रायपुर, स्कूल के छुट्टी के पाछू घर लौटइया विद्यार्थी मन के बीच सोमबार ल शिक्षा मंत्री गजेन्द्र यादव अचानक पहुंचिन। दुर्ग जिला के ग्राम फेकारी म सेवा सेतु शिविर म सामिल होय के पाछू सेलूद चौक म ओमन हाईस्कूल के विद्यार्थी मन संग सहज संवाद करिन। मंत्री ल अपन बीच पा के लइका मन म उत्साह दिखिस अउ ओमन पढ़ई, स्कूल के गतिविधि मन अउ अपन जरूरत मन ल लेके खुलकर बातचीत करिन। लइका मन संग चर्चा के बेरा म गजेन्द्र यादव ह ओमन के पढ़ई, तिमाही परीक्षा के तैयारी, खेलकूद अउ स्कूल के दूसर गतिविधि मन के जानकारी लीन। विद्यार्थी मन स्कूल परिसर म प्रार्थना शेड अउ मंच के जरूरत बताइन। ओमन के मांग ऊपर मंत्री ह संबंधित अधिकारी मन ल प्रार्थना शेड अउ मंच निर्माण बर आवश्यक कार्रवाई के निर्देश दीन। स्वामी आत्मानंद शासकीय विद्यालय, सेलूद के व्यवस्था मन ल बेहतर बनाय बर शिक्षा मंत्री ह स्कूल परिसर म साइकिल स्टैंड, बाउंड्रीवाल अउ वॉलीबॉल ग्राउंड के निर्माण के घोषणा करिन। ओमन कहिन कि विद्यार्थी मन ल पढ़ई के संग खेल अउ दूसर गतिविधि बर घलो बेहतर सुविधा मिलनी चाही। गजेन्द्र यादव ह विद्यार्थी मन ल कहिन कि आबइया समे आर्टिफिशियल इंटेलिजेंस अउ नवा तकनीक के हे। एखरसे नियमित पढ़ई के संग विद्यार्थी मन ल तकनीकी ज्ञान म घलो दक्ष होय बर जरूरी हे। ओमन बताइन कि छत्तीसगढ़ म अलग-अलग संस्था अउ कंपनी मन के सहयोग ले विद्यार्थी मन ल एआई कस आधुनिक तकनीक बर तैयार करै के डहर म काम करे जात हे। इंग्लिश लर्निंग कोर्स सुरू करै के कोसिस घलो करे जात हे। एखर पाछू शिक्षा मंत्री स्वामी आत्मानंद शासकीय विद्यालय, सेलूद पहुंचिन अउ विद्यालय के व्यवस्था मन के निरीक्षण करिन। ओमन प्राचार्य अउ शिक्षक मन ले शैक्षणिक ब्यवस्था, उपलब्ध सुविधा तथा विद्यार्थी मन के जरूरत के जानकारी लीन। प्राचार्य ह बताइन कि विद्यालय म शौचालय निर्माण के काम पूरा हो चुके हे। शिक्षा मंत्री ह कहिन कि विद्यार्थी मन ल गुणवत्तापूर्ण शिक्षा के संग बेहतर शैक्षणिक वातावरण, खेल सुविधा अउ आवश्यक आधारभूत संसाधन उपलब्ध कराइ सरकार के प्राथमिकता हे। स्कूल मन के जरूरत ल स्थानीय स्तर म समझ के सुविधा मन के विस्तार करै ले विद्यार्थी मन ल पढ़ई अउ ब्यक्तित्व विकास बर बेहतर माहौल मिल सकहि।
