राज्यपाल रमेन डेका अउ मुख्यमंत्री विष्णु देव साय रिहिन उपस्थित
बस्तर के आराध्य देवी के दरसन करके राष्ट्रपति ह देस म सुख, सांति अउ समृद्धि बर करिन परार्थना
माँ दंतेश्वरी मंदिर बस्तर के अटूट आस्था, समृद्ध परंपरा अउ सांस्कृतिक विरासत के मुख्य केंद्र आय
रायपुर . राष्ट्रपति द्रौपदी मुर्मु ह आज अपन बस्तर प्रवास के बेरा म जगदलपुर स्थित बस्तर के आराध्य देवी माँ दंतेश्वरी के मंदिर पहुँच के बिधि-विधान ले पूजा-पाठ करिन। राष्ट्रपति ह माँ दंतेश्वरी ले देशवासी मन बर सुख-समृद्धि, खुसहाली अउ मंगलमय जीवन के कामना करिन।
राष्ट्रपति मुर्मु ह मंदिर म माँ दंतेश्वरी के दरसन करिन अउ श्रद्धापूर्वक पूजा-पाठ करिन। मंदिर परिसर म राष्ट्रपति के परंपरावादी ढंग ले स्वागत करे गे।
इहि बेरा म राज्यपाल रमेन डेका अउ मुख्यमंत्री विष्णु देव साय ह माँ दंतेश्वरी के दरसन करके परदेसवासी मन के सुख-सांति, समृद्धि अउ निरंतर प्रगति के कामना करिन।
मुख्यमंत्री विष्णु देव साय ह कहिन कि बस्तर के आराध्य देवी माँ दंतेश्वरी के प्रति अंचल के लोगन मन के अटूट श्रद्धा हे। माँ दंतेश्वरी बस्तर के आस्था अउ लोकजीवन के अभिन्न हिस्सा आंय। राष्ट्रपति द्रौपदी मुर्मू जी के माँ दंतेश्वरी के दरसन-पूजन बर आगमन बस्तर अउ पूरा छत्तीसगढ़ बर गौरव के अवसर आय।
मुख्यमंत्री साय ह कहिन कि बस्तर अपन अनूपम जनजातीय संस्कृति, प्राचीन परंपरा मन अउ बिछिस्ट जीवन मूल्य मन बर देश-दुनिया म अलग पहिचान रखथे। इहाँ के परंपरा मन म प्रकृति, आस्था अउ समाज के बीच गहिर संबंध दिखथै। राष्ट्रपति जी के प्रवास ले बस्तर के समृद्ध सांस्कृतिक विरासत अउ परंपरा मन ला राष्ट्रीय स्तर म नवा पहिचान अउ सम्मान मिलहि।
उल्लेखनीय हे कि माँ दंतेश्वरी बस्तर अंचल के आराध्य देवी आंय। माँ दंतेश्वरी के प्रति बस्तरवासी मन के गहिर आस्था हे अउ उनकर उपासना क्षेत्र के धार्मिक-सांस्कृतिक परंपरा म विशेष अस्थान रखथे। माँ दंतेश्वरी ले जुड़े आस्था बस्तर के सदियों जुनन्ना परंपरा मन अउ इहाँ के सामाजिक-सांस्कृतिक जीवन म गहिराई ले रचे-बसे हे।
