पढ़ाई-लिखाई, सेहत अऊ अधोसंरचना ले जुड़े बुता बर 9.03 करोड़ रुपिया के प्रशासनिक स्वीकृति
धरमजयगढ़ के डाइट म छात्रावास, सम्मेलन कक्ष संग विभिन्न निरमान बुता बर 8.73 करोड़ रुपिया मंजूर
रायपुर, मुख्यमंत्री बिष्णु देव साय के अगवाई म राज सरकार द्वारा खदान प्रभावित क्षेत्र म स्थानीय जरूरत के मुताबिक बिकास बुता ल पहिली प्राथमिकता दिए जावत हे। इही लघार म बित्त मंत्री अऊ रायगढ़ बिधायक ओ.पी. चौधरी के कोसिस ले रायगढ़ जिला म जिला खनिज संस्थान न्यास (डीएमएफ) मद ले पढ़ाई-लिखाई, सेहत अऊ अधोसंरचना ले जुड़े अलग-अलग बुता बर 9 करोड़ 3 लाख 66 हजार 149 रुपिया के प्रशासनिक स्वीकृति दिए गे हे। कलेक्टर मयंक चतुर्वेदी के मार्गदर्शन म ए बुता ल स्वीकृति दिए गे हे।
‘डाइट धरमजयगढ़ के अधोसंरचना होही मजबूत’
डीएमएफ मद ले जिला शिक्षा अऊ प्रशिक्षण संस्थान (डाइट), धरमजयगढ़ म अलग-अलग निरमान अऊ बिकास बुता बर 8 करोड़ 73 लाख रुपिया मंजूर करे गे हे। ए रासि ले पुरुस अऊ महिला छात्रावास भवन, सम्मेलन कक्ष, शौचालय खंड संग जुन्ना भवन के मरम्मत अऊ जीर्णोद्धार के बुता कराए जाही। ए सुबिधा के बने ले संस्थान के अधोसंरचना ल मजबूती मिलही अऊ प्रशिक्षण ले जुड़े बुता ल चलाए बर अउ बढ़िया सुबिधा मिलही।
कुडुमकेला हाईस्कूल म बनही प्रार्थना शेड
घरघोड़ा बिकासखंड के ग्राम पंचायत कुडुमकेला म बने हाईस्कूल म लइका मन के सामूहिक बुता अऊ प्रार्थना कारक्रम बर 5 लाख रुपिया के लागत ले प्रार्थना शेड के निरमान करे जाही। एखर बर डीएमएफ मद ले प्रशासनिक स्वीकृति दिए गे हे।
पीएचसी छाल ल मिलही बीएलएस एम्बुलेंस के सुबिधा
गांव-घर म सेहत सुबिधा ल अउ मजबूत करे के दिसा म प्राथमिक स्वास्थ्य केंद्र छाल बर एक ठन बीएलएस एम्बुलेंस बिसाए बर 25 लाख 66 हजार 149 रुपिया मंजूर करे गे हे। एम्बुलेंस के मिले ले आपातकालीन बेरा म मरीज मन ल समे म बड़े अस्पताल तक पहुँचाए म मदद मिलही अऊ गांव क्षेत्र के सेहत सुबिधा ल मजबूती मिलही।
डीएमएफ मद ले मंजूर ए बुता ले खदान प्रभावित क्षेत्र म पढ़ाई, सेहत अऊ जरूरी अधोसंरचना के बिस्तार होही। स्थानीय जरूरत ल ध्यान म रखके करे जावत ए बिकास बुता ले क्षेत्र के पूरा अऊ संतुलित बिकास ल नवा गति मिले के आस हे।
