- रक्षाबंधन मा ‘विष्णु भैया’ ह 50 बहिनी मन ला दिन आत्मनिर्भरता के उपहार, सौंपिन ई-रिक्शा
- बहिनी मन ह मुख्यमंत्री के कलाई मा बांधिन राखी, मुख्यमंत्री ह साड़ी अऊ मिठाई भेंट करके दिन रक्षाबंधन के सुभकामना
- मुख्यमंत्री ह कतको 3 करोड़ रूपिया के लागत ले बने वईया बगिया विश्राम गृह संग विकास काम मन के करिन भूमिपूजन
जशपुर : रक्षाबंधन के पावन मौका मा मुख्यमंत्री विष्णु देव साय ह आज बगिया कैम्प कार्यालय मा माई-लोगिन मन के सशक्तिकरण अऊ स्वरोजगार के कोती मा बड़े कदम उठावत ‘जशपुर एक्सप्रेस’ योजना के सुभारंभ करिन। ए मौका मा मुख्यमंत्री ह जशपुर जिला के 50 माई-लोगिन मन ला ई-रिक्शा बाँट के ओकर मन ला रोजी-रोटी अऊ आर्थिक आत्मनिर्भरता के नावा रद्दा ले जोड़िन।
रक्षाबंधन के मयारुक माहौल मा स्व-सहायता समूह के दीदी मन ह मुख्यमंत्री साय के कलाई मा राखी बांधिन अऊ ओकर मन के सुघर सेहत अऊ लंबा उमिर के कामना करिन। मुख्यमंत्री ह घलो बहिनी मन ला रक्षाबंधन के गाड़ा-गाड़ा सुभकामना देत हुए ओमन ला साड़ी अऊ मिठाई उपहार मा दिन। बहिनी मन के बीच मा मुख्यमंत्री के आत्मीय अंदाज ह कारजक्रम ला विसेस बना दिस।
मुख्यमंत्री साय ह कहिन कि माई-लोगिन मन के आर्थिक रूप ले आत्मनिर्भर होना मजबूत परिवार अऊ समृद्ध समाज के बुनियाद ए। हमर बहिनी मन आज स्व-सहायता समूह के माध्यम ले अलग-अलग काम-धंधा ले जुड़ के स्वावलंबन के नावा मिसाल लिखत हवयं। ई-रिक्शा ओकर मन बर सिर्फ आए-जाए के साधन नोहे, भलुक रोज के कमाई अऊ सम्मानजनक स्वरोजगार के रद्दा बनही।
ओमन कहिन कि राज्य सरकार के कोसिस हे कि माई-लोगिन मन ला सिर्फ आर्थिक सहायता ही नई, भलुक ओमन ला अइसन काम-धंधा ले जोड़े जाय, जेकर ले वे अपन गोड़ मा ठाढ़े हो सकें अऊ परिवार के आर्थिक तरक्की मा अपन भूमिका ला अऊ मजबूत कर सकें।
पिछले रक्षाबंधन मा 14, ए बेर 50 बहिनी मन ला ई-रिक्शा के सौगात
मुख्यमंत्री साय ह कहिन कि बहिनी मन ला स्वरोजगार ले जोड़े के ए पहल लगातार आगू बढ़त हे। पिछले रक्षाबंधन तिहार मा घलो स्व-सहायता समूह के 14 माई-लोगिन मन ला ई-रिक्शा दे गे रिहिस। ए बछर ‘जशपुर एक्सप्रेस’ योजना के माध्यम ले 50 अऊ बहिनी मन ला ई-रिक्शा उपलब्ध कराए गे हे।
ओमन बताईन कि राजधानी रायपुर मा घलो माई-लोगिन मन ला स्वरोजगार ले जोड़े के उदेस्य ले 92 ई-रिक्शा दे गे हे। ई-रिक्शा चला रही माई-लोगिन मन आज हर महीना कतको 15 हजार रूपिया तक के कमाई करत हवयं। एकर ले ओकर परिवार के आय बढ़े के संग-संग ओकर मन मा आतमबिस्वास अऊ आर्थिक स्वतंत्रता घलो बढ़े हे।
मुख्यमंत्री ह कहिन कि जब कोनो बहिनी के हाथ मा अपन कमाई आवथे त ओकर फायदा पूरा परिवार ला मिलथे। लईका मन के पढ़ाई, परिवार के जरूरत अऊ भविष्य बर बचत असन कतको काम मा ए कमाई सहारा बनथे। सरकार के उदेस्य प्रदेश के जादा ले जादा माई-लोगिन मन ला अइसने कमाई वाले काम-बूट ले जोड़ना ए।
किराना, साग-भाजी के धंधा ले लेके ई-रिक्शा तक, हर छेत्र मा आगू बढ़त हवयं दीदी मन
मुख्यमंत्री साय ह स्व-सहायता समूह के माई-लोगिन मन के मिहनत के सुरता करत हुए कहिन कि आज हमर दीदी मन किराना दुकान, साग-भाजी के धंधा अऊ अलग-अलग छोटे-बड़े काम-धंधा ले जुड़े हवयं। अब ई-रिक्शा असन सेवा मा घलो माई-लोगिन मन आगू आवत हवयं।
ओमन कहिन कि बदलत समय के संग माई-लोगिन मन बर स्वरोजगार के नावा मौका तैयार करे जात हे। सरकार माई-लोगिन मन ला सिखावन (प्रशिक्षण), पइसा के मद्दत अऊ बाजार ले जोड़े के कोती मा घलो लगातार काम करत हे, ताकि ओकर मन के धंधा सुघर चलै अऊ ओकर कमाई मा लगातार बढ़ोतरी होवै।
मुख्यमंत्री ह कहिन कि माई-लोगिन मन ला स्वरोजगार सुरु करे अऊ अपन काम ला आगू बढ़ाए बर मुद्रा लोन के सुविधा घलो उपलब्ध हे। माई-लोगिन मन ला ए योजना मन के जादा ले जादा लाभ उठा के अपन पसंद अऊ छमता के हिसाब ले धंधा सुरु करना चाहि।
‘जशपुर एक्सप्रेस’ ले स्वावलंबन के रद्दा होही आसान
‘जशपुर एक्सप्रेस’ योजना के माध्यम ले माई-लोगिन मन ला ई-रिक्शा उपलब्ध करा के ओमन ला स्थानीय स्तर मा रोजगार ले जोड़े के कोसिस करे गे हे। एकर ले एक कोती माई-लोगिन मन ला रोज के कमाई के साधन मिलही, उहें दूसर कोती गांव-देहात मा आए-जाए के सुविधा घलो सुघर होही।
मुख्यमंत्री साय ह ई-रिक्शा पाए बहिनी मन ला सुभकामना देत हुए कहिन कि वे आतमबिस्वास के संग आगू बढ़यं अऊ अपन मिहनत ले आर्थिक आत्मनिर्भरता के मिसाल कायम करयं। ओमन कहिन कि आज छत्तीसगढ़ के माई-लोगिन मन हर छेत्र मा अपन छमता ला साबित करत हवयं। शासन के योजना मन अऊ अपन मिहनत के दम मा वे परिवार के आर्थिक सकति बने के संग प्रदेश के विकास मा घलो महत्तम योगदान देवत हवयं।
बगिया मा विकास काम मन के घलो भूमिपूजन
ए मौका मा मुख्यमंत्री साय ह बगिया छेत्र ला विकास काम मन के सौगात घलो दिन। ओमन कतको 3 करोड़ रूपिया के लागत ले बगिया मा बने वईया विश्राम गृह के भूमिपूजन करिन। एकर संग बगिया मा यादव मोहल्ला तक बने वईया सीसी सड़क के निरमान काम के घलो भूमिपूजन करिन।
मुख्यमंत्री ह कहिन कि ग्रामीण छेत्र मा जरूरी अधोसंरचना अऊ नागरिक सुविधा मन के बिस्तार राज्य सरकार के पहिली प्राथमिकता ए। गांव मा सड़क, भवन अऊ दूसर बुनियादी सुविधा मन के विकास ले लोगन मन के जिनगी मा सहूलियत बढ़े के संग स्थानीय विकास ला घलो गति मिलथे।
राखी के मया संग आत्मनिर्भरता के संकलप
रक्षाबंधन के मौका मा आयोजित कारजक्रम मा बहिनी मन अऊ मुख्यमंत्री के बीच आत्मीय गोठ-बात घलो होइस। स्व-सहायता समूह के दीदी मन ह मुख्यमंत्री के कलाई मा राखी बांध के अपन मया जताईन। मुख्यमंत्री ह बहिनी मन ला साड़ी अऊ मिठाई भेंट करत हुए ओकर मन के सुघर, समृद्ध अऊ आत्मनिर्भर भविष्य के कामना करिन।
मुख्यमंत्री साय ह कहिन कि बहिनी मन के मया अऊ असीस ओमन ला प्रदेश के विकास अऊ जनसेवा बर लगातार काम करे के पेेरना देथे। सरकार के संकलप हे कि प्रदेश के हर एक बहिनी ला आगू बढ़े के मौका मिलै, ओ ह आर्थिक रूप ले मजबूत बनै अऊ अपन परिवार के संग छत्तीसगढ़ के समृद्धि मा भागीदार बनै।
ए मौका मा कलेक्टर रोहित व्यास, वरिष्ठ पुलिस अधीक्षक डॉ. लाल उमेद सिंह, जिला पंचायत के मुख्य कार्यपालन अधिकारी अभिषेक कुमार संग अफसर-कर्मचारी मन अऊ बड़े संख्या मा स्व-सहायता समूह के माई-लोगिन मन उपस्थित रिहिन।
