रायपुर : मंत्रालय महानदी भवन म मुख्य सचिव विकासशील के अध्यक्षता म राज्य के सबो विभाग के सचिव मन के बइठक होइिस। बइठक म धान खरीदी, पेयजल अउ जल प्रबंधन ले ले के प्रशासनिक सुधार तक कई मुख्य मुद्दा मन के समीक्षा करे गीस। मुख्य सचिव ह अधिकारी मन ल विभागीय काम बर स्पष्ट अउ समयबद्ध कार्ययोजना तैयार कराय के निदेस दीन।
धान खरीदी के तयारी ले ले के सिटी वाटर प्लान तक फोकस
बइठक म खरीफ विपणन वर्स बर धान खरीदी के सबो जरूरी व्यवस्था समय म पूरा कराय के कहे गीस। लोक स्वास्थ्य यांत्रिकी विभाग ल पेयजल योजना अउ जल संसाधन विभाग ल सहरी अउ औद्योगिक क्षेत्र म जल प्रबंधन अउ जल उपचार के बढ़िया कार्ययोजना तैयार कराय के निदेस दीन गे हे।
नगरीय प्रशासन विभाग ल सिटी वाटर प्लान ‘विकसित भारत-2047’ के विजन के अनुरूप तैयार कराय के कहे गीस। परिवहन विभाग ल ई-व्हीकल ल बढ़ावा देवय अउ खाद्य विभाग ल सिटी गैस डिस्ट्रीब्यूशन पॉलिसी तैयार कराय के निदेस दीन गे हे।
जिला मन के मॉनिटरिंग बर बनही स्कोर कार्ड
मुख्य सचिव ह जिला मन म योजना अउ विभागीय कामकाज के नियमित निगरानी बर स्कोर कार्ड ल अंतिम रूप देवय के कहे गीस। एखर जरिये कलेक्टर स्तर म योजना के प्रगति के समीक्षा करे जा सकहि। कोर्ट मॉनिटरिंग सिस्टम ल असरदार बनाय अउ पारस पोर्टल ले जुड़े प्रस्ताव म आईटी विभाग के संग तालमेल करके कार्रवाई कराय के निदेस घलो दीन गे हे।
ई-गजट म उपलब्ध होही नियम-कानून
बइठक म सरकारी नियम, निदेस अउ दूसर विधिक प्रावधान के संदर्भ प्रति ल ई-गजट म अपलोड कराय के ऊपर जोर दीन गे हे। एखर से अधिकारी अउ विभाग मन ल जरूरी दस्तावेज आसानी से मिल सकहि।
पेंशन के लंबित मामला मन के विभागवार समीक्षा कराय अउ उनकर निराकरण म लगवइया समय के रिपोर्टिंग सुनिस्चित कराय के निदेस दीन गे हे। एखर छोड़ के एपीएआर ल आईगॉट ले लिंक कराय अउ कर्मचारी मन के क्षमता निर्माण बर विभागवार कार्ययोजना बनाय के कहे गीस।
30 सितंबर तक देना होही खाली पद के जनकारी
मुख्य सचिव ह कर्मचारी चयन मंडल बर अलग-अलग विभाग म खाली पद के जनकारी 30 सितंबर तक उपलब्ध कराय के निदेस दीन। बइठक म लोक सेवा गारंटी अधिनियम, रिफॉर्म उत्सव, 2 अक्टूबर के ग्राम सभा के तयारी अउ सेवा सेतु के प्रगति के घलो समीक्षा होइस।
बताय गीस कि अभी हाल म 38 विभाग के 907 सेवा ‘सेवा सेतु’ के जरिये ऑनलाइन उपलब्ध हे। मुख्य सचिव ह फायर सेफ्टी अधिनियम म जरूरी सुधार म कार्रवाई कराय अउ ‘माय भारत पोर्टल’ ले जुड़े गतिविधि म तेजी लावय के निदेस दीन।
एंटी नारकोटिक्स टास्क फोर्स ले होही जनकारी मन के समेकित रिपोर्टिंग
गृह विभाग के सचिव नेहा चम्पावत ह बताइन कि एंटी नारकोटिक्स टास्क फोर्स के माध्यम ले अलग-अलग विभाग ले संबंधित जनकारी इकट्ठे करके उनकर समेकित रिपोर्टिंग करे जाही। ये जनकारी आगे भारत सरकार ल भेजे जाही।
बइठक के आखरी म मुख्य सचिव ह सबो विभाग मन ल क्षमता निर्माण, योजना के निगरानी अउ तय लक्ष्य ल निश्चित समय म पूरा कराय बर स्पष्ट कार्ययोजना बनाय के निदेस दीन। बइठक म राज्य शासन के अलग-अलग विभाग के अपर मुख्य सचिव, प्रमुख सचिव अउ सचिव समेत सीनियर अधिकारी मन उपस्थित रिहिन।
