बलौदाबाजार, प्रधानमंत्री नरेंद्र मोदी के जनसेवा के 25 बछर पूरा होय के अवसर म चलाय जावत ‘सेवा संकल्प अभियान’ के तहत बलौदाबाजार जिला म अलग-अलग जनसेवा कार्यक्रम आयोजित करे जात हे। एही कड़ी म ‘सेवा मेरा योगदान’ कार्यक्रम के तहत सोमबार ल राजस्व मंत्री टंक राम वर्मा के अगुआइ म बलौदाबाजार स्थित ऐतिहासिक षष्ठी मंदिर परिसर अउ आसपास के छेत्र मन म वृहद स्वच्छता अभियान चलाय गे।
स्वच्छता अभियान के बेरा म राजस्व मंत्री टंक राम वर्मा, प्रशासनिक अधिकारी मन अउ जनप्रतिनिधि मन अपन हाथ म झाड़ू थामिन अउ मंदिर परिसर सहित आसपास के छेत्र मन म सफाई करिन। सड़क मन म बिखरे कचरा ल एकत्र करके डस्टबिन म डाले गे। ए बेरा म लोगन मन ल सार्वजनिक स्थान मन ल स्वच्छ रखै अउ स्वच्छता ल अपन दैनिक जीवनशैली के हिस्सा बनाय के संदेश दे गे।
मंत्री टंक राम वर्मा ह कहिन कि स्वच्छता सिरिफ एक दिन या अभियान तक सीमित रहइया काम न्हाय। ये अइसे आदत हे, जेन धीरे-धीरे हमार ब्यवहार अउ संस्कार के हिस्सा बनथे। ओमन कहिन कि ‘सेवा संकल्प अभियान’ के माध्यम ले जन-जन म स्वच्छता अउ जनसेवा के प्रति जागरूकता बढ़ाए के कोसिस करे जात हे।
ओमन बताइन कि प्रधानमंत्री नरेंद्र मोदी के जनसेवा के 25 सफल बछर के उपलक्ष्य म 17 सितंबर ले 17 अक्टूबर तक ‘सेवा संकल्प अभियान’ चलाय जात हे। ए अभियान के तहत अलग-अलग छेत्र मन म सेवा अउ जनकल्याण से जुड़े कार्यक्रम आयोजित करे जात हे।
स्वच्छता अभियान म कलेक्टर, भारत स्काउट एवं गाइड के राज्य उपाध्यक्ष, नगर पालिका उपाध्यक्ष, अलग-अलग वार्ड के पार्षद, प्रशासनिक अधिकारी अउ गणमान्य नागरिक मन घलो हिस्सा लीन। सबो झन श्रमदान करके स्वच्छता अभियान म अपन सहभागिता दर्ज कराइन।
अभियान के बेरा म लोगन मन ले सार्वजनिक स्थल मन म कचरा नइ फेंकै, कचरा के उचित निपटान करै अउ अपन आसपास के वातावरण ल स्वच्छ रखै के अपील करे गे। कार्यक्रम के उद्देश्य स्वच्छता के प्रति सामूहिक जिम्मेदारी के भावना ल बढ़ावा देय अउ ये ल जनआंदोलन के रूप देय रिहिन।
