बलरामपुर-रामानुजगंज जिला के 10वीं-12वीं के होनहार लइका मन के करिन सम्मान
रायपुर . मुख्यमंत्री विष्णुदेव साय ह आज बलरामपुर-रामानुजगंज जिला के 10वीं अउ 12वीं बोर्ड के परीक्षा में बढ़िया नंबर ले पास होइय्या होनहार लइका मन के सम्मान करिन। ए बेरा में आयोजित सम्मान समारोह में मुख्यमंत्री ह लइका मन के उत्साह बढ़ावत कहिन कि – “जिंदगी में सफलता पाए बर हौसला बुलंद रखना सबले जरूरी हे।”
बलरामपुर के सर्किट हाउस में होय ए कार्यक्रम में मुख्यमंत्री ह लइका मन से आत्मीय गोठ-बात करिन अउ ओमन के आगू के पढ़ाई-लिखाई के बारे में पूछिन। जादा करके लइका मन ह डॉक्टर अउ इंजीनियर बने के इच्छा जताइन, त कोनो ह कलेक्टर (IAS) अउ जज बने के संकल्प ल बताइन।
मुख्यमंत्री श्री साय ह लइका मन के सपना के तारीफ करिन अउ कहिन:”सपना देखना अउ ओला अपन लक्ष्य बना के ओकर बर दिन-रात एक कर देना ही सफलता के असली कुंजी आय।”ओमन लइका मन ल समझावत कहिन कि अगर मन लगा के, अनुशासन अउ भरोसा के साथ मिहनत करे जाय, त दुनिया में कोनो काम ह असंभव नो हय। ओमन भरोसा दिलाइन कि राज्य सरकार ह लइका मन के उज्ज्वल भविष्य बर हर संभव मदद करे बर तैयार हे। मुख्यमंत्री श्री साय ह ए सफलता बर लइका मन के दाई-दादा अउ गुरुजी मन ल घलो बधाई दीन। ओमन कहिन कि लइका मन के तरक्की के पीछे ओमन के मेहनत, साथ अउ त्याग के बहुत बड़े हाथ होथे।
होनहार लइका मन ल मुख्यमंत्री ले मिले के मिलिस मौका
ए सुग्घर बेरा में जिला के कक्षा 12वीं के होनहार लइका मन में वाड्रफनगर विकासखंड के शासकीय उच्चतर माध्यमिक विद्यालय करमडीहा के कुमारी प्रतिभा गुप्ता, रामचंद्रपुर के शासकीय उच्चतर माध्यमिक विद्यालय जामवंतपुर के कुमारी स्नेहा कुशवाहा, शासकीय उच्चतर माध्यमिक विद्यालय सनवाल के सोनू, वाड्रफनगर के श्री कृष्णा, आदर्श हायर सेकंडरी विद्यालय बलंगी के कुमारी प्रिया लता कश्यप अउ शासकीय उच्चतर माध्यमिक विद्यालय बर्तीकला के अजय गुप्ता सामिल रहिन।
ओतकेच नहीं, कक्षा 10वीं के मेधावी लइका मन में शासकीय उच्चतर माध्यमिक विद्यालय जामवंतपुर के आर्यन गुप्ता, नेशनल पब्लिक इंग्लिश मीडियम हायर सेकेंडरी स्कूल रजखेता के कुमारी आराधना पटेल, शासकीय उच्चतर माध्यमिक विद्यालय रघुनाथनगर के कुमारी रोशनी कांशी, स्वामी आत्मानंद उत्कृष्ट अंग्रेजी माध्यम विद्यालय सेमरा कुसमी के आलिया परवीन अउ स्वामी आत्मानंद उत्कृष्ट अंग्रेजी माध्यम विद्यालय रामानुजगंज के आरजू परवीन ल मुख्यमंत्री ले मिले अउ ओमन ले मार्गदर्शन पाए के बड़े मौका मिलिस।