साय सरकार के सुशासन म तेन्दूपत्ता संग्राहक मन ल मिलीस आर्थिक मजबूती, 10,160 हितग्राही मन के खाता म पहुँचीस 1.39 करोड़ रुपिया ले जादा के बोनस रासी
डिजिटल अउ पारदर्शी बेवस्था ले सोझे खाता म ट्रांसफर होईस प्रोत्साहन पारिश्रमिक रासी, बनबासी परिवार मन के आजीविका अउ गाँव के अर्थव्यवस्था ल मिलीस नवा संबल
रायपुर, मुख्यमंत्री विष्णु देव साय के मंशा के मुताबिक बनबासी अउ तेन्दूपत्ता संग्राहक परिवार मन के आर्थिक सशक्तिकरण के कोती एक बड़े कदम उठावत बछर 2023 के तेन्दूपत्ता संग्रहण के प्रोत्साहन पारिश्रमिक (बोनस) रासी के ऑनलाइन भुगतान करे गीस। गौरेला पेंड्रा मरवाही जिला के मरवाही बनमंडल के तहत पेण्ड्रारोड जिला लघु बनोपज सहकारी संघ के माध्यम ले 9 प्राथमिक लघु बनोपज सहकारी समिति मन के 10 हजार 160 हितग्राही मन के बैंक खाता म 1 करोड़ 39 लाख 36 हजार 718 रुपिया के रासी एमएफपी कलेक्शन एंड पेमेंट सिस्टम के माध्यम ले सोझे ट्रांसफर करे गीस।
मुख्यमंत्री विष्णु देव साय के अगुवाई म राज्य सरकार बनबासी समाज के आजीविका ल मजबूत करे, ओमन ल समे पर आर्थिक मदद पहुँचाय अउ लघु बनोपज आधारित अर्थव्यवस्था ल सुधारे बर लगातार काम करत हवय। एही कड़ी म जिला म 6593 मानक बोरा तेन्दूपत्ता संग्रहण के आधार पर बोनस रासी के बाँटन करे गीस। जम्मो भुगतान के काम डिजिटल अउ पारदर्शी माध्यम ले पूरा होय ले हितग्राही मन ल बिना कोनो ढील-ढाल के सोझे ओमन के बैंक खाता म रासी मिल गीस, जेकर ले संग्राहक मन म खुसी के माहौल हवय।
बनमंडल अधिकारी अउ पदेन प्रबंध संचालक ग्रीष्मी चांद के देखरेख म चलत ए अभियान ले हजारों बनबासी परिवार मन ल आर्थिक राहत मिलीस हवय। मिले बोनस रासी के उपयोग हितग्राही मन खेती-किसानी के काम, लइका मन के पढ़ाई, दवाई-दारू अउ दूसर जरूरी घरखर्च ल पूरा करे म कर सकिही, जेकर ले ओमन के जीवन स्तर म बढ़िया सुधार आही।
जानबा होवय कि बछर 2023 के तेन्दूपत्ता संग्रहण बर पारिश्रमिक के भुगतान 4 हजार रुपिया प्रति मानक बोरा के दर ले पहिली च करे जा चुके रिहिस। अब प्रोत्साहन पारिश्रमिक (बोनस) रासी के भुगतान ले तेन्दूपत्ता संग्राहक मन ल अउ जादा आर्थिक सहारा मिलीस हवय। एकर ले न केवल बनबासी परिवार मन के आर्थिक हालत मजबूत होही, बल्कि गाँव के अर्थव्यवस्था ल घलो नवा गती मिलिही।
मुख्यमंत्री विष्णु देव साय के अगुवाई म राज्य सरकार के जनकल्याणकारी अउ हितग्राही-केंद्रित नीति मन के लाभ समाज के आखिरी मनखे तक पहुँचत हवय। तेन्दूपत्ता संग्राहक मन ल समे पर अउ साफ-सुथरा ढंग ले बोनस रासी उपलब्ध कराना एही संकइप के एक अब्बड़ बड़े उदहारण आय, जो बनबासी समाज के जिवन म खुसहाली अउ आत्मनिर्भरता के नवा अधियाय जोड़त हवय।
