रायपुर: छत्तीसगढ़ ला बाल विवाह मुक्त बनाए के उद्देश्य ले महिला अऊ बाल विकास विभाग कोति ले जागरूकता कार्यक्रम मन के श्रृंखला चलाए जात हे। एही कड़ी म सूरजपुर जिला कलेक्टर रेना जमील के निर्देश अऊ जिला कार्यक्रम अधिकारी, महिला अऊ बाल विकास विभाग के मार्गदर्शन म शासकीय उच्चतर माध्यमिक विद्यालय करसी म नोनी मन बर जागरूकता कार्यक्रम आयोजित करे गिस।
कार्यक्रम म जिला बाल संरक्षण अधिकारी मनोज जायसवाल ह बाल विवाह के रोकथाम, बाल अधिकार, शिक्षा अऊ नोनी मन के सुरक्षा के संबंध म जानकारी दीन। ओमन कहिन कि शिक्षा ह नोनी मन के सशक्तिकरण अऊ सुरक्षित भविष्य के सबसे मजबूत आधार आय। ओमन पढ़इया लइका मन ले लगातार पढ़ाई करके अपन लक्ष्य ला पाए बर अऊ क्षेत्र म कउनो घलोक बाल विवाह ला रोके म अपन सक्रिय भूमिका निभाए के गोहार लगाइन।
ओमन चाइल्ड हेल्पलाइन 1098, महिला हेल्पलाइन 181 अऊ आपातकालीन सेवा 112 के जानकारी देवत कहिन कि कउनो घलोक परेशानी के बखत ए सेवा मन के उपयोग करे जा सकथे। नोनी मन ला सुरक्षित अऊ असुरक्षित छुआव (गुड टच-बैड टच) बर जागरूक करत बचाव के चार सूत्र ‘नो, गो, टेल अऊ एफआईआर’ बताए गिस। संग म पॉक्सो कानून के प्रावधान अऊ लइका मन के ऑनलाइन सुरक्षा के संबंध म घलोक जानकारी दीन गिस।
मिशन शक्ति के फरजाना अंसारी ह नोनी मन ला पढ़-लिख के आत्मनिर्भर बने बर प्रेरित करीन। ओमन बेटी बचाओ-बेटी पढ़ाओ अभियान के उद्देश्य मन के जानकारी देवत भ्रूण हत्या के रोकथाम अऊ घरेलू हिंसा के स्थिति म हेल्पलाइन 181 के उपयोग करे के अपील करीन।
कार्यक्रम के दौरान पोस्टर, राखी अऊ रंगोली बनाए के प्रतियोगिता रखे गे रिहिस, जेमा पढ़इया लइका मन ह उत्साह के संग हिस्सा लीन। प्रतियोगिता म पहिल, दूसर अऊ तीसर स्थान पाए प्रतिभागी मन ला इनाम दीन गिस अऊ अउरी प्रतिभागी मन ला सांत्वना पुरस्कार दे गिस। कार्यक्रम के अंत म जम्मो मौजूद लोगन मन ला बाल विवाह मुक्त सूरजपुर बनाए के किरिया (शपथ) खवाए गिस।
