रायपुर, छत्तीसगढ़ सरकार ह युवा मन ल उद्योग मन के जरूरत के हिसाब से प्रशिक्षित करके रोजगार के नवा अवसर उपलब्ध करात हावय। मुख्यमंत्री विष्णु देव साय के अगुआइ अउ कौशल विकास, तकनीकी शिक्षा अउ रोजगार मंत्री गुरु खुशवंत साहेब के मार्गदर्शन मा विभाग ह प्रशिक्षण, तकनीकी शिक्षा अउ रोजगार क्षमता बढ़ाए बर अलग-अलग संस्था मन संग समझौता ज्ञापन (एमओयू) के पहल करे हावय।
दु दिन के राज्य स्तरीय रोजगार मेला 2026 के समापन अवसर मा टाटा कंसल्टेंसी सर्विसेज (TCS), अडानी समूह अउ नांदी फाउंडेशन जइसन संस्था मन के सहयोग ले युवा मन ल आधुनिक तकनीक, औद्योगिक कौशल अउ व्यक्तित्व विकास के प्रशिक्षण देय के योजना सामने रखे गीस। TCS के सहयोग ले इंजीनियरिंग लइका मन ल सीएसआर के तहत नि:शुल्क प्रशिक्षण दे जाहि, ओहिने अडानी समूह संग आईटीआई, पॉलिटेक्निक अउ इंजीनियरिंग लइका मन ल उद्योग आधारित प्रशिक्षण उपलब्ध कराय के पहल करे गीस।
नांदी फाउंडेशन के माध्यम ले लइका मन ल अंग्रेजी संवाद कौशल, सॉफ्ट स्किल, साक्षात्कार के तैयारी अउ व्यक्तित्व विकास के प्रशिक्षण दे जाहि। पिछला बछर ये पहल के तहत छह हजार ले ज्यादा लइका मन ल प्रशिक्षण दे गे रिहिस। ये बछर घलो लइका मन बर लगभग 48 ले 50 घंटा के प्रशिक्षण कार्यक्रम के योजना हावय। एखर छोड़ के जंगल सफारी मा अलग-अलग ट्रेड संबंधित कौशल प्रशिक्षण बर घलो संस्था मन संग सहयोग के पहल करे जात हावय।
आईटीआई अउ पॉलिटेक्निक मा चालू होहि आधुनिक पाठ्यक्रम
तकनीकी शिक्षा ला उद्योग मन के बदलत जरूरत के हिसाब से बनाए बर आईटीआई अउ पॉलिटेक्निक संस्थान मन मा जुन्ना पाठ्यक्रम के समीक्षा करके रोजगारोन्मुखी पाठ्यक्रम चालू करे जात हावय। एमा आर्टिफिशियल इंटेलिजेंस (AI), मशीन लर्निंग अउ आधुनिक तकनीक ले जुड़े विषय मन ऊपर विशेष जोर दे जाहि। एखर से लइका मन ल तकनीकी दक्षता विकसित करे अउ रोजगार के नवा संभावना के लाभ उठाए मा मदद मिलहि।
पॉलिटेक्निक संस्थान मन के गुणवत्ता सुधारे के पहल
प्रदेश के पॉलिटेक्निक संस्थान मन के शैक्षणिक गुणवत्ता, प्रशिक्षण व्यवस्था अउ अधोसंरचना के आकलन क्वालिटी काउंसिल ऑफ इंडिया के माध्यम ले कराय गे हावय। मूल्यांकन रिपोर्ट के आधार पर संस्थान मन मा सुधार अउ आधुनिकीकरण के कार्ययोजना तैयार करे जाहि। एखर संगै विभाग ह डिजिटल रोजगार पोर्टल ला स्किल मार्केट के रूप मा विकसित करे के डहर काम करत हावय, जियाँ युवा मन के कौशल अउ उद्योग मन के जरूरत के बीच बढ़िया तालमेल बनाए जा सकय।
राज्य सरकार के ये पहल मन के उद्देश्य युवा मन ल गुणवत्तापूर्ण प्रशिक्षण देके रोजगार अउ स्वरोजगार बर तैयार करना हावय। उद्योग मन संग तालमेल, आधुनिक पाठ्यक्रम अउ डिजिटल रोजगार सेवा के माध्यम से प्रदेश मा रोजगार के अवसर बढ़ाए अउ युवा मन ल आर्थिक रूप ले आत्मनिर्भर बनाए ऊपर जोर दे जात हावय।
