पर्यावरण संरक्षण के दीन संदेश; नवा रायपुर ल “पीपल फॉर पीपल सिटी” बनाए के अभियान ल बताइन भविष्य के प्रति सामूहिक संकल्प
रायपुर, पर्यटन अउ संस्कृति मंत्री राजेश अग्रवाल ह “एक पेड़ माँ के नाम” अभियान के तहत आज नवा रायपुर अटल नगर म बने नवा छत्तीसगढ़ विधानसभा परिसर म रुख-राई (पौधा) लगाके पर्यावरण संरक्षण अउ प्रकृति संवर्धन के संदेसा दीन। ए मउका म ओमन प्रदेश के मनखे मन ले जादा ले जादा पौधा लगाए अउ ओकर जतन करे के संकल्प लेबइ के गोठ कहत कहिन कि रुख लगाना सिरिफ पर्यावरण बचाए के माध्यम नोहे, बल्कि आने वाला पीढ़ी मन के सुरक्षित अउ समृद्ध भविष्य बनाए के जिम्मेदारी घलो ए।
मंत्री राजेश अग्रवाल ह कहिन कि “एक पेड़ माँ के नाम” अभियान हर एक नागरिक ल अपन दाई (माँ) के प्रति सम्मान अउ प्रकृति के प्रति अपन जिम्मेदारी के भाव जगाए के एक बड़ प्रेरक अभियान ए। ओमन कहिन कि पौधा लगाना सिरिफ एक परंपरा निभाना नोहे, बल्कि हरियाली अउ साफ-सुथरा पर्यावरण ल बचाए के संकल्प ए। यदि हर एक मनखे अपन दाई के नाम म एक पौधा लगाके ओकर देख-रेख करे के जिम्मेदारी निभाही, त ए अभियान ह जनआंदोलन के रूप लेके प्रदेश ल अउ जादा हरा-भरा बनाए म बड़ भूमिका निभाही।
ओमन कहिन कि मुख्यमंत्री विष्णु देव साय के अगुवाई म नवा रायपुर ल “पीपल फॉर पीपल सिटी” के रूप म विकसित करे के उदिम ले एक लाख पीपल के पौधा लगाए के बड़ अभियान चलाए जात हे। ए कोसिस ह पर्यावरण संरक्षण के संग-संग जैव विविधता ल बढ़ाए, साफ हवा, जलवायु संतुलन अउ प्राकृतिक संसाधन मन ल बचाए के कोती एक बड़ कदम ए।
राजेश अग्रवाल ह कहिन कि रुख-राई मन हमर जिंदगी के आधार अंय। ओमन हमन ल साफ हवा, छांव, पानी (वरखा), जैव विविधता अउ पर्यावरणीय संतुलन देवथें। एकर सेती पौधा लगाए के संग-संग ओकर जतन करना घलो ओतके जरूरी हे। ओमन प्रदेश के जम्मो मनखे मन ले बिनती करत कहिन कि हर एक परिवार कम से कम एक पौधा जरूर लगाए अउ ओला रुख बनत तक ले सुरक्षित रखे के संकल्प लेवय। एही हमर धरती मैया, प्रकृति अउ आघू आए वाली पीढ़ी मन बर सच्ची सेवा होही।
ओमन कहिन, “हमन सब “एक पेड़ माँ के नाम” अभियान ले जुड़के जादा ले जादा पौधा लगावन, ओकर जतन करन अउ हरियर, साफ-सुथरा अउ समृद्ध छत्तीसगढ़ बनाए म अपन सक्रिय भागीदारी तय करन।”
