घर बइठे होइन परिवहन विभाग ले जुड़े काम, सोनबरसा जंगल सफारी ल 4 नवा जिप्सी अउ 1.5 करोड़ के सौगात
रायपुर, बलौदाबाजार जिला म परिवहन सुविधा मन ल आधुनिक बनाय के डहर म नवा कदम उठाय गे हे। ग्राम पंचायत परसाभदेर म नवनिर्मित जिला परिवहन कार्यालय भवन के सोमबार ल परिवहन मंत्री केदार कश्यप ह लोकार्पण करिन। कार्यक्रम म राजस्व मंत्री टंक राम वर्मा घलो उपस्थित रिहिन। एही बेरा म सोनबरसा जंगल सफारी के विकास बर 1.5 करोड़ रूपिया के स्वीकृति के संग 4 नवा जिप्सी के सौगात घलो दे गे हे।
नवा परिवहन कार्यालय आधुनिक सुविधा मन ले लैस हे। लोकार्पण के पाछू मंत्री मन अउ अधिकारी मन भवन के अलग-अलग कक्ष मन के निरीक्षण करिन। ए बेरा म आम लोगन के सुविधा अउ नागरिक केंद्रित सेवा मन ल प्राथमिकता दे के निर्देश दे गे हे।
परिवहन मंत्री केदार कश्यप ह कहिन कि परिवहन विभाग के सेवा मन ल तेजी ले डिजिटल करे जात हे। आबइया समे म परिवहन ले जुड़े कई झन जरूरी काम लोगन घर बइठे ही पूरा कर सकहीं। ओमन जिला म पंजीकृत 2 लाख 14 हजार ले जादा वाहन मन के जिक्र करत लोगन ले यातायात नियम मन के पालन करै के अपील करिन। खासकर नाबालिक स्कूली लइका मन के वाहन चलै के ऊपर ओमन अभिभावक मन ल सतर्क रहै के कहिन।
मंत्री ह सड़क दुर्घटना पीड़ित मन बर संचालित ‘राहवीर योजना’ के जानकारी देत बताइन कि योजना के तहत डेढ़ लाख रूपिया तक के मुफ्त अउ कैशलेस इलाज के ब्यवस्था हे। ओमन जिला के 5 प्राथमिक कृषि साख सहकारी समिति मन म परिवहन सुविधा केंद्र के संचालन अउ 572 लर्निंग लाइसेंस जारी होय के घलो उल्लेख करिन।
राजस्व मंत्री टंक राम वर्मा ह बताइन कि नवा जिला परिवहन कार्यालय सिरिफ पौने दुई बछर म तेयार करे गे हे। ओमन कहिन कि जल्दी ही जिला म अत्याधुनिक वाहन टेस्टिंग के सुविधा घलो सुरू करे जाही। एकर से वाहन जांच बर लोगन ल दूसर सहर मन म जावय के जररत नइ पड़ै।
कार्यक्रम म 80 बछर ले जादा उमिर के 10 वरिष्ठ नागरिक मन ल निःशुल्क बस पास दे गे। एखर अलावे 5 वाहन स्वामी मन ल लाइसेंस अउ 5 चालक मन ल हेलमेट बांटे गे। ‘सेवा संकल्प अभियान’ के तहत ‘एक पेड़ माँ के नाम’ अभियान म कार्यालय परिसर म पेड़ घलो लगाए गे।
