रायपुर। मुख्यमंत्री विष्णु देव साय के अध्यक्षता म 27 अक्टूबर 2026 ला मुख्यमंत्री निवास कार्यालय म आयोजित मंत्रिपरिषद के बइठक म किसान मन, करमचारी मन, बिजली उपभोक्ता मन, पर्यटन, अधोसंरचना अउ औद्योगिक बिकास ले जुड़े 19 महत्वपूर्ण फैसला लीन गे। कैबिनेट ह खरीफ विपणन बछर 2026-27 म 15 नवंबर ले धान खरीदी सुरू करे, घरेलु बिजली बिल म राहत जारी रखे, सरकारी करमचारी मन अउ ओखर आश्रित मन बर कैशलेस चिकित्सा सुबिधा लागू करे अउ बिकास परियोजना मन ला गति देय सहित कई प्रस्ताव मन ला मंजूरी दीिस।
15 नवंबर ले धान खरीदी, किसान मन ला 3,100 रुपिया प्रति क्विंटल कैबिनेट ह परदेस म 27.50 लाख ले जादा किसान मन ले 3,100 रुपिया प्रति क्विंटल के दर ले अधिकतम 21 क्विंटल प्रति एकड़ धान खरीदी करे के निधारन करे है। ये बछर 360 नवा उपार्जन केंद्र सुरू करे जाही, जेकर से कुल केंद्र मन के संख्या 3,100 हो जाही। एग्रीस्टैक आईडी वाले पिछिला बछर के पंजीकृत किसान मन ला धान बेचे बर दुबारा पंजीयन नइ कराना परै। एग्रीस्टैक पंजीयन के कारन समिति म अलग ले ऋण पुस्तिका ला ये के जरूरत घलो नइ परै। बास्तविक किसान मन ले खरीदी सुनिस्चित करे के राज्य म बायोमेट्रिक ब्यवस्था लागू करे जाही। एखर संगच कृषक उन्नति योजना म संसोघन ला मंजूरी देत धान म आदान सहायता रासी प्रति क्विंटल के बजाय प्रति एकड़ के आधार म देय के निधारन करे गे है।
बिजली बिल म राहत अउ सरकारी करमचारी मन ला कैशलेस इलाज मुख्यमंत्री ऊर्जा राहत जन अभियान (एम-ऊर्जा) के तहत घरेलु उपभोक्ता मन ला 200 यूनिट तक बिजली बिल म मिलने वाला रियायत जारी रहिथे। योजना के लाभ लेय बर 400 यूनिट तक मासिक बिजली खपत के पात्रता अवधि 30 सितंबर 2026 ले बढ़ा के 31 मार्च 2027 कर दे गे है। एखर ले लगभग 7.25 लाख घरेलु उपभोक्ता मन ला लाभ मिलत रहिथे। ओहिने, शासकीय सेवक मन अउ ओखर आश्रित परिवारजन मन बर कैशलेस चिकित्सा सुबिधा लागू करे के प्रस्ताव ला घलो मंजूरी दे गे है। नवा ब्यवस्था म सुचीबद्ध अस्पताल मन म उपचार बर करमचारी मन ला पहिली अपन जेब ले भुतान कर के पाछू प्रतिपूर्ति के लंबा प्रक्रिया ले नइ गुजरना परै। पूर्व-अनुमोदन अउ चिकित्सा दाबा मन के प्रक्रिया ऑनलाइन होही।
रद्दा निर्माण, पर्यटन अउ अधोसंरचना बिकास ला मिलहि बढ़ावा कैबिनेट ह मुख्यमंत्री अधोसंरचना मिशन-2026 के दिसा-निर्देश मन ला मंजूरी दीिस है। ये मिशन बित्तीय बछर 2026-27 ले 2030-31 तक पांच बछर बर संचालित होही, जेकर बर 500 करोड़ रुपिया के प्रावधान परस्तावित है। एखर तहत रद्दा नेटवर्क के मास्टर प्लान, GIS आधारित नियोजन, परियोजना मन के बिस्तृत रिपोट, गुनवत्ता जांच अउ रद्दा सुरक्षा ऑडिट म जोर दे जाही। बिटुमिन के कीमत मन म असाधारण बृद्धि ला देखत रद्दा निर्माण ठेकेदार मन ला राहत देय के घलो निधारन करे गे है। छत्तीसगढ़ ग्रामीण रद्दा बिकास अभिकरण के काम मन बर 130.88 करोड़ रुपिया के राहत दे जाही, जबकि राज्य वित्तपोषित रद्दा काम मन बर लगभग 70 ले 100 करोड़ रुपिया के अतिरिक्त ब्यय के अनुमान है। एखर छोड़ के, आनीवाला पांच बछर बर लगभग 500 करोड़ रुपिया के मुख्यमंत्री पर्यटन बिकास मिशन ला मंजूरी दे गे है। एखर ले पर्यटन स्थल मन म सुबिधा, कनेक्टिविटी, सुरक्षा, स्वच्छता, होमस्टे अउ निजी निबेश ला बढ़ावा मिलहि।
रेल परियोजना, औद्योगिक निबेश अउ रोजगार के नवा अवसर कैबिनेट ह 295 किलोमीटर लंबा कटघोरा-तखतपुर-मुंगेली-कवर्धा-खैरागढ़-डोंगरगढ़ रेल परियोजना के त्वरित क्रियान्वयन बर छत्तीसगढ़ रेलवे कॉर्पोरेशन लिमिटेड के माध्यम ले शत-प्रतिशत इक्विटी निबेश के प्रस्ताव ला मंजूरी दीिस। परियोजना के अनुमानित लागत करिब 8,000 करोड़ रुपिया है, जेकर म लगभग 2,000 करोड़ रुपिया के अंशपूंजी राज्य सरकार अउ रेल मंत्रालय डहर ले बराबर-बराबर दे जाही। एखर छोड़ के, 1,000 करोड़ रुपिया या ओखर ले जादा निबेश वाले कोल गैसीफिकेशन परियोजना मन बर बिसेस प्रोत्साहन पैकेज ला औद्योगिक बिकास नीति 2024-30 म संसोघन के माध्यम ले मंजूरी दे गे। राजनांदगांव जिला के ग्राम सोमनी म राष्ट्रीय डेयरी विकास बोर्ड के माध्यम ले लगभग 400 करोड़ रुपिया के निबेश ले मल्टी फ्रूट प्रोसेसिंग फैसिलिटी स्थापित करे बर 31.55 एकड़ जमीन आबंटित करे के प्रस्ताव घलो स्वीकृत होइस। एखर ले 1,000 ले जादा प्रत्यक्ष अउ 5,000 ले जादा अप्रत्यक्ष रोजगार के अवसर सृजित होए के संभावना है।
पांच ठउर म पुनर्विकास, खेल मिशन अउ दूसर महत्वपूर्ण फैसला मंत्रिपरिषद ह पुनर्विकास योजना के दूसर चरण म पांच परियोजना मन ला सैद्धांतिक मंजूरी दीिस है। एखर म दुर्ग के शासकीय पोल्ट्री फार्म, रामानुजगंज के वेटनरी अस्पताल परिसर, जशपुर म पुलिस लाइन अउ रणजीता स्टेडियम के पीछे के जमीन, सक्ती के बुधवारी बाजार अउ धमतरी के रुद्री चौक के शासकीय जमीन सामिल है। ये परियोजना मन ला सार्वजनिक-निजी भागीदारी (PPP) मॉडल म बिकसित करे जाही। मुख्यमंत्री खेल उत्कर्ष मिशन ला घलो मंजूरी दे गे है, जेकर बर बित्तीय बछर 2026-27 म 100 करोड़ रुपिया के बजट प्रावधान करे गे है। पहिला चरण म अंबिकापुर, बिलासपुर, रायपुर, दुर्ग, जगदलपुर अउ जशपुर म खेल फीडर सेंटर स्थापित करे जाही। एखर अतिरिक्त रायपुर जिला के नगर पंचायत कूंरा के नाम बदल के कुंवरगढ़ करे, राजनांदगांव के ग्राम खपरीकला म केंद्रीय भंडारण निगम ला 10 एकड़ जमीन आबंटित करे, औद्योगिक जमीन अउ भवन प्रबंधन नियम मन म संसोघन, सुशासन अउ अभिसरण विभाग म तीन नवा पद सृजित करे अउ बन मुख्यालय म एक अस्थायी विशेष कर्तव्यस्थ अधिकारी के पद मंजूर करे सहित दूसर प्रस्ताव मन ला स्वीकृति दे गे। कैबिनेट ह बिशुद्ध रूप ले राजनीतिक आंदोलन मन से जुड़े नौ मामला ला जनहित म न्यायालय ले वापस लेय के प्रक्रिया आगे बढ़ाए के अनुमति घलो दीिस। एखर अलावा, दिवंगत डॉ. राकेश मोहन चंदोला के सेवा अवधि ला परिवार पेंशन के प्रयोजन ले नियमित सेवा मानत पात्र परिजन मन ला परिवार पेंशन, एरियर अउ नियमानुसार ब्याज़ देय के मंजूरी दे गे।
