हमर माटी के खेल ल मिलत हे चिन्हारी
छत्तीसगढ़िया ओलंपिक के आयोजन ले हमर राज के बगरत हे दुनिया भर म नाव
गढ़ गे नवा छत्तीसगढ़
पारंपरिक खेल के संरक्छन अउ संवधरधन बर उठाए गे परयास ले चारो मुंडा होवत हे चरचा
अब ओ बेरा दुरिहा नई हे जब हमर माटी के खेल ह दुनिया भर म हमर समृद्ध परंपरा के अलख जगाही। काबर कि हमर राज के मुखिया भूपेश बघेल के सुघ्घर सोच ले हमर संस्कृति अऊ परंपरा ह नित नवा मुकाम ल आत्मसात करत हे। इहां चलईया रास्ट्रीय अउ अंतर्रास्ट्रीय खेल के संगे संग हमर माटी माटी ले जुड़े पुरखौती खेल मन के आयोजन ले घलो एक नवा इतिहास रचे जावत हे। मुख्यमंत्री भूपेश बघेल के पहल अउ खेल मंत्री उमेश पटेल के निरदेसन म नवा खेल अकादमी के निरमान, खेल मैदान के निरमान अऊ ओखर उन्नयन के संगे संग खिलाड़ी मन ल बेहतर सुविधा दे के बुता चलत हे।
पाछू के बेरा म सतरंज अउ बैडमिंटन के अंतर्रास्ट्रीय टूर्नामंेट घलो राजधानी म आयोजित करे गे रिहिस जेमा कई बड़का बड़का खिलाड़ी मन हिस्सा ले रिहिन हे। एखर ले होईस ए कि खिलाड़ी मन ल अपन रैंकिंग ल बढ़ाए के मौका मिलिस। खिलाड़ी मन इहां होए ब्यवस्था ले बड़ खुस नजर आईस त ओमन ह दुबारा अईसन आयोजन होए के बात कहिन।
इही नहीं हमर छत्तीसगढ़ के पुरखौती खेल के संवरधन अउ ओला बढ़ावा दे खातिर छत्तीसगढ़िया ओलंपिक के घलो सुरुआत करे गे हे जेखर आय़ोजन गांव-गांव म चलत हे। अउ एमा का लईका का सियान, का नोनी का बाबू जम्मो वरग के लोगन मन बढ़ चढ़के हिस्सा लेवत हे। संगे संग अपन नाननूक पना म खेले खेल के आनंद लेवत हे अऊ ओर बेरा के सुरता करत हे।
बाढ़त हे खेल सुविधा, नवा–नवा उदिम
छत्तीसगढ़ म खेल अकादमी के संचालन, खेल अधोसंरचना के विकास अउ ओखर समुचित उपयोग ले खेल के सरलगहा विकास बर खेल विकास प्राधिकरण के गठन घलो करे गे हे। खिलाड़ी मन ल नवा-नवा उदिम ले आधुनिक खेल के प्रसिक्छन देके ओमन ल प्रदेस के नाव बढ़ाए बर तियार करे जात हे। सरकार के कोसिस हे एखर ले हमर प्रदेस म घलो अंतर्रास्ट्रीय स्तर के मैदान अउ खेल के सामान के ब्यवस्था होए जेखर लाभ इहां के खिलाड़ी मन ल मिलही।
खेल सुविधा के बिस्तार
- स्व. बीआर यादव राज्य खेल प्रसिक्छन केन्द्र बहतराई, बिलासपुर जिहां हाकी, तीरंदाजी अउ एथलेटिक के आवासीय अकादमी के स्थापना करे गे हे। एला भारतीय खेल प्राधिकरण ह खेलो इण्डिया स्टेट सेन्टर ऑफ एक्सीलेंस के मानता घलो दे हे। अकादमी म 36 बाबू अऊ 24 नोनी कुल 60 खिलाड़ी प्रसिक्छन लेवत हे।
- शिवतराई बिलासपुर म गैर अवासीय अकादमी तीरंदाजी प्रशिक्षण उपकेन्द्र
- रायपुर के सरदार वल्लभ भाई पटेल अंतर्रास्ट्रीय हॉकी स्टेडियम म गैर आवासीय हॉकी अऊ तीरंदाजी अकादमी
- रायपुर के स्वामी विवेकानन्द स्टेडियम कोटा म गैर आवासीय बालिका फुटबॉल अकादमी अउ इहां गैर आवासीय बालक अउ बालिका एथलेटिक अकादमी संचालित हे।
- टेनिस खेल बर रायपुर के लाभांडी म अंतर्रास्ट्रीय स्तर के टेनिस स्टेडियम अउ अकादमी के निरमान करे जात हे।
- छत्तीसगढ़ सरकार ह राज्य के जम्मो जिला म खेल अकादमी के स्थापना के लक्छ राखे हे।
- भारत सरकार के खेलो इण्डिया योजना ले 7 लघु केन्द्र स्वीकृत हे जेमा जशपुर म हॉकी, बीजापुर म तीरंदाजी, राजनांदगांव म हॉकी, गरियाबंद म व्हॉलीबॉल, नारायणपुर म मलखम्ब, सरगुजा म फुटबॉल अउ बिलासपुर म तीरंदाजी खेल की स्वीकृति मिले हे।
- खेलो इण्डिया योजना ले जशपुर म सिंथेटिक टर्फ वाला हॉकी मैदान, अम्बिकापुर म मल्टीपरपज इंडोर हॉल, जगदलपुर बस्तर म सिंथेटिक फुटबॉल ग्राउण्ड के संगे-संग रनिंग ट्रैक ,महासमुंद म सिंथेटिक सतह के एथलेटिक ट्रैक निरमान के स्वीकृति मिले हे जेमा जशपुर अउ जगदलपुर म निरमान पूरा हो गे हे।
पुरखौती खेल ल मिलिस मंच
छत्तीसगढ़ म हमर पुरखौती के खेल ल एक घांव अऊ जीवंत करे के उद्देस ले छत्तीसगढ़िया ओलंपिक के आयोजन करे जात हे। अउ एखर अरस अईसे होईस कि लोगन मन बढ़-चढ़के एमा हिस्सा लेवत हे। बता देन कि छत्तीसगढ़िया ओलंपिक म 14 पुरखौती खेल ल संघारे गे हे। एमा गिल्ली-डंडा, पिट्ठूल, संखली, लंगड़ी दौड़, कबड्डी, खो-खो, रस्साकसी, बांटी, अउ एकल खेल म बिल्लस, फुगड़ी, गेड़ी दउड़, भंवरा, 100 मीटर दउड़ अउ लंबी कूद जईसन खेल मन ला सामिल करे गे हे। 6 चरन म आयोजित होवईया ए प्रतियोगिता म लेवल एक म राजीव युवा मितान क्लब अउ लेवल दू म जोन स्तर के सफल आयोजन हो गे हे एखर बाद लेवल तीन म विकासखंड अउ नगरीय क्लस्टर स्तर के संगे-संग जिला, संभाग अउ राज्य स्तर म ए आयोजन ल आयोजित करे जाही।
बड़का आयोजन ले बगरत हे नाव
बता देन कि राजधानी रायपुर म 19 ले 28 सितंबर के बेरा म छत्तीसगढ़ चीफ मिनिस्टर ट्राफी इंटरनेशनल ग्रैंड मास्टर चेस टूर्नामेंट के आयोजन करे गे रिहिन। ए दरी जम्मो भारत के 21 राज्य के संगे संग 15 देस के 500 ले जादा शतरंज के नामचीन खिलाड़ी मन जुरयाए रिहिन। टूर्नामेंट म ग्रैंडमास्टरर्स, इंटरनेशनल मास्टर्स, वीमेन ग्रैंडमास्टर्स, वुमेन इंटरनेशनल मास्टरर्स, फीडे मास्टर्स अउ ईलो रेटेड खिलाड़ी मन ह भाग ले रिहिन। देखे जाए त छत्तीसगढ़ म पहिली बार अईसन आयोजन रखे गे रिहिन।
उहें रायपुरे म मुख्यमंत्री ट्राफी इंडिया इंटरनेशनल बैडमिंटन चैलेंज के नाव ले एक ठन अउ टूर्नामेंट आयोजित करे गे रिहिस जेमा देस के संगे संग 12 दूसर देस के 550 ले जादा खिलाड़ी मन जुरयाए रिहिन।
गुजरात म आयोजित 36 वां नेसनल गेम म छत्तीसगढ़ के खिलाड़ी मन ह जबर प्रदर्सन करिन अउ कर 13 मैडल ल अपन नाव करे रिहिन जेमा दू ठन गोल्ड 5 सिल्वर अउ 06 कांस्य मैडल सामिल हे।
