- 103 करोड़ रुपिया ले जादा के सुघर स्वास्थ्य सुविधा बुता मन के होईस भुइँया-पूजन
- 200 सीटर छात्रावास, कैंसर भवन के बढ़ाव अउ रहे के मकान (आवासीय परिसर) के होही निरमान
रायपुर, मुख्यमंत्री विष्णुदेव साय ह आज अटल बिहारी वाजपेयी सभागृह, चिकित्सा महाविद्यालय रायपुर म 103 करोड़ रुपिया ले जादा खरचा के स्वास्थ्य सुघरई बुता (स्वास्थ्य अधोसंरचना विकास कार्यों) के भुइँया-पूजन करिन।
कार्यक्रम ला संबोधित करत हुए मुख्यमंत्री ह कहिन कि निरोग छत्तीसगढ़ ही विकसित छत्तीसगढ़ के निरमान करही। देस-राज म लगातार स्वास्थ्य सुबिधा मन ला बढ़ाए जात हवय। ए योजना मन राज म डाक्टरी पढ़ाई अउ इलाज के सुबिधा मन ला नवा ऊँचाई दिहीं जेकर ले मरीज, बिद्यार्थी अउ डाक्टर जम्मो मन ला एकर लाभ मिलही।
ए मौका म लइका मन बर आघुनिक छात्रावास, कैंसर भवन ला अउ बड़े करे अउ डाक्टर मन अउ करमचारी मन के रहे के मकान (आवासीय परिसर) के संग अउ दूसर निरमान बुता मन के नेव (आधारशिला) रखे गीस।
मुख्यमंत्री विष्णुदेव साय ह कहिन कि पिछली बार मेडिकल कॉलेज आय के बेरा बिद्यार्थी मन ह छात्रावास बनाय के मांग रखे रहिन, जेला सरकार ह संजीदगी ले देखत हुए आज ओकर निरमान सुरू कर दे हवय। ओमन कहिन कि राज सरकार ह पिछले ढाई बछर म जनता ले करे जादा तर बादा मन ला पूरा करे हवय अउ “मोदी की गारंटी” ला भुइँया म उतार के देखाय हवय। प्रधानमंत्री नरेंद्र मोदी के अगवाई म भारत आज दुनिया के चौथी सबले बड़े अरथबियवस्था बन चुके हवय अउ विकसित भारत के संकलप कोति तेजी से आगू बढ़त हवय।
मुख्यमंत्री ह कहिन कि राज सरकार स्वास्थ्य सुबिधा मन ला बढ़ाए बर सबले पहिली धियान देवत हवय। विकसित छत्तीसगढ़ बनाय बर निरोग छत्तीसगढ़ जरूरी हवय। स्वास्थ्य मंत्री श्याम बिहारी जायसवाल के अगवाई म चिकित्सा अउ स्वास्थ्य बिभाग ह लगातार बड़ सुघर काम करत हवय। ओमन बिभाग के अघिकारी मन अउ पूरा टीम ला बधाई देवत हुए कहिन कि राज म डाक्टरी सुबिधा मन ला लगातार बढ़ाए जात हवय।
मुख्यमंत्री साय ह कहिन कि केंद्र सरकार कोति ले छत्तीसगढ़ ला लगातार सहयोग मिलत हवय। ओमन बतइन कि डीएम कार्डियक कोर्स के मंजूरी ले लेके अउ दूसर स्वास्थ्य योजना मन तक केंद्र सरकार ह हर मांग म बढ़िया सहयोग दीस हवय। ओमन आस जताइन कि आगू दिन म छत्तीसगढ़ ला अखिल भारतीय आयुर्वेद संस्थान (ऑल इंडिया इंस्टीट्यूट ऑफ आयुर्वेद) के घलो सौगात मिलही, जेकर ले राज के जड़ी-बूटी अउ आयुर्वेद ला नवा पहिचान मिलही।
मुख्यमंत्री ह कहिन कि बस्तर अब नक्सलवाद ले मुकत होकर तेजी से बिकास के रद्दा म आगू बढ़त हवय। स्वास्थ्य बिभाग ह दुरिहा-दुरिहा के इलाका म घर-घर जाके लाखो लोगन मन के स्वास्थ्य जाँच अउ इलाज करे हवय। ओमन मेडिकल के युवा बिद्यार्थी मन ला कहिन कि वे मन अपन पढ़ाई पूरा करके सरगुजा ले लेके बस्तर तक राज के हर कोना म सेवा दे के संकलप लेंव अउ सिरिफ सहर म रहे के सोच झन रखंय। सरकार डाक्टरी पढ़ाई बर जरूरी जम्मो सुबिधा दे बर बचनबद्ध हवय।
उपमुख्यमंत्री अरुण साव ह कहिन कि लगभग 104 करोड़ रुपिया के खरचा ले बनइया छात्रावास, कैंसर संस्थान बढ़ाव अउ दूसर बुता मन चिकित्सा के छेत्र म एक इतिहास रचही। ओमन लोक निर्माण विभाग (PWD) अउ निरमान एजेंसी मन ला हुकुम देवत हुए कहिन कि जम्मो निरमान काम तय समय ले पहिली अउ बड़ सुघर गुनवत्ता के संग पूरा करे जाय।
स्वास्थ्य मंत्री श्याम बिहारी जायसवाल ह कहिन कि राज म स्वास्थ्य अउ चिकित्सा शिक्षा के छेत्र म अजूबा बदलाव होवत हवय। राज म पांच नवा मेडिकल कॉलेज के मंजूरी, नर्सिंग कॉलेज मन के बढ़ती, फिजियोथेरेपी कॉलेज मन के बढ़ाव अउ योग व कदरती (प्राकृतिक) इलाज ला बढ़ावा दे बर बड़े पैमाना म काम करे जात हवय। 10 एकड़ म 100 बेड वाले योग अउ नेचुरोपैथी अस्पताल अउ रिसर्च सेंटर के काम घलो चलत हवय।
स्वास्थ्य मंत्री जायसवाल ह कहिन कि राज सरकार ह पहिली के रुके कोरबा, कांकेर अउ महासमुंद मेडिकल कॉलेज मन के निरमान काम सुरू करवाय हवय। बिलासपुर के सिम्स ला घलो अउ सुघर बनाए जात हवय। जगदलपुर म जल्द ही छत्तीसगढ़ के दूसरा सबले बड़े हार्ट सेंटर (दिल के अस्पताल) सुरू करे जाही।
कारजकरम म स्वास्थ्य बिभाग के अघिकारी मन बतइन कि पहिली योजना म 200 सीटर आघुनिक छात्र-छात्रावास बनाए जाही। दूसरी योजना म कैंसर भवन ला दूसर मंजिल ले छठवां मंजिल तक बढ़ाए जाही। इहाँ आघुनिक लैब, 64-64 बेड के वार्ड, सिंगल रूम, आईसीयू अउ आपरेशन थिएटर बनही, जेकर ले कैंसर के मरीज मन ला बड़ सुघर इलाज मिलही। तीसरी योजना म नोनी मन के छात्रावास ला अउ बड़े करे जाही, जेमा लाइब्रेरी, रिक्रिएशन हॉल अउ जम्मो सुबिधा मिलही।
ए मौका म विधायक पुरंदर मिश्रा, सीजीएमएससी के चेयरमैन दीपक म्हस्के, स्वास्थ्य विभाग के सचिव अमित कटारिया, आयुक्त चिकित्सा शिक्षा रितेश अग्रवाल, पंडित जवाहरलाल नेहरू स्मृति चिकित्सा महाविद्यालय के डीन डॉ. विवेक चौधरी, अधीक्षक डॉ. संतोष सोनकर के संग अउ दूसर जनप्रतिनिधि, डाक्टर, मेडिकल के युवा बिद्यार्थी अउ बड़ संख्या म नागरिक मन हाजिर रहिन।
