दृष्टिबाधा ला पाछे छोड़ जयमंती के डिजिटल उड़ान, मुख्यमंत्री ह लैपटॉप भेंट करके हौसला बढ़ाईस

रायपुर। जशपुर जिला के कुनकुरी विकासखंड के ग्राम गोरिया के रहइया अउ शत-प्रतिशत दृष्टिबाधित छात्रा जयमंती खेस ह अपन मेहनत अउ लगन ले शिक्षा के राह म कोनो बाधा नई आने दिस। उच्च शिक्षा प्राप्त करके शिक्षक बने के सपना संजोए जयमंती के पढ़ाई बर अब तकनीक के मजबूत सहारा मिल गए हे। मुख्यमंत्री विष्णुदेव साय ह आज ग्राम बगिया स्थित अपन निवास म जयमंती ला विशेष सॉफ्टवेयर युक्त लैपटॉप भेंट करिस अउ ओखर उज्ज्वल भविष्य बर शुभकामना दिस।

“शिक्षक बनना चाहती हूँ”—जयमंती के आत्मविश्वास ले गदगद होइन मुख्यमंत्री

मुख्यमंत्री लैपटॉप प्रदान करत बेरा जयमंती ले आत्मीय बातचीत करिस। जब मुख्यमंत्री ह ओखर लक्ष्य के बारे म पूछिस, त जयमंती ह आत्मविश्वास ले जवाब दिस कि ओला ‘शिक्षक बनना हे’। जयमंती के जवाब ले खुश होके मुख्यमंत्री ह ओला प्रोत्साहित करत कहिस कि, “शिक्षक राष्ट्र निर्माता होथें। पूरी लगन ले पढ़ाई कर अउ अपन लक्ष्य ला हासिल करे बर निरंतर आगे बढ़।”

जनदर्शन के मांग म संवेदनशीलता ले मिलिस समाधान

जयमंती ह अपन पढ़ाई ला सुगम बनाए बर कलेक्टर जनदर्शन म लैपटॉप के मांग रखे रिहिस। छात्रा के शिक्षा के प्रति जज्बा ला देख के कलेक्टर ह समाज कल्याण विभाग ला मदद करे के निर्देश दिस। विभाग ह छात्रा के जरूरत ला ध्यान म रखत विशेष सॉफ्टवेयर युक्त लैपटॉप तैयार करिस। मुख्यमंत्री ह स्वयं ओला लैपटॉप भेंट करके ओखर सपना ला नवा ऊर्जा दे दिस।

तकनीक बनही जयमंती के आँख

समाज कल्याण विभाग के अधिकारी मन बताइन कि लैपटॉप म विशेष सहायक सॉफ्टवेयर (Screen Reader) डारे गे हे। येकर मदद ले स्क्रीन म उपलब्ध सामग्री ला जयमंती आवाज के जरिए सुन अउ समझ सकही। ये तकनीकी सुविधा ले ओ डिजिटल पुस्तक, नोट्स अउ अन्य शैक्षणिक सामग्री के उपयोग आसानी ले कर सकही।

शिक्षा बर सरकार प्रतिबद्ध

मुख्यमंत्री साय ह कहिन कि हर विद्यार्थी ला आगे बढ़े के समान अवसर मिलय, एखर बर राज्य सरकार प्रतिबद्ध हे। विशेष रूप ले दिव्यांग विद्यार्थी मन ला ओमन के जरूरत के हिसाब ले संसाधन उपलब्ध कराना सरकार के प्राथमिकता हे। जयमंती के कहानी ए संदेश देथे कि अवसर अउ प्रोत्साहन मिले त शारीरिक चुनौती प्रतिभा अउ सपना के उड़ान ला नई रोक सकय।