- वीबी जीरामजी योजना के तहत छत्तीसगढ़ म देहाती (ग्रामीण) मजूरा मन के मजूरी दर 261 ले बढ़के होइस 300 रूपिया रोज
- मजूरी दर म होइस 13 प्रतिसत के बढ़ती
रायपुर, वीबी जी राम जी के लागू होय के पहिलीच दिन मजूरा (श्रमिक) मन ला बड़े सौगात मिले हे। जिहां भारत सरकार डाहर ले ‘विकसित भारत–रोजगार एवं आजीविका गारंटी मिशन (ग्रामीण)’ के तहत अकुसल मजूरा मन बर नवा मजूरी दर तय करे गिस हे। ए नवा दर ह 1 जुलाई 2026 ले लागू हो गे हे।
नवा ब्यवस्था के तहत छत्तीसगढ़ म देहाती मजूरा मन के मजूरी दर ला 261 रूपिया रोज ले बढ़ाके 300 रूपिया रोज कर दिये गिस हे। एखर तहत मजूरी दर म 13 प्रतिसत के बढ़ती होय हे, जो पहिली कभू नहीं होय रीहिस। एखर से देहाती इलाका म काम करइया मजूरा मन ला अरथिक लाभ मिलही अउ गांव के गुजारा (आजीविका) ला अउ मजबूती मिलही।
भारत सरकार के ग्रामीण विकास मंत्रालय डाहर ले जारी करे गे सूचना (अधिसूचना) म छत्तीसगढ़ के साथे-सांथे आन राज्य मन बर घलो सुधारे गे मजूरी दर तय करे गिस हे। सूचना के मुताबिक छत्तीसगढ़ बर अकुसल हाथ के काम (हस्त कार्य) बर मजूरी दर 300 रूपिया रोज तय करे गिस हे। राज्य सरकार डाहर ले वीबी जी राम जी योजना ला सही तरीका से चलाय बर अउ देहाती परिवार मन ला काम देववाय बर जम्मो तैयारी कर ले गिस हे।
आज ले वीबी जीरामजी पूरे देस के साथे-साथे राज्य म घलो लागू हो गे हे। जेखर जम्मो राज्य के मजूरा मन ह बड़े उच्छाह (उत्साह) के साथ सुवागत करत हें। काम के जगह म लोगन मन म बड़े उच्छाह देखे ला मिलत हे। राज्य के हर एक गांव म वीबी जी राम जी के आय ला एक तिहार (उत्सव) के कस मनावत जम्मो लोगन मन ला ए योजना के जानकारी दिये जात हे।
2 जुलाई ला ग्राम पंचायत गंडईखुर्द ले प्रदेश म होही सुभारंभ
2 जुलाई 2026 ला तिरुपति, आंध्रप्रदेश ले केंद्रीय ग्रामीण विकास मंत्री शिवराज सिंह चौहान डाहर ले कार्यक्रम के सुभारंभ करे जाही, त उहें हमर प्रदेश म ए कार्यक्रम ह कबीरधाम जिला के बोड़ला विकासखंड के तहत ग्राम पंचायत गंडईखुर्द म रखे जाही। ए मउका म उप मुख्यमंत्री अउ पंचायत तथा ग्रामीण विकास मंत्री विजय शर्मा ह कार्यक्रम म सामिल होही।
अब 125 दिन तक रोजगार के गारंटी
ए योजना के तहत देहाती परिवार मन ला बछर म 125 दिन तक काम (रोजगार) के गारंटी, 15 दिन के भितरी मजूरी के पैसा (भुगतान), बेरोजगारी भत्ता, डिजिटल जॉब कार्ड अउ तकनीक आधारित काम प्रबंधन प्रणाली, समे के भितरी अउ साफ-सुथरा पैसा मिले के ब्यवस्था मिलही। वीबी जीरामजी म पानी जतन (जल संरक्षण), सिंचई, गांव के सड़क, पेड़ लगाना (वृक्षारोपण) अउ थिर संपति (टिकाऊ परिसंपत्ति) बनाय के साथे-साथे गांव के जवान मन बर कोसल विकास अउ रोजी-रोटी ऊपर जोर दिये गिस हे। अब ग्राम पंचायत म विकास काम के योजना ह ग्राम सभा के माध्यम से तैयार करे जाही, जेखर से गांव के जरूरत के मुताबिक काम मन के चुनाव करे जा सके।
