- ‘अंतरराष्ट्रीय मानक मन के हिसाब ले अपन आप ला अपडेट राखयं कोच अउ खेल अधिकारी’
- उप मुख्यमंत्री ह खेल विभाग के काम-काज के समीक्षा करिन
- सब्बो खेल आयोजन म मौजूद रहिके खेल प्रतिभा मन ऊपर नजर रखे के दीस निर्देश
- हर जिला म जम्मो खेल मन के संघ बनाये बर कहिन
रायपुर, उप मुख्यमंत्री अउ खेल अउ युवा कल्याण मंत्री अरुण साव ह आज खेल विभाग के काम-काज के समीक्षा करिन। ओमन रायपुर के एक ठन निजी होटल म आयोजित समीक्षा बैठक म विभागीय अधिकारी मन अउ प्रशिक्षक (कोच) मन ला छत्तीसगढ़ म नवा खेल संस्कृति विकसित करे अउ खेल हब बनाये बर नवा सोच अउ विजन के संग काम करे के निर्देश दीस। ओमन स्कूल शिक्षा, उच्च शिक्षा, आदिम जाति कल्याण, पुलिस अउ वन विभाग समेत अलग-अलग विभाग मन के खेल आयोजन म मौजूद रहिके कम उम्मर के प्रतिभा मन ला खोजे अउ ओमन बर सही प्रशिक्षण अउ मार्गदर्शन के व्यवस्था करे बर कहिन। ओमन ए आयोजन मन म सक्रिय भूमिका निभावत आयोजक मन ला जरूरी सुझाव, सहयोग अउ मार्गदर्शन देवे बर घलो कहिन। खेल अउ युवा कल्याण विभाग के सचिव यशवंत कुमार अउ संचालक तनुजा सलाम घलो बैठक म शामिल होइन।
उप मुख्यमंत्री अरुण साव ह बैठक म विभाग कोती ले आयोजित करे जाए वाले घामकाल (ग्रीष्मकालीन) खेल प्रशिक्षण शिविर मन के भारी प्रचार-प्रसार करे के संगे-संग जादा ले जादा खिलाड़ी मन ला अउ खेल संघ मन ला एमा जोड़े के निर्देश दीस। ओमन कहिन कि ए प्रशिक्षण शिविर ह स्थानीय स्तर म खेल मन के माहौल तैयार करे के बड़े माध्यम आय। ओमन खेल अउ खिलाड़ी मन बर बने माहौल तैयार करे बर हर जिला म जम्मो खेल मन के संघ बनाये बर कहिन। ओमन शासन कोती ले सहयोग प्रदान करे बर सब्बो खेल संघ अउ एसोसिएशन मन के पंजीयन कराय बर घलो कहिन।
उप मुख्यमंत्री साव ह राज्य सरकार कोती ले बनाये खेल अधोसंरचना मन के संगे-संग खेलो इंडिया सेंटर मन के प्रशिक्षण सुविधा अउ कोच (प्रशिक्षक) मन के माध्यम ले राज्य के खिलाड़ी मन ला तराशे के निर्देश दीस। ओमन गुणी अउ होनहार खिलाड़ी मन के कम उम्मर म ही पहचान करके ओमन के प्रशिक्षण अउ ग्रूमिंग बर बने व्यवस्था सुनिस्चित करे बर कहिन। ओमन सब्बो जिला के खेल अधिकारी मन ला अपन-अपन जिला के राष्ट्रीय अउ अंतरराष्ट्रीय खिलाड़ी मन के संग-संग बने संभावना वाले खिलाड़ी मन के पूरा प्रोफाइल तैयार करे के निर्देश दीस। ओमन खिलाड़ी मन ला बड़े प्रतियोगिता मन बर तैयार करे बर राष्ट्रीय अउ अंतरराष्ट्रीय खिलाड़ी मन के सहयोग लेवे बर घलो कहिन।
उप मुख्यमंत्री ह अलग-अलग जिला मन म बनत खेल परिसर, खेल मैदान अउ स्टेडियम मन के निर्माण के समय म नियमित रूप ले काम-काज ला देखके खिलाड़ी मन के जरूरत के हिसाब ले निर्माण सुनिस्चित करे बर कहिन। ओमन संबंधित जिला के लोक निर्माण विभाग के कार्यपालन अभियंता के संग लगातार संपर्क म रहिके काम ला तेजी ले पूरा कराय के निर्देश दीस। साव ह बैठक म मौजूद लोक निर्माण विभाग के मुख्य अभियंता वी.एस. कोरम ला खेल अधोसंरचना ले जुड़े निर्माण काम मन ला प्राथमिकता के संग जल्दी ले जल्दी पूरा करे बर कहिन। ओमन सब्बो जरूरी प्रक्रिया मन ला तेजी ले पूरा करके अटका या नई शुरू होए काम मन ला जल्दी शुरू करे के निर्देश दीस। ओमन उप मुख्यमंत्री कार्यालय ला हर महीना ए काम मन के प्रगति रिपोर्ट देवे बर घलो कहिन।
साव ह सब्बो खेल अधिकारी मन ला अपन-अपन जिला म विकासखंड शिक्षा अधिकारी मन ले मिलके स्कूल मन म रोज दिन खेल के एक ठन पीरियड तय करे बर निर्देश दीस। ओमन जनपद पंचायत के मुख्य कार्यपालन अधिकारी मन के माध्यम ले हर गांव के सरपंच अउ सचिव मन के बैठक लेके ओमन ला गांव-गांव म खेल बर बने माहौल तैयार करे बर प्रेरित करे बर कहिन। उप मुख्यमंत्री साव ह प्रशिक्षक मन अउ खेल अधिकारी मन ला अंतरराष्ट्रीय मानक मन के हिसाब ले नवा तकनीक, खेल के सामान, नवा नियम अउ नियामक संस्था मन ले अपडेट रहे के निर्देश दीस। खेल अउ युवा कल्याण विभाग के संयुक्त संचालक प्रभाकर पाण्डेय, उप संचालक रश्मि ठाकुर अउ रवि अग्रवाल समेत जम्मो जिला मन के खेल अधिकारी, सियान प्रशिक्षक (वरिष्ठ प्रशिक्षक) अउ प्रशिक्षक ह समीक्षा बैठक म मौजूद रहिन।
