तेंदूपत्ता संग्राहक के बेटा अजय गुप्ता बनीस भारतीय वन सेवा के अधिकारी
“अजय के सफलता छत्तीसगढ़ के वनाश्रित परिवार के अटूट विस्वास के जीत आय” – मुख्यमंत्री विष्णु देव साय
रायपुर. छत्तीसगढ़ के जंगल मन ले निकले एक प्रतिभाह आज देस के सबले बड़े सेवा म अपन जगह बना के परदेस के नाम रौसन कर दीस हे। रायगढ़ जिला के सम्बलपुरी गांव के एक साधारण तेंदूपत्ता संग्राहक परिवार के बेटा अजय गुप्ता ह अपन कड़ा संकल्प ले भारतीय वन सेवा (IFS) म चुन के ये साबित कर दीस हे कि प्रतिभा ह साधन के नइ, बल्कि कड़ा मिहनत अउ सही रस्ता के पियासा होथे।
रायगढ़ के संबलपुरी गांव म तेंदूपत्ता अउ महुआ बीनइया अजय गुप्ता अब IFS अधिकारी बन गे हे। कतको दुख-पीरा अउ तंगी म पढ़ाई करत हुए अजय ह पूरा देस म 91वां रैंक हासिल करीस। अब ओही जंगल, जेहा कभु परिवार के रोजी-रोटी के जरिया रिहिस, अब ओकर जिम्मेदारी बने बर जावत हे। अजय गुप्ता ह 12वीं कक्षा म घलो जबर प्रदर्शन करे रिहिस अउ ओकर बाद ओला राष्ट्रीय प्रौद्योगिकी संस्थान (NIT) रायपुर म प्रवेश मिलीस। NIT म पढ़ाई के बखत घलो ओला तीन बछर तक छात्रवृत्ति मिलत रिहिस। अजय कहिथे कि “पहिली सपना बहुत बड़े नइ रिहिन। लागत रिहिस कि हमर दुनिया बस गांव तक सिमटे हे, फेर NIT म एडमिशन लेय के बाद नजरिया बदल गे। पहिली बार लागीस कि मैं घलो कुछु बड़े कर सकथंव।” अजय के कहना हे कि जंगल ओकर लइकापन ले ही जिंदगी के हिस्सा रहिस हे। जंगल ह ओला सिर्फ काम नइ दीस, बल्कि जीवन ला एक दिसा घलो दीस। ओ मन कहिथें— “लइकापन ले मोर जुड़ाव जंगल ले हे। जंगल ह मोला बहुत कुछु दीस हे, बस्तर म काम करे के बखत घलो जंगल ले मोर रिश्ता अउ मजबूत हो गे।”
संघर्ष के भुइयाँ ले सफलता के अगास तक
अजय के लइकापन जंगल के बीच म वनोपज बटोरत अउ खेती-किसानी करत बीतीस। संघर्ष के दिन ला सुरता करत अजय बताथे कि दाई-दादा जादा पढ़े-लिखे नइ रिहिन, फेर ओ मन लइका मन के पढ़ाई ला ही अपन लक्ष्य मान लीन। छुट्टी के दिन म अजय ह खुद जंगल जाके तेंदूपत्ता अउ महुआ बटोरे म दाई-दादा के मदद करय। गरीबी अउ अभाव के बीच म घलो ओहा 10वीं म 92.66 प्रतिशत अउ 12वीं म 91.40 प्रतिशत नंबर ला के अपन काबिलियत ला देखा दीस रिहिस।
सरकारी योजना ह पांखी ला दीस मजबूती
अजय के ये लंबी उड़ान म छत्तीसगढ़ सरकार के जनकल्याणकारी योजना ह ‘कैशलेस सपोर्ट’ अउ आर्थिक सहारा प्रदान करीस। लघु वनोपज संघ के छात्रवृत्ति ह स्कूल ले कॉलेज तक के पढ़ाई के बखत आर्थिक बोझ ला कम करीस। राज्य सासन के ‘पोस्ट मैट्रिक छात्रवृत्ति योजना’ ले ओला लगातार पइसा के मदद मिलीस, जेकर से ओहा अपन तैयारी कोती पूरा ध्यान लगा सकीस।
अजय के सफलता छत्तीसगढ़ के वनाश्रित परिवार मन के अटूट विस्वास के जीत आय – मुख्यमंत्री विष्णु देव साय
मुख्यमंत्री विष्णु देव साय ह रायगढ़ जिला के अजय गुप्ता ला भारतीय वन सेवा (IFS) म चुने जाय बर बधाई देवत कहिन कि अजय ह न केवल अपन दाई-दादा के मान बढ़ाय हे, बल्कि पूरा छत्तीसगढ़ ला गरवित करीस हे।
मुख्यमंत्री ह कहिन कि ये बड़े खुसी के बात आय कि अइसन युवा जेहा खुद जंगल म तेंदूपत्ता अउ महुआ बटोरे हे, आज ओही जंगल मन के रखवारी के जिम्मेदारी संभाले बर जावत हे। हमर सरकार के ‘लघु वनोपज संघ छात्रवृत्ति’ अउ ‘पोस्ट मैट्रिक छात्रवृत्ति’ जइसन योजना ह अजय जइसन होनहार युवा के रस्ता ला आसान करे हे। अजय के ये सफलता ह देखाथे कि सही मौका मिले म हमर गांव-देहात के युवा घलो देस के सबले बड़े सेवा म अपन जगह बना सकथें।
वन मंत्री ह जताइस गरव, हजारों परिवार के सपना के प्रतीक
वन अउ जलवायु परिवर्तन मंत्री केदार कश्यप ह अजय गुप्ता ला फोन करके बधाई दीस अउ ओकर ये उपलब्धि ला ऐतिहासिक बताइस। मंत्री जी ह कहिन कि अजय के सफलता छत्तीसगढ़ के ओ हजारों वनाश्रित परिवार के जीत आय जे मन जंगल के बीच म रहि के बड़े सपना देखथें। ये बात ले साबित होथे कि हमर योजना के मतलब सिर्फ आर्थिक मदद देना नइ हे, बल्कि अइसने मजबूत भविष्य के निर्माण करना घलो आय।
युवा मन बर नवा आदरस
अजय गुप्ता आज ओ लाखों युवा मन बर प्रेरणा बन के आगू आय हे, जे मन कम साधन म IFS जइसन मुस्किल परीक्षा के तैयारी करत हें। ओकर सफलता ह ये संदेस देथे कि यदि मिहनत सच्चा होही अउ सासन के साथ मिलही, त वनांचल के कोनो भी युवा देस के बड़े पद तक पहुँच सकथे।
