सियासत के महा-कीर्तिमान: ‘नेहरू’ के बाद अब ‘मोदी’ के नवा इतिहास!

4398 दिन ले ‘निर्वाचित’ प्रधानमंत्री रहे के सबले बड़का रिकार्ड, जम्मो जुन्ना कीर्तिमान होही धवस्त

रिकार्ड त बनेच हे टूटे बर... सियासत अउ खेल के मैदान म एक बात एकदम एक जइसन होथे— रिकार्ड। सियान मन कहिथें न कि रिकार्ड त बनेच हावय टूटे बर। खेल के मैदान म कतकोन अइसन ऐतिहासिक कीर्तिमान बनिस जेन हा समे के धार म टूट गे अउ ओखर जगा नवा रिकार्ड बन गे। हालाकि कुछ रिकार्ड अइसन घलो होथें जेन हा बरसों बरस तक अपन जगा म अडिग रइथें, फेर समे के चक्का जब घूमे बर धरथे, त बड़े-बड़े कीर्तिमान घलो धरासायी हो जाथें। अइसनेच एक ऐतिहासिक रिकार्ड हमर देस के सबले लोकप्रिय जननेता अउ प्रधानमंत्री नरेन्द्र मोदी हा 10 जून के तोड़ दिही।  

प्रधानमंत्री रहे के एक नवा अउ बड़का रिकार्ड अपन नाम करे ले ये हा भारत के लोकतांत्रिक इतिहास म एक अइसन मील के पत्थर आय, जेला लांघना कोनो भी नेता बर बड़ चुनौती के काम होही।

पंडित नेहरू के उज्जर रिकार्ड अउ ओखर असल गनित

हमर अजाद भारत के इतिहास ला खंगाल के देखन त अब तक ले देस म कुल 15 ठन परधानमंत्री होय हें। एमा सबले लंबा समे तक निर्वाचित प्रधानमंत्री रहे के जुन्ना कीर्तिमान पंडित जवाहर लाल नेहरू के नाम म दर्ज रिहीस। उमन अजादी के दिन 15 अगस्त 1947 ले लेके 27 मई 1964 तक प्रधानमंत्री के रूप म देस के बागडोर ला संभालिन। ये कार्यकाल करीब-करीब 17 बछर के रिहीस। फेर इहां एक ठन तकनीकी गनित ला समझे के जरूरत हे।

पंडित नेहरू हा 15 अगस्त 1947 के प्रधानमंत्री त बन गे रिहिन, फेर वो बेरा उमन पहिली लोकसभा चुनई होय तक ‘अंतरिम सरकार’ के मुखिया रिहिन, न कि जनता ले सीधे निर्वाचित प्रधानमंत्री। पंडित नेहरू हा 13 मई 1952 के पहिली बार भारत के निर्वाचित प्रधानमंत्री पद के शपथ लीन। वोहा 27 मई 1964 (अपन देहावसान) तक ये दायित्व ला निभाइन।

अगर हमन सिरिफ ‘निर्वाचित’ कार्यकाल के बात करन, त नेहरू जी हा करीब-करीब तीन कार्यकाल ले जादा समे, माने कुल 4 हजार 397 दिन तक परधानमंत्री बनके देस के सेवा करिन। अउ अगर उंकर पूरा कार्यकाल (अंतरिम सरकार ला मिला के) ला जोड़े जाय, त ये हा 6,130 दिन के होथे। एमा वो 1733 दिन घलो सामिल हे जेमा वोहा बिना चुनई जिते (गैर निर्वाचित) सरकार के मुखिया रिहिन।

नरेन्द्र मोदी के 4 हजार 398 दिन: एक नवा इतिहास के सिरजन

अब बात करथन आज के बेरा के। 9 जून 2026 के दिन  प्रधानमंत्री नरेन्द्र मोदी हा पंडित नेहरू के ये बड़का रिकार्ड के बरोबरी कर लिही। 9 जून के मोदी सरकार के तीसर कार्यकाल के दू बछर 15 दिन पूरा होही। एखर संगे-संग उंकर निर्वाचित  प्रधानमंत्री रहे के आंकड़ा घलो 4397 दिन के हो जाही। 10 जून के पीएम मोदी के कार्यकाल के 4 हजार 398 दिन पूरा हो गे अऊ उंथक नाम रिकार्ड बनही। एखर मतलब ये हे कि पीएम मोदी भारत के इतिहास म सबले लंबा समे तक निर्वाचित  प्रधानमंत्री के खिताब हासिल करइया देस के पहिली नेता बन जाही। ये दिन न सिरिफ बीजेपी बर, भलकुन जम्मो देस के लोकतांत्रिक पन्ना म सुवर्न अक्षर म दर्ज होही। 

गैर कांग्रेसी प्रधानमंत्री के जुन्ना रिकार्ड पहिली ले धवस्त

नरेन्द्र मोदी के नाम सिरिफ इही एक रिकार्ड नइ हे। उमन सबले लंबा समे तक ‘गैर कांग्रेसी’  प्रधानमंत्री बने रहे के रिकार्ड ला त पहिली ले ही धवस्त कर चुके हें। देस के सियासत म एक अइसन बेरा रिहीस जब कांग्रेस के अलावा कोनो दूसर पार्टी के नेता के लंबा समे तक प्रधानमंत्री बने रहना एक सपना जइसन लागत रिहीस। फेर मोदी हा ये भ्रम ला टोर दीन। उमन एक अइसन गैर कांग्रेसी  प्रधानमंत्री हें जेन हा सरलग तीन बार लोकसभा चुनई जीत के सरकार बनाए हें। एखर ले पहिली ये रिकार्ड भारतीय जनता पार्टी के ही कद्दावर नेता अउ पूर्व  प्रधानमंत्री भारत रत्न अटल बिहारी वाजपेयी जी के नाम म रिहीस। वाजपेयी जी हा 2272 दिन तक देस के  प्रधानमंत्री रहे रिहिन। मोदी जी हा ये आंकड़ा ला कतकोन बछर पहिली पार कर चुके हें।

9 हजार दिन के एक अउ झन्नाटेदार रिकार्ड

प्रधानमंत्री मोदी के नाम एक अउ अइसन महा-रिकार्ड दर्ज हे, जेला सुन के बड़-बड़ राजनीतिक विस्लेसक मन के आंखी फटे के फटे रहि जाथे। ये रिकार्ड आय- कोनो भी चुने हुए (निर्वाचित) सरकार के मुखिया के तौर म सरलग काम करे के। 

एला अइसे समझव: नरेन्द्र मोदी हा 7 अक्टूबर 2001 के गुजरात के मुख्यमंत्री के रूप म पहिली बार सपथ ले रिहिन। ओखर बाद ले ओमन सरलग 22 मई 2014 तक गुजरात के मुख्यमंत्री बन के राज करिन। फेर 26 मई 2014 के ओमन भारत के  प्रधानमंत्री पद के सपथ लीन अउ आज (जून 2026) तक सरलग ओ पद म बइठे हें।

अगर हमन उंकर मुख्यमंत्री अउ परधानमंत्री- दूनों कार्यकाल ला मिला देन, त मोदी हा चुने हुए सरकार मन के प्रमुख के तौर म 9 हजार ले जादा दिन पूरा कर चुके हें। भारत के राजनीतिक इतिहास म अइसन रिकार्ड कोनो दूसर नेता के नाम म नइ हे। एकर ले ये पता चलथे कि जनता के बीच उंकर लोकप्रियता कतका गहरा हे अउ लोकतंत्र म मनखे मन उंकर ऊपर कतका भरोसा करथें।

भारत के  प्रधानमंत्री मन के सुची (1947 ले आज तक)

हमर अजाद भारत के विकास जात्रा म जेन-जेन नेता मन हा परधानमंत्री के कुरसी म बइठ के देस ला रद्दा दिखाए हें, उंकर सुची कुछ ये किसम ले हे:

1. पंडित जवाहरलाल नेहरू (15 अगस्त 1947 – 27 मई 1964)
2. गुलजारीलाल नंदा (कार्यवाहक) (27 मई 1964 – 9 जून 1964) अउ (11 जनवरी 1966 – 24 जनवरी 1966)
3. लाल बहादुर शास्त्री (9 जून 1964 – 11 जनवरी 1966)
4. इंदिरा गांधी (24 जनवरी 1966 – 24 मार्च 1977) अउ (14 जनवरी 1980 – 31 अक्टूबर 1984)
5. मोरारजी देसाई (24 मार्च 1977 – 28 जुलाई 1979)
6. चौधरी चरण सिंह (28 जुलाई 1979 – 14 जनवरी 1980)
7. राजीव गांधी (31 अक्टूबर 1984 – 2 दिसंबर 1989)
8. विश्वनाथ प्रताप सिंह (2 दिसंबर 1989 – 10 नवंबर 1990)
9. चंद्रशेखर (10 नवंबर 1990 – 21 जून 1991)
10. पी. वी. नरसिम्हा राव (21 जून 1991 – 16 मई 1996)
11. अटल बिहारी वाजपेयी (16 मई 1996 – 1 जून 1996) अउ (19 मार्च 1998 – 22 मई 2004)
12. एच. डी. देवेगौड़ा (1 जून 1996 – 21 अप्रैल 1997)
13. इंद्र कुमार गुजराल (21 अप्रैल 1997 – 19 मार्च 1998)
14. डॉ. मनमोहन सिंह (22 मई 2004 – 26 मई 2014)
15. नरेंद्र मोदी (26 मई 2014 – वर्तमान)

आखिरी गोठ: 

सियासत म दिन, बछर अउ आंकड़ा सिरिफ कागज के पन्ना नइ आय, ये हा वो भरोसा आय जेला देस के करोड़ों जनता हा अपन नेता ऊपर जताथे। 10 जून के ये नवा कीर्तिमान सिरिफ एक ठन रिकार्ड भर नइ रहि जाही, भलुक ये हा भारत के मजबूत लोकतंत्र अउ जनता के अटूट विस्वास के एक सुघ्घर मिसाल बनके इतिहास म दर्ज हो जाही।