रायपुर, छत्तीसगढ़ हॉकी लीग के पहिल सीजन म जगा बनाय बर खिलाड़ी मन मैदान म अपन दमख़म देखावय सुरु कर दे हें। रायपुर के सरदार वल्लभ भाई पटेल अंतरराष्ट्रीय हॉकी स्टेडियम म सोमबार ले दू दिनी चयन ट्रायल सुरु होइस। पहिल दिन रजिस्टर्ड (पंजीकृत) 373 खिलाड़ी मन म ले 223 खिलाड़ी ट्रायल म सामिल होइन।
ट्रायल के बेरा म उप मुख्यमंत्री अउ खेल अउ युवा कल्याण मंत्री अरुण साव घलो स्टेडियम पहुंचिन। ओमन खिलाड़ी मन ले मिल के उनकर उत्साह बढ़ाइन अउ मैदान म उनकर तयारी ल देखिन। ए बेरा म ओमन कहिन कि छत्तीसगढ़ म हॉकी के एक मजबूत परंपरा रिहिन हे अउ ट्रायल म खिलाड़ी मन के भागीदारी ये खेल के प्रति उनकर उमंग ल देखाथे। ओमन कहिन कि छत्तीसगढ़ हॉकी लीग के जरिये राज्य के युवा खिलाड़ी मन ल बड़े स्तर म अपन प्रतिभा देखावय के मौका मिलही।
छः टीम बर होवत हे खिलाड़ी मन के चयन
छत्तीसगढ़ हॉकी लीग म सामिल होवइया छः टीम बर खिलाड़ी मन के चयन एही ट्रायल के जरिये करे जात हे। चयन प्रक्रिया छत्तीसगढ़ हॉकी संघ के तय नियम अउ मापदंड के मुताबिक होवत हे। खेल अधिकारी, विशेषज्ञ कोच (प्रशिक्षक), हॉकी संघ के प्रतिनिधि अउ सीनियर खिलाड़ी मन के पैनल के देखरेख म खिलाड़ी मन के परफार्मेस (प्रदर्शन) के आंकलन करे जात हे।
चयन पैनल म खेल अउ युवा कल्याण विभाग के खेल अधिकारी दीनू प्रसाद पटेल, रायपुर के सीनियर हॉकी कोच रश्मि संध्या एक्का, बिलासपुर के सीनियर हॉकी कोच राकेश टोप्पो, छत्तीसगढ़ हॉकी संघ के अंतरराष्ट्रीय खिलाड़ी मृणाल चौबे, राजनांदगांव के अनुराग श्रीवास्तव अउ सीनियर हॉकी खिलाड़ी अमिताभ मानिकपुरी सामिल हें।
29 सितंबर ल घलो जारी रहिही ट्रायल
दू दिनी चयन ट्रायल के दूसर दिन 29 सितंबर ल मियारिया (सुबह) 9 बजे ले सुरु होइिस। ट्रायल पूरा होय के बाद चुने गे खिलाड़ी मन के सूची अउ चयन प्रक्रिया ले जुड़े रिपोर्ट खेल संचालनालय ल सौंपे जाही। एही आधार म लीग के छः टीम बर खिलाड़ी मन के चयन करे जाही।
21 अक्टूबर ले सुरु होइही लीग के पहिल सीजन
छत्तीसगढ़ हॉकी लीग के पहिल सीजन 21 अक्टूबर ले 1 नवंबर 2026 तक सरदार वल्लभ भाई पटेल अंतरराष्ट्रीय हॉकी स्टेडियम, रायपुर म खेल जाही। लीग म राजधानी रॉयल्स, चित्रकोट चैलेंजर्स, संस्कारधानी स्ट्राइकर्स, चक्रधर चैंपियंस, न्यायधानी नाइट्स अउ मैनपाट टाइटन्स के छः टीम हिस्सा लेइथें।
हर एक टीम म 22 खिलाड़ी होइथें। एमा छत्तीसगढ़ के 18 खिलाड़ी मन के संग राज्य के बहरी के चार राष्ट्रीय या अंतरराष्ट्रीय खिलाड़ी सामिल रहिथें। लीग के उदेस राज्य के युवा हॉकी खिलाड़ी मन ल कम्पटीटिव (प्रतिस्पर्धी) मंच देवय अउ उनला आगू बढ़य के जादा ले जादा मौका उपलब्ध कराय के हे। ‘चलो रे संगी, हॉकी खेलबो’ टैगलाइन के संग आयोजित होवइया ये लीग प्रदेश म हॉकी बर नवा मौका तैयार कराय के दिसा म एक पहल के रूप म देखे जात हे।
