- हर महीना कमावत हे 8 ले 10 हजार रूपिया
- सुकमा में 4 ‘सेवा एक्सप्रेस’ के माध्यम ले 5500 ले जादा महिला मन बनिन लखपति दीदी
रायपुर. जिला सुकमा के कोंटा विकासखंड के ‘नियद नेल्लानार’ गांव पोलमपल्ली के करतम सविता ह ए बात ला सच कर देखाइस हे कि यदि मेहनत ला सरकार के सही योजना के साथ मिल जाय, त गांव के माई लोगन मन बर आत्मनिर्भर बने के रद्दा आसान हो जाथे। जिला सीईओ मुकुन्द ठाकुर के मार्गदर्शन में चलत ‘छत्तीसगढ़ राज्य ग्रामीण आजीविका मिशन’ अउ ‘लखपति दीदी’ अभियान ले जुड़के सविता ह मजदूरी के जिनगी ले बाहिर निकलिस अउ अपन परिवार बर सम्मान अउ स्थायी कमाई के साधन बना लीस।
करतम सविता बताथे कि पहिली ओकर परिवार मजदूरी अउ छोटे-मोटे काम के भरोसा में रहीस, जेकर ले आर्थिक हालत हमेशा खराब रहय। फेर ‘प्रिया स्व-सहायता समूह’ ले जुड़े के बाद ओला नवा रद्दा मिलिस। समूह के माध्यम ले 60 हजार रूपिया के करजा (ऋण) लेके ओहा ‘कृति किराना स्टोर’ शुरू करिस। आज ओकर परिवार आर्थिक रूप ले मजबूत होत हे अउ गांव में ओकर पहिचान एक सफल महिला उद्यमी के रूप में बन गे हे।
आज सविता अपन किराना दुकान ले बछर भर में 1 ले 2 लाख रूपिया तक के शुद्ध कमाई करत हे। ए कमाई ह सिरिफ पइसा नई आय, बल्कि ओकर आत्मविश्वास अउ परिवार के खुशहाली के अधार बन गे हे। सविता कहिथे कि अब ओला काम बर इहार-उहार भटके नई पड़य, दुकान ले रोज नीक कमाई होथे अउ परिवार में सुख-शांति के साथ समृद्धि आई हे। ओकर ए काम में घर के सब्बो मनखे मदद करथें, जेकर ले लइका मन के पढ़ाई अउ भविष्य घलो सुरक्षित होत हे।
कलेक्टर अमित कुमार ह कहिन कि ‘छत्तीसगढ़ राज्य ग्रामीण आजीविका मिशन’ अउ ‘लखपति दीदी’ अभियान के माध्यम ले जिला के महिला मन ला खुद के काम-धंधा ले जोड़के ओमन ला मजबूत बनाए के काम तेजी ले करे जात हे। उमन बताइन कि जिला में नवा प्रयोग करत हुए दूर-दराज इलाका के महिला मन ला समूह ले जोड़े बर 4 सेवा एक्सप्रेस चलाए जात हे। एखर माध्यम ले अब तक लगभग साढ़े 5 हजार महिला मन ला ‘लखपति दीदी’ के रूप में आत्मनिर्भर बनाए गे हे, जेहा जिला बर एक बड़े अउ ऐतिहासिक उपलब्धि आय। लखपति दीदी योजना महिला मन ला सिरिफ आर्थिक सहारा नई, बल्कि आत्मविश्वास, सम्मान अउ एक नवा पहिचान देवत हे।
अपन सफलता में खुसी जतावत सविता ह कहिस कि सरकार के योजना ह गांव के महिला मन के सपना ला उड़े बर पांख दे हें। ओहा प्रधानमंत्री नरेंद्र मोदी अउ मुख्यमंत्री विष्णु देव साय के धन्यबाद करत हुए कहिस कि ‘छत्तीसगढ़ राज्य ग्रामीण आजीविका मिशन’ अउ ‘लखपति दीदी’ अभियान जइसन पहल ह ओला मजदूरी छोड़ के अपन खुद के व्यापार खड़ा करे के मौका दीस। आज ओहा गरब ले कहिथे कि ओहा आत्मनिर्भर हे अउ ओकर जइसन कतकोन ग्रामीण महिला मन सरकार के योजना ले नवा पहिचान बनावत हें।
