रायपुर. मुख्यमंत्री विष्णु देव साय ह आज राजधानी रायपुर के कचहरी चौक मा स्थित भारतीय स्टेट बैंक (एसबीआई) के कचहरी साखा के नवा अउ आधुनिक भवन के सुभआरंभ करिन। ए मउका मा मुख्य महाप्रबंधक प्रभाष कुमार सुबुद्धि, उप महाप्रबंधक रमेश सिन्हा, प्रबंधक अनिल यादव संग बैंक के अधिकारी-करमचारी मन मौजूद रिहिन।
मुख्यमंत्री श्री साय ह कहिन कि:”एहा बड़े खुसी अउ भाग के बात आय कि पिछला 50 बछर ले चलत एसबीआई के कचहरी साखा अब नवा आधुनिक भवन मा सिफ्ट होगे हे, जेकर ले गाहक मन ला अउ बने सेवा मिलही।”उमन कहिन कि ए नवा परिसर मा उपभोक्ता मन ला आधुनिक बैंकिंग सुविधा मिलही, जेकर ले उंकर काम-काज ह अउ सहज अउ झटकुन (तुरते) पूरा हो जाही।मुख्यमंत्री श्री साय ह बैंकिंग बेवस्था ला देस के अर्थव्यवस्था के रीढ़ के हड्डी बताइन अउ कहिन कि भारतीय स्टेट बैंक अपन जिम्मेदारी ला बढ़िया ढंग ले निभावत हे अउ आगू घलो गाहक मन के सेवा मा अइसने आगू रही। मुख्यमंत्री ह ए मउका मा बैंक के अधिकारी मन अउ गाहक मन ला बधाई अउ सुभकामना दीन।
जानबा होवय कि एसबीआई के कचहरी साखा ह हाल मा अपन सेवा के 50 बछर पूरा करे हे। गाहक ला बने, सुगमत अउ उन्नत बैंकिंग सुविधा देय के निसचय ले साखा ला पंडरी रोड स्थित आक्सीजोन क्षेत्र के नवा भवन मा ले जाय गे हवय, जिहां आधुनिक सुविधा के संग बने बैंकिंग अनुभव मिलही।
