- प्रदेश के विकास अउ जनहित के संकल्प मन ल पूरा करे के मजबूत मंच ए विधानसभा – मुख्यमंत्री विष्णुदेव साय
- छत्तीसगढ़ विधानसभा ह उत्कृष्ट संसदीय परंपरा स्थापित करिस, लोकतांत्रिक मूल्य मन ल करिस मजबूत – विधानसभा अध्यक्ष डॉ. रमन सिंह
- राज्यपाल रमेन डेका ह विधानसभा परिसर म नवा बने प्रेक्षागृह (ऑडिटोरियम) के करिन लोकार्पण
रायपुर, छत्तीसगढ़ विधानसभा ह अपन बने के बाद ले लोकतांत्रिक मूल्य, संसदीय गरिमा अउ अनुशासन के अइसन सुग्घर परंपरा मन ल बढ़ाए हे, जेकर देस भर म तारीफ होथे। ए बड़े खुसी के बात ए कि 1 नवंबर 2025 ल हमर देस के यशस्वी प्रधानमंत्री नरेंद्र मोदी डहर ले नवा विधानसभा भवन के लोकार्पण करे गे राहिस अउ आज ओही परिसर म नवा बने प्रेक्षागृह के लोकार्पण राज्यपाल रमेन डेका के करकमल ले पूरा होइस। एहा विधानसभा के संस्थागत क्षमता अउ लोकतांत्रिक ब्यवस्था ल अउ जादा मजबूत करे कोति एक बड़े उपलब्धि ए। मुख्यमंत्री विष्णुदेव साय ह आज छत्तीसगढ़ विधानसभा के नवा बने प्रेक्षागृह म उत्कृष्टता अलंकरण समारोह ल संवोधित करत ये बात कहिन।
लोकतांत्रिक परंपरा, संसदीय मूल्य अउ उत्कृष्ट जनप्रतिनिधित्व ल सम्मानित करे के मुड़ ले आयोजित ए गरिमा वाले समारोह म राज्यपाल रमेन डेका ह विधानसभा परिसर म नवा बने प्रेक्षागृह के लोकार्पण करिन।
कार्यक्रम के बेरा म उत्कृष्ट संसदीय काम बर बिल्हा विधायक धरमलाल कौशिक अउ अकलतरा विधायक राघवेंद्र कुमार सिंह ल उत्कृष्ट विधायक अलंकरण ले सम्मानित करे गीस। पत्रकारिता म बड़े योगदान बर दैनिक पत्रिका के संबाददाता संतराम साहू ल उत्कृष्ट संसदीय पत्रकार अलंकरण अउ इलेक्ट्रॉनिक मीडिया म उत्कृष्ट रिपोर्टिंग बर आईबीसी-24 के सौरभ सिंह परिहार अउ डॉ. राजेश राज ल उत्कृष्ट इलेक्ट्रॉनिक मीडिया रिपोर्टर अलंकरण दे गीस।
राज्यपाल रमेन डेका ह कहिन कि छत्तीसगढ़ विधानसभा लोकसेवा के ओ केन्द्र ए जहाँ जनसेवक मन संसदीय सदन म लोक कल्याण के पावन बूता (अनुष्ठान) ल पूरा करथें, अउ इही खतीर लोकतंत्र म संसदीय सदन ल मंदिर के दर्जा दे गे हे। ए मंदिर के मान-प्रतिष्ठा ह जम्मो सदस्य मन के आचरण, ब्यवहार अउ बिचार ऊपर निरभर करथे।
ओमन कहिन कि छत्तीसगढ़ विधानसभा के गिनती देस के सब्बो ले बढ़िया विधानसभा मन के उदाहरण के रूप म होथे। ए विधानसभा म पक्ष अउ विपक्ष के बीच म जेकर तालमेल, सामन्जस्य अउ आदर के भाव हे, ओहा पक्का रूप ले सराहनीय अउ सीखे जोग हे।
राज्यपाल डेका ह अपन भासन म जम्मो सम्मानित जनप्रतिनिधि अउ पत्रकार मन ल बधाई अउ सुभकामना देवत कहिन कि लोकतंत्र के ए मंदिर म जनप्रतिनिधि मन के ये संसो (दायित्व) आय कि ओमन जनता कोति उत्तरदायी रहत हुए समरपन भाव ले काम करंय। राज्यपाल डेका ह कहिन कि जम्मो प्रतिनिधि मन मिलके प्रदेश के बिकास बर काम करंय, तभे राज ह आगू बढ़ी। ओमन सयान मनखे मन ले गोठ-बात, सफ़ाई अभियान म भागिदारी अउ समाज के जीबन म सुग्घर बदलाव लाय वाले काम मन ल पहिली प्राथमिकता दे के घलो गोठ कहिन।
मुख्यमंत्री साय ह कहिन कि छत्तीसगढ़ विधानसभा देस के पहिली अउ एकच अइसन विधानसभा ए, जहाँ गर्भगृह म कोनो विधायक के जात च ओमन अपन-अपन (स्वतः) निलंबित हो जाथें। ओमन कहिन कि ए ब्यवस्था ह सिर्फ नियम के पालन नो हे, बल्कि आत्मानुशासन, संसदीय मर्यादा अउ लोकतांत्रिक मूल्य मन कोति समरपन के एक मजबूत उदाहरण ए। अइसन खास संसदीय परंपरा मन ह छत्तीसगढ़ विधानसभा ल देस भर म एक नवा पहिचान देवाय हे।
मुख्यमंत्री साय ह लोकतंत्र म पत्रकारिता के भूमिका ल बतावत कहिन कि पत्रकारिता लोकतंत्र के चौथा खंभा ए अउ पत्रकार मन लोकतांत्रिक ब्यवस्था ल जनता ले जोड़े के बड़े काम करथें। ओमन कहिन कि विधानसभा के कारवाही, जनहित के मुद्दा मन अउ लोकतांत्रिक गोठ-बात ल बिना कोनो भेद-भाव के अउ साच ढंग ले जनता तक पहुँचाए म संसदीय पत्रकार मन के भूमिका अब्बड़ जरूरी हे। ओमन सम्मानित पत्रकार मन ल बधाई देवत कहिन कि ओमन के निस्पक्ष अउ जिम्मेदार पत्रकारिता ह लोकतंत्र ल अउ जादा मजबूत बनाथे।
मुख्यमंत्री साय ह सम्मानित विधायक मन के तारीफ करत कहिन कि धरमलाल कौशिक के सार्वजनिक जीबन अब्बड़ समृद्ध अउ अनुभी हे। ओमन विधानसभा अध्यक्ष जइसन कतको महत्वपूर्ण जिम्मेदारी मन ल बढ़िया ढंग ले निभात हुए संसदीय परंपरा मन ल आगू बढ़ाए हें। ओही कोति राघवेंद्र कुमार सिंह ह पहिली बार विधायक चुने जाय के बाद घलो सदन म तथ्य के संग, सीखत हुए अउ दमदार ढंग ले अपन बात ल रखके एक सुग्घर पहिचान बनाए हें। ओमन कहिन कि दोनों जनप्रतिनिधि मन के सम्मान ह लोकतांत्रिक मूल्य अउ उत्कृष्ट संसदीय आचरण के आदर के प्रतीक ए।
विधानसभा अध्यक्ष डॉ. रमन सिंह ह अपन भासन म कहिन कि नवा विधानसभा भवन के लोकार्पण के बाद आज नवा बने प्रेक्षागृह के लोकार्पण विधानसभा के बिकास के एक अउ बड़े उपलब्धि ए। ओमन कहिन कि छत्तीसगढ़ विधानसभा के छठवीं विधानसभा अपन कारयकाल म उत्कृष्ट संसदीय परंपरा मन के बचाव अउ ओला बढ़ाए बर सगा दिन सुरता करे जाही। ओमन कहिन कि छत्तीसगढ़ विधानसभा के सब्बो ले बड़े गुन (विशेषता) ये हे कि पक्ष अउ विपक्ष ह राजनीतिक मतभेद के बाद घलो प्रदेश के हित के बिषय मन म सुग्घर अउ अरथ वाले चर्चा करथें। इही ह एक स्वस्थ लोकतंत्र के पहिचान ए।
डॉ. रमन सिंह ह कहिन कि उत्कृष्टता अलंकरण ह सिर्फ कोनो एक मनखे के खतीर सम्मान नो हे, बल्कि एहा संसदीय लोकतंत्र के सब्बो ले बढ़िया परंपरा मन ल बढ़ावा दे के माध्यम घलो ए। अइसन सम्मान ह जनप्रतिनिधि, पत्रकार अउ लोकतांत्रिक संस्था मन ल अउ जादा जिम्मेदारी के संग अच्छा काम करे बर उकसाथे (प्रेरित करथे)।
समारोह के सांस्कृतिक कार्यक्रम म देस के नामी भजन गइय्या अनूप जलोटा ह अपन लोकप्रीय भजन मन के सुग्घर प्रस्तुति देके उहाँ बइठे जम्मो मनखे मन ल भक्तिरस म सराबोर कर दिन। ओमन के मधुर अउ भाव ले भरे प्रस्तुति ह जम्मो प्रेक्षागृह ल आध्यात्मिक माहौल म बदल दीस अउ कार्यक्रम ल कभू न भुलवाय जोग बना दीस।
ए कार्यक्रम म उप मुख्यमंत्री अरुण साव, उप मुख्यमंत्री विजय शर्मा, संसदीय कार्य मंत्री केदार कश्यप, नेता प्रतिपक्ष चरणदास महंत, विधायक मन, विधानसभा के सचिव दिनेश शर्मा, बड़े प्रशासनिक अधिकारी, पत्रकार अउ अलग-अलग क्षेत्र के नामी मनखे मन अब्बड़ संख्या म जुड़े राहिन।
