किसान मन के बहुते दिन के मांग होइस पूरा, बेरा अउ गाड़ी-भाड़ा के होही बचत
रायपुर। महिला अउ बाल विकास मंत्री लक्ष्मी राजवाड़े के बिसेस कोसिस ले भटगांव विधानसभा क्षेत्र के किसान मन ला बड़का सौगात मिले हे। सूरजपुर जिला के भैयाथान विकासखंड के गांव बुंदिया अउ बड़सरा म नवा धान उपार्जन केंद्र खोले के प्रशासनिक मंजूरी दे दे गे हे। खाद्य, नागरिक आपूर्ति अउ उपभोक्ता संरक्षण विभाग, छत्तीसगढ़ सरकार कोति ले ए संबंध म विधिवत आदेश जारी कर दे गे हे।
क्षेत्र के किसान मन कोति ले बहुते दिन ले नवा धान उपार्जन केंद्र खोले के मांग करे जावत रहिस। भटगांव विधानसभा क्षेत्र के घूमइ के बेरा म गांव के लोगन अउ किसान मन ह मंत्री लक्ष्मी राजवाड़े ला अपन समसया के बारे म बताए रहिन। किसान मन ह बताए रहिन कि अभी दूरिहा बने उपार्जन केंद्र मन तक धान ला ले जाय म ओ मन ला जादा बेरा अउ गाड़ी-भाड़ा के खरचा भुगते ला पड़थे।
किसान मन के समसया ला गंभीरता ले लेवत मंत्री लक्ष्मी राजवाड़े ह खाद्य, नागरिक आपूर्ति अउ उपभोक्ता संरक्षण मंत्री दयाल दास बघेल ला चिट्ठी लिख के बुंदिया अउ बड़सरा म नवा धान उपार्जन केंद्र मन के मंजूरी दे के बिनती करे रहिन। मंत्री के कोसिस के नतीजा म सरकार कोति ले खरीफ विपणन बछर 2026-27 अउ आवइया बछर मन बर दूनों केंद्र मन के स्थापना ला मंजूरी दे दे गे हे।
ग्राम बुंदिया म आदिम जाति सेवा सहकारी समिति मर्यादित बतरा के अंतर्गत अउ ग्राम बड़सरा म आदिम जाति सेवा सहकारी समिति मर्यादित शिवप्रसादनगर के अंतर्गत नवा धान उपार्जन केंद्र बनाए जाही।
किसान मन ला मिलही बड़का राहत
नवा धान उपार्जन केंद्र मन के सुरू होय ले किसान मन ला अपन उपज बेचे बर दूरिहा-दूरिहा के केंद्र मन तक जाय के जरूरत नइ पड़ही। एकर ले गाड़ी, ट्रैक्टर भाड़ा अउ दूसर खरचा म कमी आवही अउ किसान मन के बेरा अउ मेहतन के बचत होही। तिर म ही धान के जोखइ अउ खरीदी के सुविधा मिले ले खरीदी के काम ह अउ सुघर अउ आसान हो जाही।
नवा धान उपार्जन केंद्र मन के मंजूरी मिले ले क्षेत्र के किसान अउ गांव के लोगन मन म खुसी के माहौल हे। किसान मन ह मंत्री लक्ष्मी राजवाड़े के आभार जतावत कहिन कि तिर म ही धान खरीदी केंद्र मिले ले ओ मन ला अपन धान बेचे म बड़का राहत मिलही। ओ मन ए फैसला ला क्षेत्र के किसान मन के हित म बड़का कदम बताइन।
