कंवर समाज के नवा चुने गय पदाधिकारी मन के सुगूँव (शपथ) ग्रहण अऊ रूख-राई लगाए के कारक्रम, सामुदायिक भवन मन बर 1.55 करोड़ ले जादा के सौगात
रायपुर, मुख्यमंत्री बिष्णु देव साय ह कहिन कि पढ़ाई समाज के बिकास के मूल मंतर ए। कउनो घलो समाज के आगू बढ़ाव ओकर अवइया पीढ़ी ल मिलइया पढ़ाई, संसकार अऊ मौका मन म अधारित रहिथे। समाज के कउनो घलो लइका पढ़ाई ले वंचित जनि रहय अऊ हर एक गुणी/प्रतिभाशाली पढ़इया ल आगू बढ़े के मौका मिलय, ए हा समाज के हर एक मनखे के मिले-जुले जबावदारी ए।
मुख्यमंत्री साय ह सनिवार ल राजधानी रायपुर म बने इंदिरा गांधी कृषि विश्वविद्यालय के कृषक सभागार म आयोजित छत्तीसगढ़ प्रदेश कंवर समाज विकास समिति के प्रदेश अध्यक्ष संग नवा चुने गय पदाधिकारी मन के सुगूँव (शपथ) ग्रहण अऊ रूख-राई लगाए के कारक्रम ल संबोधित करत रीहिन।
नवा चुने गय पदाधिकारी मन ल दिलाइन सुगूँव (शपथ)
मुख्यमंत्री ह नवा चुने गय पदाधिकारी मन ल सामाजिक सेवा, संगठन ल मजबूत करे अऊ अपन जबावदारी मन ल निष्ठा के संग निभाए के सुगूँव दिलाइन। ओमन पदाधिकारी मन ल बधाई देवत कहिन कि समाज द्वारा दे गय जबावदारी सिरिफ पद नइ ए, भलुक समाज के सेवा करे अऊ ओला आगू बढ़ाए के मौका ए।
ओमन कहिन कि कंवर समाज के पदाधिकारी मन के चुनाव बिना कउनो बिरोध अऊ सबो के सहमति ले होना समाज के एकता अऊ संगठन के मजबूती के परमान ए। इही एकजुटता समाज के सबले बड़ ताकत ए, जेला अवइया पीढ़ी मन तक अऊ मजबूत बना के पहुँचाए ल परही।
मुख्यमंत्री ह संत गहिरा गुरु संग समाज के पुरोधिया मन ल सुरता करत कहिन कि ओमन पढ़ाई, संसकार, सेवा अऊ सामाजिक एकता के रद्दा देखाइन। नवा पीढ़ी के उज्जर अवइया दिन बर समाज ल इही रद्दा म आगू बढ़त सबो ल मिलके कोसिस करे ल परही।
पढ़ाई ल सबले पहिली प्राथमिकता दे के आह्वान
मुख्यमंत्री ह समाज के सियान अऊ पढ़े-लिखे लोगन मन ले पढ़ाई ल सबले पहिली प्राथमिकता दे के बिंनती करिन। ओमन कहिन कि पढ़ाई के उदेस सिरिफ सरकारी नौकरी पाना नइ ए। पढ़ाई ह मनखे ल उद्यमी, व्यापारी, समाजसेवी, जनप्रतिनिधि, उद्योगपति अऊ जिम्मेदार नागरिक बनाए बर लायक बनाथे।
ओमन बताइन कि राज सरकार लइका अऊ युवा मन ल बढ़िया पढ़ाई अऊ प्रतियोगी परिक्छा मन के तैयारी बर अउ सुग्घर मौका देवत हे। प्रदेश म 17 ठन ‘प्रयास विद्यालय’ चलत हवयं। ओमन समाज के सक्षम लोगन मन ले जरूरतमंद परिवार के लइका मन के पढ़ाई म मदद करे अऊ होनहार पढ़इया मन ल बढ़ावा दे के आह्वान करिन।
जनजातीय बिकास बर सरकार हाबय तैयार
मुख्यमंत्री ह कहिन कि प्रधानमंत्री नरेंद्र मोदी के अगवाई म जनजातीय क्षेत्र मन म जरूरी सुबिधा मन के बिस्तार अऊ जनजातीय परिवार मन के रहे-सहे के तरीका ल सुधारे बर लगातार काम करे जावत हे। धरती आबा जनजातीय ग्राम उत्कर्ष अभियान के तहत छत्तीसगढ़ के 6,661 गांव मन ल सामिल करे गे हे।
ओमन कहिन कि प्रधानमंत्री जनमन योजना के माध्यम ले खास पिछड़ी जनजाति मन तक रद्दा, मकान, बिजली, राशन कार्ड अऊ नल-जल जइसे मूलभूत सुबिधा मन पहुँचाए जावत हे। ओमन बताइन कि पीएम जनमन के तहत देस भर म बनत लगभग 4 हजार किलोमीटर रद्दा मन म ले 2 हजार किलोमीटर ले जादा रद्दा छत्तीसगढ़ म बनत हे। खास पिछड़ी जनजाति मन ल सेहत सुबिधा दिए बर 57 ठन एंबुलेंस के ब्यवस्था करे गे हे।
बस्तर म बिकास के रफ्तार तेज
मुख्यमंत्री ह कहिन कि नक्सलवाद के कारन अब्बड़ दिन तक बिकास ले पाछू रहे बस्तर म अब बिकास के नवा उजाला दिखत हे। सुरछा बल मन के हिम्मत अऊ केंद्र अऊ राज सरकार के कोसिस ले नक्सलवाद ल खतम करे के दिसा म बड़ सफलता मिले हे।
ओमन कहिन कि जे क्षेत्र मन म कभू बिकास काम बड़ कठिन रीहिस, उहाँ अब रद्दा, बिजली, पानी, पढ़ाई, सेहत अऊ संचार जइसे सुबिधा मन तेजी ले पहुँचत हवयं। ‘नियद नेल्लानार’ योजना के माध्यम ले ढाई बछर म 500 ले जादा गांव मन तक बुनियादी सुबिधा मन के बिस्तार करे गे हे।
मुख्यमंत्री के मुताबिक बस्तर म बड़े पैमाने म चलाए गे सेहत अभियान के तहत 34 लाख लोगन मन के सेहत के जाँच करे गीस अऊ गंभीर या अब्बड़ दिन ले बेमार 40 हजार ले जादा लोगन मन ल बढ़िया इलाज बर बड़े अस्पताल रेफर करे गीस। सांति अऊ बिस्वास के माहौल के संग बस्तर म युवा मन बर पढ़ाई, रोजगार, स्वरोजगार अऊ उद्यमिता के नवा-नवा मौका घलो खुलत हवयं।
सरकार के योजना मन के करिन गोठ-बात
मुख्यमंत्री ह राज सरकार के अलग-अलग जनकल्याणकारी योजना मन के गोठ पात कहिन कि सरकार ह प्रधानमंत्री नरेंद्र मोदी के गारंटी के तहत करे गय बादा मन ल पूरा करे बर तेजी ले काम करे हे।
ओमन बताइन कि सरकार बने के दूसरेच दिन 18 लाख प्रधानमंत्री आवास मन के मंजूरी दिए गीस अऊ प्रदेश म रोज के लगभग 1,600 मकान बनाए जावत हे। किसान मन ले 3,100 रुपिया प्रति क्विंटल के हिसाब ले अऊ प्रति एकड़ 21 क्विंटल तक धान के खरीदी करे जावत हे।
ओमन कहिन कि महतारी वंदन योजना के तहत लगभग 70 लाख दाई-बहिन मन ल हर महिना एक हजार रुपिया के आर्थिक मदद दिए जावत हे। उही कोती तेन्दूपत्ता बिनावइया मन के मजदूरी ल 4 हजार रुपिया ले बढ़ा के 5,500 रुपिया प्रति मानक बोरा कर दिए गे हे।
प्राकृतिक संसाधन मन ले बिकास ल मिलही ताकत
मुख्यमंत्री ह कहिन कि छत्तीसगढ़ खनिज, बन अऊ प्राकृतिक संसाधन मन ले भरे-पूरे राज ए। प्रदेश म लोहा (आयरन ओर), कोयला, बॉक्साइट, लिथियम, टिन, सोना अऊ हीरा जइसे खनिज हवयं। बस्तर के बन उपज के वैल्यू एडिशन म खास जोर दिए जावत हे, जेखर ले स्थानीय लोगन मन के कमाई बढ़े के संग-संग रोजगार के नवा मौका पैदा हो सके।
ओमन बताइन कि किसान मन के खेत मन तक पानी पहुँचाए बर पाछू ढाई बछर म 11 हजार करोड़ रुपिया ले जादा के नवा सिंचाई योजना मन ल मंजूरी दिए गे हे।
कंवर समाज के सामुदायिक भवन मन बर 1.55 करोड़ ले जादा
कारक्रम म मुख्यमंत्री साय ह कंवर समाज के अलग-अलग सामुदायिक भवन मन के निरमान, बिकास अऊ जीर्णोद्धार बर 1 करोड़ 55 लाख रुपिया ले जादा के रासि दे के घोषणा करिन।
घोसित रासि म रायपुर के लाभांडी म बनत कंवर भवन के बिकास अऊ जरूरी काम मन बर 70 लाख रुपिया, राजनांदगांव के छुरिया परिक्षेत्र म कंवर समाज भवन बर 25 लाख रुपिया, कंवर पैंकरा समाज सर्कल तमोरा म सामुदायिक शेड बर 10 लाख रुपिया, ग्राम खैरझिटी म आदिवासी कंवर (पैंकरा) समाज भवन बर 10 लाख रुपिया सामिल हे।
एखर अलावा महासमुंद जिला के पथरी परिक्षेत्र के ग्राम नरतोरा म सामाजिक भवन बर 10 लाख रुपिया, ग्राम झलप म सामाजिक भवन के निरमान अऊ जीर्णोद्धार बर 20 लाख रुपिया अऊ गरियाबंद जिला के ग्राम जोजरा म कंवर समाज भवन निरमान बर 10 लाख रुपिया के घोषणा करे गीस।
‘एक पेड़ माँ के नाम’ अभियान के तहत करिन रूख-राई रोपन
कारक्रम के बेरा म मुख्यमंत्री बिष्णु देव साय ह लाभांडी म बनत कंवर समाज के सामुदायिक भवन अंगना म ‘एक पेड़ माँ के नाम’ अभियान के तहत सिंदूर के पौधा लगाइन। समाज के नवा चुने गय पदाधिकारी मन, सियान सगा-जन अऊ पढ़े-लिखे लोगन मन घलो रूख-राई लगाइन अऊ पर्यावरण सुरछा के सँदेस दिइन।
पढ़ाई अऊ संगठन ल आगू बढ़ाए म जोर
कारक्रम के अधियछता करत पूर्व राज्यसभा सांसद नंदकुमार साय ह कहिन कि कंवर समाज छत्तीसगढ़ के जनजातीय समाज ब्यवस्था के महतवपूर्ण हिस्सा ए। ओमन पढ़ाई ल समाज अऊ प्रदेश के बिकास के आधार बतावत लइका मन ल पढ़ाए-लिखाए बर सबो ल मिलके कोसिस करे के बात कहिन।
कंवर समाज बिकास समिति के अध्यक्ष हरवंश सिंह मिरी ह नवा चुने गय पदाधिकारी मन ल बधाई देवत कहिन कि पद के संग समाज के एकता, सेवा, पढ़ाई, संसकार अऊ बिकास के बड़ जबावदारी जुड़े हे। ओमन कहिन कि बनत कंवर भवन अवइया दिन म समाज के पढ़ाई, सामाजिक, सांस्कृतिक अऊ संगठनात्मक बिकास के महतवपूर्ण केंद्र बनही।
ए बेरा म पूर्व मंत्री ननकीराम कंवर, महासचिव शिव कुमार कंवर, कार्यकारी अध्यक्ष थान सिंह दीवान, महिला प्रभाग के अध्यक्ष सविता साय, कोषाध्यक्ष प्रेम सिंह कंवर, आर.के. साय, भीम सिंह कंवर संग समाज के सियान मन, पदाधिकारी अऊ अब्बड़ संख्या म समाज के लोगन मन मौजूद रीहिन।
