- मुख्यमंत्री विष्णु देव साय हा करिन 30 लाख रुपया प्रोत्साहन राशि अउ आउट ऑफ टर्न डीएसपी पद मा पदोन्नति के घोषणा
- ज्ञानेश्वरी के उपलब्धि पूरा छत्तीसगढ़ बर गौरव, बेटी अउ जुवान मन बर प्रेरणा : मुख्यमंत्री
रायपुर, ग्लासगो मा आयोजित राष्ट्रमंडल खेल 2026 मा माईलोगन मन के 53 किलोग्राम भारोत्तोलन स्पर्धा मा रजत पदक जीत के देश अउ छत्तीसगढ़ के नाम आघू बढ़ाए वाली राजनांदगांव के बेटी ज्ञानेश्वरी यादव के आज मुख्यमंत्री निवास मा आत्मीय स्वागत अउ अभिनंदन करे गिस। मुख्यमंत्री विष्णु देव साय हा ज्ञानेश्वरी ला ओकर ऐतिहासिक उपलब्धि मा बधाई देवत हुए ओला 30 लाख रुपया के प्रोत्साहन राशि अउ आउट ऑफ टर्न डीएसपी पद मा पदोन्नति देवे के घोषणा करिन। मुख्यमंत्री हा कहिन कि ए सम्मान प्रदेश के प्रतिभा, मेहनत अउ संकल्प के सम्मान ए।
मुख्यमंत्री साय हा कहिन कि ज्ञानेश्वरी यादव हा अपन पहीलेच राष्ट्रमंडल खेल मा रजत पदक जीत के ए बात ला साबित कर दिस कि मजबूत इच्छाशक्ति, कड़ा मेहनत अउ अनुशासन के भरोसा मा कोई घलो लक्ष्य असंभव नइ होवय। ओमन कहिन कि माईलोगन मन के 53 किलोग्राम भारोत्तोलन स्पर्धा मा कुल 199 किलोग्राम वजन उठा के ज्ञानेश्वरी हा न सिर्फ देश बर पदक जीतिस, बल्कि पूरा छत्तीसगढ़ ला गौरवान्वित करिस। ए उपलब्धि प्रदेश के खेल इतिहास मा सोनहा अध्याय के रूप मा दरज होही।
मुख्यमंत्री साय हा कहिन कि ज्ञानेश्वरी हा सीमित साधन अउ कतोक चुनौती मन के बाद घलो अपन सपना मन ला कभू कमजोर नइ होवे दिस। बिथा परिस्थिति मा घलो लगातार अभ्यास, अनुशासन अउ समरपन के दम मा ओ हा अंतरराष्ट्रीय मंच मा सफलता हासिल करे हे। ओकर सफलता प्रदेश के जुवान मन, खास करके बेटी मन बर प्रेरणास्रोत ए कि यदि लक्ष्य साफ होवय अउ मेहनत ईमानदार होवय त कोई घलो मंजिल दूरिहा नइ रहय।
मुख्यमंत्री साय हा कहिन कि प्रदेश सरकार ला अपन ए बेटी मा गरब हे। एही भावना के संग राज्य सरकार हा ओला आउट ऑफ टर्न डीएसपी पद मा पदोन्नति देवे के फैसला लीस हे, ताकि ओकर उपलब्धि के सम्मान होवय अउ प्रदेश के अउ घलो खिलाड़ी मन बढ़िया प्रदर्शन बर प्रेरित होवयं।
मुख्यमंत्री हा कहिन कि ग्लासगो रवाना होए ले पहीले ओमन ला ज्ञानेश्वरी ले मिले के मौका मिले रीहिस। ओ बखत ओमन ओकर नीक प्रदर्शन बर सुभकामना दे रीहिन। ध्यान देवे के गोठ ए हे कि राष्ट्रमंडल खेल मा रजत पदक जीते के बाद ओमन वीडियो कॉल के माध्यम ले घलो ओला बधाई दे रीहिन। मुख्यमंत्री विष्णु देव साय हा आज मुख्यमंत्री निवास मा ओकर स्वागत करत कहिन कि ए पूरा प्रदेश बर गरब अउ परब के बेरा ए।
मुख्यमंत्री साय हा कहिन कि राज्य सरकार खेल प्रतिभा मन ला आघू बढ़ाए बर आधुनिक खेल अधोसंरचना, दुनिया भर के प्रशिक्षण, नीक कोचिंग, जरूरी साधन अउ सब्बो किसम के प्रोत्साहन मुहैया कराए बर लगातार काम करत हे। सरकार के मकसद असन माहौल तैयार करना ए, जिहाँ प्रदेश के हर एक गुनी खिलाड़ी अपन ताकत के हिसाब ले आघू बढ़ सके अउ देश-दुनिया के स्तर मा बढ़िया प्रदर्शन कर सके।
ओमन कहिन कि प्रदेश सरकार के कोसिस हे कि छत्तीसगढ़ के जादा ले जादा खिलाड़ी मन ओलंपिक, राष्ट्रमंडल खेल, एशियाई खेल अउ दूसर अंतरराष्ट्रीय प्रतियोगिता मन मा तिरंगा फहरावयं अउ देश व प्रदेश के नाम ला पूरा दुनिया मा उजयारावयं। ज्ञानेश्वरी यादव जइसन खिलाड़ी मन के उपलब्धि ए दिहा मा नवा पीढ़ी के बिसास ला बढ़ाए के काम करही। ओमन भरोसा जताइन कि ज्ञानेश्वरी हा आवत बेरा मा घलो अपन नीक प्रदर्शन ले भारत अउ छत्तीसगढ़ के नाम ला दुनिया के मंच मा नवा उँचाई तक पहुँचाही।
मुख्यमंत्री हा कहिन कि प्रतिभा मन ला चिनहाना, ओमन ला मौका देना अउ ओकर उपलब्धि मन के सम्मान करना सरकार के खेल नीति के अहम आधार ए। एही कोसिस आवत समय मा छत्तीसगढ़ ला खेल मन के छेत्र मा देश के आघू राज्य मन मा स्थापित करही।
