सदन के ऐतिहासिक सत्र ला सुने बर विधानसभा पहुंचिस मिस इंडिया छत्तीसगढ़
रायपुर. मुख्यमंत्री विष्णुदेव साय ले आज विधानसभा में मिस इंडिया छत्तीसगढ़ 2026 अनुष्का सोन ह सौजन्य मुलाकात करिन। ए मौका में सुश्री अनुष्का ह मुख्यमंत्री ला नारी सशक्तिकरण कोती करे जात प्रयास बर धन्यबाद दीन अउ कहिन कि महिला मन के सम्मान अउ अधिकार ला लेके विशेष सत्र बुलाना एक प्रेरणादायक पहल आय। उमन कहिन कि एकर ले समाज में नीक संदेस जाथे अउ माई लोगन मन ला अपन अधिकार बर जागरूक होए के प्रेरणा मिलथे।
सुश्री अनुष्का ह बताइन कि ओमन आज विधानसभा के ऐतिहासिक कार्यवाही ला सुने बर खास तौर ले पहुंचे रहिन अउ ए अनुभव ला ओमन ह बहुते प्रेरणादायक बताइन। उमन कहिन कि नीति बनाए के तरीका ला तीर ले देखना ओकर बर एक नवा सीख आय, जेकर ले ओमन समाज में महिला मन ला आगू बढ़े बर अउ जादा प्रोत्साहित कर सकिहें।
मुख्यमंत्री श्री साय ह ए मौका में कहिन कि राज्य सरकार ह महिला मन के मजबूती, सुरक्षा अउ सम्मान ला सबसे पहिली प्राथमिकता देवत हुए लगातार काम करत हे। उमन कहिन कि एहा बहुते सुखद बात हे कि समाज के अलग-अलग क्षेत्र ले माई लोगन मन आगू आके अपन भागीदारी पक्का करत हें, जेहा एक मजबूत अउ जागरूक समाज के पहिचान आय।
मुख्यमंत्री श्री साय ह बिस्वास जताइन कि अइसन पहल ले महिला मन के आत्मविश्वास ह अउ मजबूत होही अउ ओमन ला अगुवाई (नेतृत्व) करे बर प्रेरणा मिलही।
मुख्यमंत्री ह ए घलो कहिन कि नवा पीढ़ी के बेटी मन शिक्षा, कला, खेल अउ सामाजिक क्षेत्र में अपन हुनर के लोहा मनवावत हें, जेहा प्रदेश बर गरब के बात आय। उमन अनुष्का सोन ला ओकर उज्जर भविष्य बर बधाई अउ सुभकामना दीन अउ कहिन कि ओमन समाज में बढ़िया बदलाव के प्रेरक बनंय।
ए मौका में विधायक अनुज शर्मा घलो उपस्थित रहिन।
