- ‘मुस्कुराता बस्तर’ कार्यशाला के आयोजन
- 120 स्कूली लइका मन हा वरिष्ठ कार्टूनिस्ट मन ले सीखिन कार्टून अउ कैरिकेचर के बारिकी मन ला
- मुख्यमंत्री के विजन के अनुरूप कार्टून कैनवास मा उघरिस नवा बस्तर के तस्वीर
रायपुर, बस्तर के सकारात्मक छवि, समृद्ध सांस्कृतिक विरासत अउ प्राकृतिक सुंदरता ला रचनात्मक कला के माध्यम ले देश-दुनिया तक पहुँचाए के उद्देश ले सोमवार के जगदलपुर के एक निजी होटल मा ‘मुस्कुराता बस्तर’ कार्टून कार्यशाला के आयोजन करे गिस। छत्तीसगढ़ जनसंपर्क विभाग के सहयोग ले देश के एकेच मासिक कार्टून पत्रिका ‘कार्टून वॉच’ दुवारा आयोजित ए कार्यशाला मा जिला के 10 स्कूल मन के 120 लइका मन हा उत्साह के संग हिस्सा लीन।
कार्यक्रम मा मुख्य अतिथि वन अउ जलवायु परिवर्तन मंत्री केदार कश्यप हा कहिन कि अपन भावना अउ विचार मन ला कला के माध्यम ले जाहिर करना घलो एक खास हुनर ए। ओमन कहिन कि कार्टून अउ कैरिकेचर खाली मनोरंजन के साधन नो हे, बल्कि समाज, संस्कृति अउ विकास के सकारात्मक संदेश ला असरदार तरीका ले पेश करे के एक मजबूत कला ए। ए मउका मा महापौर संजय पांडेय अउ एमआईसी सदस्य संग्राम सिंह, स्कूल मन के गुरुजी अउ लइका मन घलो मौजूद रीहिन। बस्तर कलेक्टर आकाश छिकारा हा घलो कार्यशाला मा पहुँच के लइका मन के उत्साह बढ़ाइन।
कार्यशाला मा दिल्ली के वरिष्ठ कार्टूनिस्ट माधव जोशी अउ पुणे के नामी कैरिकेचर कलाकार शुभम जिंदे हा लाइव डेमो के माध्यम ले लइका मन ला कार्टून अउ कैरिकेचर बनाए के तकनीक मन ला सीखाइन। ओमन लइका मन ला कला के सामाजिक महत्व, रचनात्मक संभावना अउ रोजगार के मौका मन के जानकारी घलो दीन।
ध्यान देवे के गोठ ए हे कि मुख्यमंत्री विष्णु देव साय के अगवाई मा बस्तर विकास, बिसास अउ नवा संभावना मन के संग नवा पहचान बनावत हे। चित्रकोट अउ तीरथगढ़ जलप्रपात, कांगेर घाटी राष्ट्रीय उद्यान, बस्तर दशहरा अउ जनजातीय संस्कृति जइसन धरोहर मन बस्तर ला राष्ट्रीय अउ अंतरराष्ट्रीय स्तर मा एक अलग पहचान देवावत हवयं। ‘मुस्कुराता बस्तर’ कार्यशाला के मकसद एही सकारात्मक बात मन ला कार्टून कला के माध्यम ले रचनात्मक रूप मा आगू लाना ए। कार्यशाला मा लइका मन अपन सोच अउ कला के हुनर ले कैनवास मा नवा बस्तर के बदलत रूप, विकास अउ खुशहाली के जीवंत तस्वीर उकेरिन।
‘कार्टून वॉच’ के संपादक त्र्यंबक शर्मा हा कहिन कि ए पहल के मकसद लइका मन मा रचनात्मक सोच ला बढ़ाना अउ बस्तर के बढ़िया बात मन ला नवा पीढ़ी तक पहुँचाना ए। ओमन कहिन कि ए कार्यशाला जगा के प्रतिभा मन ला मंच देवे के संग-संग बस्तर के सकारात्मक पहचान ला पूरा देश मा बनाए के एक नवा कोसिस ए। ए आयोजन जुवान मन ला अपन संस्कृति, परंपरा अउ कुदरती धरोहर ले जोड़े के एक मजबूत साधन बनही। ए मउका मा कैरिकेचर कलाकार शुभम जिंदे हा वन मंत्री अउ महापौर के कैरिकेचर बना के ओमन ला भेंट करिन। कार्यशाला मा लइका मन बर अलग-अलग प्रतियोगिता के आयोजन घलो करे गिस, जेमा लइका मन हिस्सा लीन अउ इनाम पाइन।
