- निर्देशक भरतबाला गणपति संग म पूरा टीम ल दिहीन बधाई
- रामनामी के अनोखा सांस्कृतिक परंपरा ल राष्ट्रीय पहचान मिलना हम सबो बर मान-गउरव के बात – राजेश अग्रवाल
रायपुर, रामनामी समाज के अनोखा परंपरा अउ सांस्कृतिक पहचान म बने डॉक्यूमेंट्री फिल्म ‘राम-नामी’ ल 72वें राष्ट्रीय फिल्म पुरस्कार म ‘सब्बो ले बने (सर्वश्रेष्ठ) डॉक्यूमेंट्री’ के प्रतिष्ठित सम्मान मिले म संस्कृति मंत्री राजेश अग्रवाल हा फिल्म के निर्देशक भरतबाला गणपति संग म निर्माता अउ पूरा फिल्म टीम ल बधाई अउ सुभकामना दिहीन।
संस्कृति मंत्री राजेश अग्रवाल किहीन कि ‘राम-नामी’ ल राष्ट्रीय फिल्म पुरस्कार मिलना छत्तीसगढ़ बर भारी गउरव अउ खुसी के बात हावय। ए सम्मान सिर्फ एक बढ़िया डॉक्यूमेंट्री फिल्म ल मिले पुरस्कार नोहे, बल्कि छत्तीसगढ़ के लोक परंपरा मन, सांस्कृतिक मूल्य मन, आध्यात्मिक चेतना अउ पीढ़ी-दर-पीढ़ी चले आवत धरोहर ल राष्ट्रीय स्तर म मिले बड़े पहचान घलो हावय।
ओमन किहीन कि रामनामी समाज के परंपरा छत्तीसगढ़ के सांस्कृतिक रंग-रूप के खास उदाहरण हावय। अपन अनोखा आस्था, परंपरा मन अउ जिनगी के मूल्य मन के माध्यम ले रामनामी समाज हा प्रदेश के लोक संस्कृति ल सुघर बनाए म बड़े योगदान दिए हावय। ‘राम-नामी’ डॉक्यूमेंट्री हा ए खास सांस्कृतिक परंपरा ल प्रभावकारी ढंग ले देश के बड़े-बड़े दर्शक मन तक पहुँचाए के काम करे हावय।
अग्रवाल हा फिल्म के निर्देशक श्री भारतबाला गणपति अउ पूरा टीम के कलात्मक कोसिस के सराहना करत हुए किहीन कि कोनो लोक परंपरा ल संवेदनशीलता अउ प्रभावकारी सिनेमाई प्रस्तुति के माध्यम ले राष्ट्रीय मंच तक पहुँचाना अपन आप म बड़े उपलब्धि हावे। फिल्म ले जुड़े हर एक कलाकार, तकनीकी विशेषज्ञ, निर्माता अउ सहयोगी ए सम्मान के हकदार हावयं।
ओमन किहीन कि छत्तीसगढ़ के सांस्कृतिक धरोहर भारी बड़े अउ रंग-बिरंग हावय। यहाँ के लोककला, लोकगीत, लोकनाच, जनजातीय परंपरा मन, धार्मिक आस्था अउ सदिओं जुन्ना सांस्कृतिक परंपरा मन प्रदेश के खास पहचान हावयं। ‘राम-नामी’ ल मिले राष्ट्रीय सम्मान ए समृद्ध परंपरा मन ल देश अउ दुनिया के आघू म रखे के दिशा म घलो बड़े उपलब्धि हावे।
संस्कृति मंत्री अग्रवाल किहीन कि राज्य सरकार छत्तीसगढ़ के लोक अउ सांस्कृतिक धरोहर के जतन करे, ओला बढ़ाए अउ चारों कोती प्रचार-प्रसार करे बर लगातार काम करत हावय। ओमन भरोसा जताइन कि ‘राम-नामी’ ल मिले ए राष्ट्रीय सम्मान हा प्रदेश के अऊ दूसर लोक कलाकार मन, रचनाकार मन, फिल्म बनाएईया मन अउ सांस्कृतिक काम करेईया मन ल घलो अपन जड़, परंपरा अउ लोक धरोहर ल कला के माध्यम ले आघू लावे बर बढ़ावा दिही।
बता देवन कि बछर 2024 के फिल्म मन बर घोषित 72वें राष्ट्रीय फिल्म पुरस्कार म ‘राम-नामी’ ल हिंदी भाषा के सब्बो ले बने डॉक्यूमेंट्री के रूप म चुने गए हावय। फिल्म के निर्माता बीबीपी स्टूडियो वर्चुअल भारत प्राइवेट लिमिटेड अउ निर्देशक भरतबाला गणपति हावयं।
संस्कृति मंत्री राजेश अग्रवाल हा भारतबाला गणपति अउ ‘राम-नामी’ फिल्म के पूरा टीम ल ए गउरव भरे उपलब्धि बर गाड़ा-गाड़ा बधाई देवत हुए ओमन के सुघर भविष्य के कामना करिन। ओमन किहीन कि ए सम्मान छत्तीसगढ़ के सांस्कृतिक पहचान ल देश के राष्ट्रीय मंच म अऊ अगाध रूप ले स्थापित करे बर एक बड़े मौका हावे।
