- मेहनत, भरोसा अउ सरकार के साथ ले मिलिस ऐतिहासिक सफलता
रायपुर. छत्तीसगढ़ राज्य ह सबला बरोबर मौका अउ समाज मा जम्मो वर्ग ला जोड़े के दिशा मा एक बड़े उपलब्धि हासिल करे हवय। राज्य के 8 ट्रांसजेंडर उम्मीदवार के चयन पुलिस आरक्षक के पद मा होय हवय। ए सफलता साल 2024 के भर्ती अउ 2025 मा होय शारीरिक अउ लिखित परीक्षा मा बढ़िया प्रदर्शन के सेती मिलीस हे।
चयनित उम्मीदवार मा भूमि मानिकपुरी, खुशी ध्रुव, संजना ध्रुव, रानू यादव, पवित्रा चंद्रवंशी, लक्ष्मी साहू, अप्सरा जायसवाल अउ सुभी यादव सामिल हवें। ए मन रायपुर, बेमेतरा, जांजगीर-चांपा अउ कांकेर जइसन अलग-अलग जिला के रहने वाला हंवय। समाज के चुनौती, तिरस्कार अउ कतकोन निजी दुख-पीरा सहे के बाद घलो, ए मन अपन मेहनत अउ भरोसा के दम मा ए मुकाम ला पाइन हें।
ए सफलता सिरिफ़ नौकरी पाय तक सीमित नई हे, बल्कि समाज मा ट्रांसजेंडर समुदाय के इज्जत अउ स्वीकार्यता के एक बड़े संदेस घलो ए। पुलिस विभाग जइसन जिम्मेदारी वाले जगह मा ओमन के भर्ती ले राज्य मा ‘सबो बर बरोबर न्याय’ वाला व्यवस्था अउ मजबूत होही।
ए सफलता मा समाज कल्याण विभाग, छत्तीसगढ़ सरकार के बड़े हाथ रिहिस। विभाग डहार ले ए उम्मीदवार ला ट्रेनिंग, आय-जाय के सुविधा अउ दूसर जरूरी मदद दीस, जेकर ले ओमन ला भर्ती के तैयारी करे मा संसो नई होइस।
मुख्यमंत्री विष्णुदेव साय के अगुवाई मा राज्य सरकार समाज के हर वर्ग ला मुख्यधारा ले जोड़े बर लगातार काम करत हवय। ट्रांसजेंडर समाज ला शिक्षा, कौशल विकास, रोजगार अउ मान-सम्मान दे के दिशा मा ए चयन ला एक बड़े कदम माने जात हे।
ए ऐतिहासिक जीत आने वाला बखत मा कतकोन ट्रांसजेंडर युवा बर प्रेरणा बनही अउ ए संदेस देही कि अगर हुनर, मेहनत अउ सही मौका मिल जाय, त कोई घलो सपना अधूरा नई रहय।
