पॉवर हब बनत हे अब सोलर पॉवर हब

• सौर ऊर्जा ले घलो जगमगावत हे लोगन मन के जिनगानी
• केन्द्र अऊ छत्तीसगढ़ सरकार के पहल ले होवत अंजोर

आज गैर परंपरागत ऊर्जा ल लेके जग म नवा नवा उदिम होवत हे। त अईसे म हमर देश अऊ प्रदेश घलो ए उदिम के पर्याय बनत हे। काबर कि एखर जादा ले जादा उपयोग सुघ्घर अऊ सुरक्षित भविष्य कोती ले के जाही। आज बिजली देश के एक बड़का जरूरत बन गे हे अऊ प्रधानमंत्री नरेंद्र मोदी के नेतृत्व में देश ह नवा-नवा ऊर्जा के क्षेत्र म कतको उदिम करत हे। इही कड़ी म छत्तीसगढ़ म घलो मुख्यमंत्री विष्णुदेव साय के सरकार ह सौर अऊ दिगर ऊर्जा के क्षेत्र म बड़का बुता करत हे। कभू छत्तीसगढ़ ल पॉवर हब केहे जात रिहिस फेर अब ए पॉवर सब ह सोलर हब बने के दिशा म आगू बाढ़त हे।

छत म बिजली उत्पादन, बेचे के घलो व्यवस्था

मुख्यमंत्री विष्णु देव साय के मार्गदर्शन म छत्तीसगढ़ राज्य म बड़का स्तर म पीएम सूर्य घर मुक्त बिजली योजना के प्रभावी क्रियान्वयन करे जात हे। जेखर लाभ उठाके लोगन मन अपन घर के छत म सोलर सिस्टम लगाके बिजली के उत्पादक बन गे हे। ए सोलर सिस्टम ले अतिरिक्त बिजली ह बिजली विभाग के ग्रिड म ट्रांसफर होके बिल ले समायोजित हो जात हे जेखर ले उपभोक्ता मन के सोज्झे बचत होवत हे।

बता देन कि प्रधानमंत्री नरेन्द्र मोदी के विजन के अनुरूप भारत सरकार ह आवासीय घर म अपन बिजली उत्पादन बर 29 फरवरी 2024 के दिन पीएम सूर्य घर मुफ्त बिजली योजना ल मंजूरी दे गिस। पीएम सूर्य घर मुफ्त बिजली योजना म 2 किलोवाट क्षमता तक के प्लांट बर सौर इकाई लागत के 60 प्रतिशत अऊ 2 ले 3 किलोवाट क्षमता बीच के प्लांट बर 40 प्रतिशत सब्सिडी दे जात हे। सब्सिडी के सीमा 3 किलोवाट क्षमता तक सीमित रखे गे हे। अऊ वर्तमान म 1 किलोवाट प्रणाली बर 30,000 रुपिया अऊ 2 किलोवाट प्रणाली बर 60,000 रुपिया के अनुदान के प्रावधान करे गे हे। उहें 3 किलोवाट अऊ ओखर ले उपर के प्लांट बर 78,000 रुपिया के सब्सिडी लाभार्थि मन ल दे जाथे। ए उदिम के उद्देश्य लाभार्थी मन ल हर महीना 300 यूनिट तक मुफ्त बिजली देना है।

रायगढ़ के कोड़ातराई निवासी जय नारायण चौधरी ह जनवरी 2025 म 3 किलोवॉट के सोलर सिस्टम लगवाए हे, जेमा 1.90 लाख के खरचा आईस। योजना कोती ले ओमन ल 78 हजार रुपिया के अनुदान घलो मिले हे  जेन ह सिरिफ 15 दिन म उंखर खाता म आ गे। पहिली उंखर मासिक बिजली बिल 2000 से 2500 रुपिया के आत रिहिस फेर सोलर सिस्टम लगाए के बाद पहिली बिल सिरिफ 10 रुपिया के आए हे। फरवरी के महीना म 325 यूनिट बिजली के उत्पादन ओमन करे रिहिन जेमे ले 232 यूनिट ल खुदे बऊरे हे अऊ 93 यूनिट बिजली ल ग्रिड म ट्रांसफर कर दिन जेखर ले उंखर बिल माइनस म आगे।

बता देन कि 3 किलोवॉट सोलर सिस्टम ले महीना म औसतन 300 यूनिट बिजली के उत्पादन हो सकत हे। जेखर ले एक बछर म लगभग 25,920 रुपिया के बचत करे जा सकत हे। उहें यूनिट के 25 बछर के लाइफ म लगभग साढ़े चार साल म ही लागत के वसूली हो सकत हे। एखर बाद उपभोक्ता सरलगहा 20 बछर तक मुफ्त बिजली ल बऊर सकत हे। सरकार कोती ले सब्सिडी के तहत 3 किलोवॉट या ओखर ले जादा क्षमता म 78,000 रुपिया तक के सहायता देवत हे। एखर बर बैंक म आसान लोन के सुविधा घलो उपलब्ध है। योजना के लाभ ले बर नजदीकी विद्युत विभाग के कार्यालय म संपर्क करे जा सकत हे।

सौर ऊर्जा ले जगमगावत हे 25 बैगा परिवार के आशियाना

कबीरधाम जिला के ग्राम पंचायत कांदावानी ले आश्रित गांव पटपरी म निवासरत 25 बैगा परिवार के जिनगी म अब अंधियारा नई भलकुन अंजोर ह दस्तक दे दे हे। प्रधानमंत्री जनमन योजना डाहर ले इहां जम्मो बैगा परिवार के घर म क्रेडा कोती ले निःशुल्क सोलर सिस्टम लगाए गे हे। जेखर ले उंखर आशियाना रोशनी ले जगमगा गे हे। शासकीय योजना के लाभ अब दूरस्थ आदिवासी अंचल म घलो सफ्फा दिखाई देत हे। पटपरी गांव म बिजली, पानी, स्वास्थ्य अऊ पहचान जईसन बुनियादी सुविधा पहुंचाके शासन-प्रशासन ह जनजातीय समुदाय के जिनगी म सकारात्मक बदलाव के नेंव रखे हे।

पटपरी गांव, जेन जिला मुख्यालय कबीरधाम ले लगभग 80 किलोमीटर अऊ ब्लॉक मुख्यालय पंडरिया ले करीब 40 किलोमीटर दुरिहा म स्थित हे। अऊ उहां नवा ऊर्जा के मिसाल दे जात हे। जम्मो घर म 300 वाट क्षमता वाला सोलर सिस्टम लगाए गे हे। जम्मो सोलर सिस्टम के लागत 65 हजार रुपिया हे जेन ल पीएम जनमन अऊ छत्तीसगढ़ सरकार कोती ले निःशुल्क बैगा परिवार मन ल दे गे हे। ए पहल ले ग्रामीण मन ल न सिरिफ अंधियार ले छुटकारा मिले हे भलकुन उंखर जीवन म नवा उम्मीद घलो जागे हे। बैगा समुदाय के फूल सिंह के कहिना हे कि अब हमार घर म अंधियार नई राहय अऊ हमर लईका मन रात म घलो पढ़ाई कर पात हे।

जगातीन बाई बैगा ह खुशी जाहिर करत कहिन कि जनमन योजना कोती ले उंखर घर म बिजली पहुंचाए गे हे जेखर ले ओमन बड़ उत्साहित हे। जनमन योजना के लाभार्थी होए के नाता ले ओमन राष्ट्रपति द्रौपदी मुर्मू के विशेष आमंत्रण म दिल्ली घलो गे रिहिन अऊ राष्ट्रपति ले भेंट करे रिहिन। पटपरी गांव म निवासरत बैगा परिवार मन के पेयजल व्यवस्था बर दू हैंडपंप घलो लगाए गे हे जेखर ले ओमन ल स्वच्छ पेयजल घलो मिलत हे। ए गांव के जम्मो परिवार के आधार कार्ड अऊ राशन कार्ड घलो बन गे हे। स्वास्थ्य सेवा कोती ले स्वास्थ्य कार्यकर्ता बेरा-बेरा म पटपरी गांव पहुंचथे अऊ ग्रामीण मन के जांच करथे। खेती-बाड़ी म आश्रित बैगा परिवार मन के जीवन यापन मुख्यतः पट्टा म मिले वनभूमि म खेती करके होथे। एखर अलावा गन्ना सीजन म मजदूरी करके ओमन अपन परिवार का भरण-पोषण करथे। लघु वनोपज के संग्रहण ह बैगा परिवार मन के अतिरिक्त आय के साधन हरे।

बिजली बिल म बड़का राहत: कोड़ातराई म दिखत हे असर

प्रधानमंत्री नरेंद्र मोदी कोती ले लागू करे गे प्रधानमंत्री सूर्यघर योजना ग्रामीण इलाका म लोगन मन के बिजली खर्च ल कम करे के दिशा म मील के पत्थर साबित होवत हे। रायगढ़ जिला के कोड़ातराई गांव म ए योजना ह कई परिवार ल राहत पहुंचाए हे, जेखर ले ओमन हर महीना हजारों रुपिया के बचत कर पात हे। प्रधानमंत्री सूर्यघर योजना न सिरिफ लोगन मन के बिजली के खरचा ल कम करत हे, भलकुन स्वच्छ ऊर्जा के उपयोग ल बढ़ावा देके पर्यावरण संरक्षण म घलो अपन योगदान देवत हे। रायगढ़ जिला के ए कोड़ातराई गांव म ए योजना के सफलता भविष्य म दूसर गांव मन बर अनुकरणीय होही।

गांव के रहवईया जयनारायण चौधरी अऊ राजेश कुमार चौधरी जईसन उपभोक्ता मन बर ए योजना कोनों वरदान ले कम नई हे। जयनारायण चौधरी ह बताईन कि पहिली उंखर बिजली बिल हर महीना 2000 ले 2500 रुपिया तक आ‌वत रिहिस, फेर जब ओमन प्रधानमंत्री सूर्यघर योजना के बारे म जानकारी पाईस त तुरते आवेदन कर दिन। एक महीना के भीतर उंखर घर म 3 किलोवाट के सौर संयंत्र स्थापित हो गे जेखर कुल लागत 1 लाख 90 हजार रुपिया रिहिस। उहें एमा 78 हजार रुपिया के अनुदान घलो मिल गे।

अईसने राजेश कुमार चौधरी ह घलो बिजली विभाग म संपर्क करिन अऊ आवेदन दिन अऊ एक ले डेढ़ हफ्ता के भीतर उंखर घर म 3 किलोवाट के सौर संयंत्र लग गे। ए संयंत्र ले हर माह 300 ले 350 यूनिट बिजली के उत्पादन होवत हे। एखर ले बिजली बिल कम हो गे हे। दूनों उपभोक्ता मन ए योजना के सराहना कर प्रधानमंत्री नरेंद्र मोदी ल धन्यवाद दे हे। बता देन कि प्रधानमंत्री सूर्यघर योजना के मुख्य उद्देश्य देश के नागरिक मन ल सस्ता अऊ स्थाई ऊर्जा प्रदान करना हे। ए योजना कोती ले जम्मो घरेलू विद्युत उपभोक्ता अपन घर के छत म 1, 2 या 3 किलोवाट तक के सौर संयंत्र लगा सकत हे। योजना के उठाए बर उपभोक्ता मन ल https://pmsuryaghar.gov.in म आवेदन करना होथे। उपभोक्ता मन ल संयंत्र के लागत के 90 प्रतिशत तक बैंक लोन न्यूनतम 7 प्रतिशत ब्याज दर म मिल सकथे।

रायगढ़ जिला म अब तक 833 उपभोक्ता मन योजना बर आवेदन करे हे जेमा ले 69 उपभोक्ता के घर म सौर संयंत्र स्थापित हो गे हे। रायगढ़ जिला के ग्राम कोड़ातराई ल आर्दश सौर ग्राम के रूप म घलो चयनित करे गे हे। इहां के 187 पात्र आवेदक में ले 46 उपभोक्ता ह आवेदन करे हे अब तक 4 उपभोक्ता के घर म संयंत्र घलो स्थापित करे जा चुके हे।

सौर सुजला बनिस किसनहा मन बर वरदान

आजादी के कई दशक बाद घलो परंपरागत बिजली ले वंचित रहवईया बलौदाबाजार जिला के बारनवापारा क्षेत्र के किसान मन बर छत्तीसगढ़ शासन कोती ले करे जात उदिम सौर सुजला योजना ह वरदान साबित होवत हे। मुख्यमंत्री विष्णु देव साथ के नेतृत्व म क्रेडा विभाग कोती ले अब तक बारनवापारा क्षेत्र म 1222 किसान मन के खेत म सौर सिंचाई पम्प स्थापित करे जा चुके हे। जेखर ले अब किसान बिना कोनों संसो के सिंचाई सुविधा के लाभ उठाके लाभकारी खेती करत हे।

सौर सुजला योजना के तहत बारनवापारा क्षेत्र म 2 हार्स पावर के 03, तीन हार्स पावर के 615 और 5 हार्स पावर के 604 सोलर पम्प स्थापित करे गे हे। ए योजना ओ किसान मन बर वरदान साबित होए हे जेखर खेत तक बिजली पहुंचे के सुविधा नई रिहिस या फेर उंखर तीर सिंचाई के दूसर संसाधन नई रिहिस। ग्राम डेबी के किसान नित्यानंद बताथे कि पहिली सिंचाई के सुविधा नई होए ले उंखर सालाना आमदनी सिरिफ 25 ले 30 हजार रुपिया के होत रिहिस फेर सोलर पम्प लग जाए ले अब ओमन धान के संगे-संग सब्जियां घलो उगा लेथे। जईसे आलू, टमाटर अऊ बरबटी जेन ल उगाके तीन ले चार गुना जादा के आय प्राप्त हो जात हे। अईसनहा बंशराम चौहान, बसंत कुमार कैवर्त्य, अमरू राम, धनीराम बिंझवार अऊ गौरी बाई दीवान के संगे-संग दूसर किसान मन के आमदनी घलो बाढ़ गे हे।

पहिली किसान नदी-नरवा ले डीजल पम्प के जरिए सिंचाई करत रिहिन, जेखर ले उंखर आय के एक बड़का हिस्सा ईंधन म खर्च हो जात रिहिस। फेर सौर सुजला योजना कोती ले मात्र 24,800 रुपिया म सोलर पम्प मिले ले अब उंखर समस्या के निदान हो गे हे। छत्तीसगढ़ शासन किसान मन ल बाजार मूल्य ले कम कीमत म सौर पम्प उपलब्ध करावत हे। तीन हार्स पावर के पम्प बर अनुसूचित जाति, जनजाति वर्ग के किसान मन ल सिरिफ 10,000 रुपिया, अन्य पिछड़ा वर्ग के किसान मन ल 15,000 रुपिया अऊ सामान्य वर्ग के किसान मन ल 21,000 रुपिया के अंशदान दे ल पड़थे। जबकि 5 हार्स पावर के पम्प बर अनुसूचित जाति अऊ जनजाति वर्ग के किसान मन ल 15,000 रुपिया, अन्य पिछड़ा वर्ग 20,000 रुपिया अऊ सामान्य वर्ग के कृषक मन ल 25,000 रुपिया के अंशदान दे ल पड़थे। बलौदाबाजार जिला म अब तक 5198 सौर पम्प लगाए जा चुके हे। सौर सुजला योजना के लाभ ले बर  कृषि विभाग, ग्रामीण कृषि विस्तार अधिकारी अऊ क्रेडा विभाग के माध्यम ले आवेदन करे जा सकत हे। सिंचाई बर नदी, नरवा, कुआं अऊ नलकूप प्राथमिकता ले चिन्हांकित करे जाथे। छत्तीसगढ़ शासन के ए योजना किसान मन बर कम लागत म सिंचाई के सुघ्घर अऊ स्थायी व्यवस्था हे।