रायपुर, उप मुख्यमंत्री अरुण साव अंबिकापुर म सरगुजा अऊ सूरजपुर जिला के अधिकारी मन के संयुक्त बइठक लेके लोक निर्माण, लोक स्वास्थ्य यांत्रिकी, नगरीय प्रशासन अऊ विकास अऊ खेल अऊ युवा कल्याण विभाग के काम मन के समीक्षा करीन। ओमन विकास काम मन के प्रगति, योजना मन के क्रियान्वयन अऊ विभाग के स्तर म चलत काम मन के जानकारी लेवत अधिकारी मन ला काम मन म तेजी लाये अऊ योजना मन के प्रभावी अऊ तय समय म पूरा करे के निर्देश दीन। बइठक म सरगुजा कलेक्टर अजीत वसंत, वरिष्ठ पुलिस अधीक्षक राजेश अग्रवाल अऊ सूरजपुर कलेक्टर रेना जमील समेत दूसर अधिकारी मन मौजूद रिहिन।
उप मुख्यमंत्री ह कहिस कि विकास काम मन के असली उद्देश्य आम नागरिक मन ला अझोर सुविधा देना हावय। ओमन स्वीकृत काम मन ला तय समय-सीमा म पूरा करे, गुणवत्ता ले समझौता नइ करे अऊ काम मन के नियमित देखरेख सुनिश्चित करे के निर्देश दीन। ओमन विभाग मन के बीच अझोर तालमेल बनाके विकास काम मन ला गति देय के संग-संग अधिकारी मन ला अपन कार्यालय के व्यवस्था अऊ साफ-सफाई म घलो बिशेष ध्यान देय बर कहिस। ओमन कहिस कि अधिकारी मन अपन जिम्मेदारी ला गंभीरता ले समझैं अऊ सक्रियता के संग दायित्व मन के निर्वहन करैं, जेकरसे शासन के योजना मन के सीधा फायदा आम लोगन तक पहुँच सके।
नगरीय प्रशासन जुड़े काम मन के समीक्षा के बेरा म अरुण साव ह सहर मन म सफाइ अऊ व्यवस्था मन ला अझोर बढ़िया बनाय बर जोर दीइन। ओमन टेंडर प्रक्रिया पूरा होय के बाद काम ला तुरंत सुरु कराय अऊ प्रगतिरत काम मन ला जल्दी पूरा करे के निर्देश दीइन। प्रधानमंत्री आवास योजना (शहरी) ला प्राथमिकता देत ओमन सबो सीएमओ मन ला अक्टूबर महीना तक प्रगतिरत आवास निर्माण के काम पूरा करे के निर्देश दीइन। इही तर्तिके ले मुख्यमंत्री नगरोत्थान योजना, अधोसंरचना मद, स्वच्छ भारत मिशन (शहरी), 15वें वित्त आयोग अऊ रेन वाटर हार्वेस्टिंग समेत अलग-अलग योजना मन के समीक्षा करीन। ओमन राजस्व संग्रहण के हर महीना समीक्षा करे के निर्देश घलो दीइन।
लोक निर्माण विभाग के समीक्षा करत उप मुख्यमंत्री ह भवन, सड़क, पुल-पुलिया अऊ दूसर निर्माण काम मन के प्रगति के जानकारी लीन। ओमन बरसा के बाद सड़क मन के मरम्मत म तेजी लाये के निर्देश देत कहिस कि आऊवइया समय तिहार मन के हावय, एखरसे लोगन मन ला आवगमन म कोनहु किसिम के परेशानी झन होवय। ओमन निर्माण काम मन म बेमतलब के देरी रोके, गुणवत्तापूर्ण काम सुनिश्चित करे अऊ नियमित मॉनिटरिंग म बिशेष जोर दीइन। ओमन अधिकारी मन ले कार्ययोजना बनाके तय समय-सीमा के भीतर काम पूरा करे के कहिस।
लोक स्वास्थ्य यांत्रिकी विभाग के समीक्षा म जल जीवन मिशन समेत पेयजल योजना मन के स्थिति के जानकारी लेगे गीस। उप मुख्यमंत्री ह पेयजल व्यवस्था सुचारू बनाके राखे, पानी के स्रोत मन के उपलब्धता सुनिश्चित करे अऊ पानी से जुड़े समस्या मन के तुरंत निराकरण करे के निर्देश दीइन। ओमन लंबित काम मन ला प्राथमिकता ले पूरा करे के संग पेयजल अधोसंरचना मन के रखरहाव अऊ योजना मन के नियमित देखरेख सुनिश्चित करे के कहिस, जेकरसे आम नागरिक मन ला बिना रुकावट पेयजल सुविधा मिल सके।
खेल अऊ युवा कल्याण विभाग के समीक्षा के बेरा म अरुण साव ह ग्रामीण छेत्र मन म खेल गतिविधि मन ला बढ़ावा देय बर जोर दीइन। ओमन प्राथमिक साला मन म खेल गतिविधि बढ़ाय अऊ जिला पंचायत सीईओ अऊ शिक्षा विभाग के संग तालमेल बनाके कार्ययोजना तैयार करे के निर्देश दीइन। स्कूल मन के संकुलवार एक-एक पीटीआई ला खेल गतिविधि मन के संचालन बर चिन्हित करे के कहिस। ओमन सरगुजा ओलंपिक के पंजीयन के व्यापक प्रचार-प्रसार करे, खेल संघ मन अऊ खेल ले जुड़े लोगन मन ला अभियान ले जोड़े अऊ जादा से जादा युवा मन के भागीदारी सुनिश्चित करे के निर्देश दीइन। बइठक म सरगुजा जिला पंचायत सीईओ रोमा श्रीवास्तव, सूरजपुर जिला पंचायत सीईओ विजेंद्र सिंह पाटले अऊ अंबिकापुर नगर निगम आयुक्त विनय कुमार अग्रवाल समेत दूसर अधिकारी मन उपस्थित रिहिन।
