिन। ओमन जगदलपुर नगर निगम क्षेत्र के डोंगाघाट म बाढ़ प्रभावित परिवार मन ले मिल के उनकर परेसानी सुनीं अउ मौका म राहत व्यवस्था के जायजा लीन। मुख्यमंत्री ह कहिन कि आपदा के ये बेरा म सरकार प्रभावित परिवार मन के संग खड़ें हे अउ उनला हरसंभव सहायता उपलब्ध कराय जाही।
मुख्यमंत्री ह प्रभावित परिवार मन बर बड़ी राहत के घोषणा करत कहिन कि शासन के प्रावधान के तहत मिलवइया सहायता के अलावे मुख्यमंत्री राहत कोष ले हर एक प्रभावित परिवार ल 10 हजार रूपिया के अतिरिक्त मदद दी जाही। ओमन अधिकारी मन ल बाढ़ ले होय नुकसान के सर्वे तेजी से पूरा करके पात्र परिवार मन तक मदद जल्दी पहुंचाय के निदेस दीन।
प्रभावित मन ले सीधे जानिन नुकसान के हाल
डोंगाघाट म मुख्यमंत्री ह लोगन ले बाढ़ के बेरा म आबइया परेसानी, मकान अउ घरेलू सामान ल होय नुकसान अउ राहत व्यवस्था के बारे म जनकारी लीन। ओमन अधिकारी मन ले कहिन कि प्रभावित लोगन के जरूरत के मुताबिक भोजन, साफ पेयजल, दवइया अउ जरूरी सामान समय म उपलब्ध कराय जाए। लइका, बुढ़वा अउ महिला मन समेत जरूरतमंद लोगन के जरूरत के ऊपर विशेष ध्यान देवय के निदेस घलो दीन।
इंद्रावती के बढ़े जलस्तर के लिहिन जायजा
मुख्यमंत्री इंद्रावती पुल पहुंचिन अउ नदी के जलस्तर अउ आसपास के प्रभावित इलाका मन के स्थिति ल देखिन। अधिकारी मन ले ओमन बरसात, बाढ़ ले प्रभावित गांव अउ शहरी क्षेत्र, राहत अउ बचाव काम अउ लोगन बर करे गे व्यवस्था मन के जनकारी लीन। ओमन जलस्तर अउ मौसम के लगातार निगरानी रखे के संग निचला इलाका मन म विशेष सतर्कता बरते के निदेस दीन।
पानी उतरय के बाद स्वास्थ्य म होही फोकस
मुख्यमंत्री ह कहिन कि बाढ़ के पानी उतरय के बाद घलो राहत काम म कमी नइ आवय चाही। प्रभावित क्षेत्र म शुद्ध पेयजल के व्यवस्था, जलस्रोत मन के सफाई अउ पानी ले होवइया बीमारी के रोकथाम म विशेष ध्यान देवय के कहे गे हे। जरूरत के अनुसार स्वास्थ शिविर लगाय अउ पर्याप्त दवइया उपलब्ध रखे के निदेस घलो दीन।
मकान, फसल अउ पशुधन के नुकसान के होही सर्वे
बाढ़ ले टूटे-फूटे मकान, फसल, पशुधन अउ दूसर संपत्ति के सर्वे जल्दी पूरा कराय के निदेस दीन गे हे। मुख्यमंत्री ह कहिन कि नुकसान के असल आंकलन करके पात्र लोगन ल नियम के मुताबिक सहायता दी जाए अउ कोनो घलो प्रभावित परिवार मदद ले वंचित नइ रहय।
ओमन अधिकारी मन ल राहत शिविर अउ प्रभावित बस्ती मन म लगातार पहुंच के लोगन के जरूरत के जायजा लेवय के कहिन। मुख्यमंत्री ह साफ करिन कि राहत अउ बचाव के संग प्रभावित परिवार मन के जिनगी सामान्य होवय तक जरूरी व्यवस्था चलत रहिही।
ये बेरा म महापौर संजय पाण्डेय, नगर निगम सभापति खेमसिंह देवांगन, कमलचंद्र भंजदेव समेत जनप्रतिनिधि अउ कमिश्नर बस्तर डोमन सिंह, आईजी बी.एन. मीणा, कलेक्टर आकाश छिकारा, पुलिस अधीक्षक शलभ सिन्हा समेत संबंधित विभाग के अधिकारी मन उपस्थित रिहिन।
