पर्यटन बोर्ड के घूमइया मन ले अरज—फर्जी वेबसाइट, बुकिंग लिंक, मोबाइल नंबर अउ सोशल मीडिया ले रहव होसियार
रायपुर। छत्तीसगढ़ के पर्यटन ठाँव अउ पर्यटन सुबिधा मन के बुकिंग के नाव मा ठगी अउ फर्जीवाड़ा के शिकायत ला देखत हुए छत्तीसगढ़ पर्यटन बोर्ड ह घूमइया मन ला सतर्क रहे के अरज करे हे। बोर्ड ला अइसन अनधिकृत वेबसाइट अउ माध्यम मन के जानकारी मिले हे, जोन छत्तीसगढ़ पर्यटन के नाव मा फर्जी बुकिंग सुबिधा देवे के दावा करत हें। अइसन माध्यम मन के जरिए घूमइया मन ले ऑनलाइन पइसा लेके ठगी करे के असंका हे।
छत्तीसगढ़ पर्यटन बोर्ड ह साफ कहे हे कि पर्यटक मन पर्यटन ठाँव, रहे के सुबिधा अउ आन पर्यटन सेवा मन के बुकिंग बर सलीफ छत्तीसगढ़ पर्यटन के आधिकारिक वेबसाइट tourism.cgstate.gov.in के ही उपयोग करव। काकरो आन वेबसाइट, अनधिकृत बुकिंग लिंक, संका वाले मोबाइल नंबर, बिज्ञापन या सोशल मीडिया के अइसन पेज मा भरोसा मत करव, जोन छत्तीसगढ़ पर्यटन के बुकिंग देवे के दावा करत होवयं।
बोर्ड के मुताबिक, साइबर ठगी करे वाले मन छत्तीसगढ़ पर्यटन के नाव, चिनहा (लोगो), पर्यटन ठाँव मन के फोटो अउ आन प्रचार सामग्री के गलत उपयोग करके घूमइया मन ला भरमा सकत हें। अइसन लोगन कम पइसा मा कमरा, पर्यटन आवास, घूमे के पैकेज या आन सुबिधा मन के बुकिंग के झांसा देके ऑनलाइन पइसा लेवे के कोसिस कर सकत हें। एही पाय के कान्हो भी किसम के पइसा देवे ले पहिली संबंधित वेबसाइट अउ बुकिंग प्रक्रिया के सही-गलत के जाँच करना जरूरी हे।
पर्यटन बोर्ड ह घूमइया मन ले बिनती करे हे कि बुकिंग बर सलीफ अधिकृत पर्यटन तरीका के पालन करव अउ पइसा के भुगतान घलो ओही अधिकृत तरीका ले करव। काकरो निजी खाता, संका वाले भुगतान माध्यम या अनजान मोबाइल नंबर मा पइसा भेजे ले बचव। खास करके कम पइसा मा बुकिंग, तुरंत पइसा देवे के दबाब या सुग्घर पर्यटन पैकेज के न्योता मिले मा जादा होसियार रहव।
आधिकारिक माध्यम ले ही करव बुकिंग
घूमइया मन छत्तीसगढ़ पर्यटन के आधिकारिक वेबसाइट tourism.cgstate.gov.in के माध्यम ले ही बुकिंग करव। पर्यटन संबंधी जानकारी अउ बुकिंग बर छत्तीसगढ़ टूरिज्म बोर्ड के गढ़ कलेवा, रायपुर मा स्थित सुचना केंद्र अउ छत्तीसगढ़ के अलग-अलग जिला मा स्थित सुचना केंद्र मन ले घलो संपर्क करे जा सकत हे। ए अधिकृत केंद्र मन के माध्यम ले घूमइया मन ला पर्यटन संबंधी जानकारी के संग मा सुबिधा के हिसाब ले पर्यटन आवास मन के बुकिंग के सुबिधा घलो मिल सकत हे।
संका होए मा हेल्पलाइन ले करव पक्का
घूमइया मन ला कान्हो वेबसाइट, बुकिंग लिंक, मोबाइल नंबर या सोशल मीडिया के पेज के सही-गलत ला लेके संका होए मा पइसा देवे ले पहिली छत्तीसगढ़ पर्यटन बोर्ड के हेल्पलाइन ले जानकारी लेवे के सलाह दिए गए हे।
छत्तीसगढ़ पर्यटन हेल्पलाइन नंबर:
+91-7714224600
18001026415
बोर्ड ह घूमइया मन ले अरज करे हे कि ओमन जात्रा के योजना बनावत बेरा सलीफ अधिकृत अउ पक्का जरिया ले ही जानकारी लेवयं। फर्जी वेबसाइट मन, संका वाले बुकिंग न्योता अउ अनधिकृत पइसा देवे के माध्यम ले होसियार रहिके घूमइया मन अपन जात्रा ला सुरछित अउ सुबिधाजनक बना सकत हें।
