- ‘कार्यपालन अभियंता, जेल अधीक्षक अउ ठेकेदार मन बने तालमेल बनाके बुता ला तेजी ले पूरा करयं’
- गुणवत्ता अउ समय-सीमा के विशेष ध्यान रखे बर कहिन
रायपुर, लोक निर्माण विभाग के सचिव मुकेश कुमार बंसल ह प्रदेश के अलग-अलग जेल मन म बनत बुता मन के प्रगति के समीक्षा करिन। ओमन पीडब्लूडी मुख्यालय ‘निर्माण भवन’ म आज आयोजित बैठक म जिला मन के कार्यपालन अभियंता, जेल अधीक्षक अउ ठेकेदार मन ला बने तालमेल बनाके बुता म तेजी लावत ओमन ला जल्दी पूरा करे के निर्देश दीस। जेल अउ सुधारात्मक सेवा मन के महानिदेशक हिमांशु गुप्ता अउ लोक निर्माण विभाग के प्रमुख अभियंता वी.के. भतपहरी घलो बैठक म शामिल होइन। लोक निर्माण विभाग के अलग-अलग संभाग मन के कार्यपालन अभियंता, ठेकेदार अउ जेल अधीक्षक वीडियो कॉन्फ्रेंस ले बैठक म जुड़िन।
लोक निर्माण विभाग के सचिव ह बैठक म प्रदेश के अलग-अलग जेल मन म बनत बैरक, बाउंड्रीवॉल, शौचालय अउ वॉच टॉवर मन के बुता के समीक्षा करिन। ओमन विभागीय अधिकारी मन के संग-संग सब्बो जेल मन के अधीक्षक मन ले निर्माण बुता मन के रफ्तार अउ गुणवत्ता के जानकारी लीन। ओमन अधिकारी मन ला बुता के जगह (कार्यस्थल) मन के नियमित दौरा करके बुता मन के कड़ाई ले मॉनिटरिंग करे के निर्देश दीस। ओमन ठेकेदार मन ला घलो निर्माण सामान अउ निर्माण के गुणवत्ता सुनिस्चित करत बुता मन म तेजी लाये अउ ओमन ला समय म पूरा करे बर कहिन।
बंसल ह कार्यपालन अभियंता अउ जेल अधीक्षक मन ला सुरक्षा मानक मन के ध्यान रखत जेल परिसर के भीतर निर्माण सामान मन के ढोवाई (परिवहन) के सही व्यवस्था करे के निर्देश दीस। ओमन जेल अधीक्षक मन ला मजदूर (श्रमिक) मन ला रोज बुता बर पूरा समय देवे बर कहिन। जेल अउ सुधारात्मक सेवा मन के महानिदेशक हिमांशु गुप्ता ह बैठक म कहिन कि जेल मन म क्षमता ले जादा कैदी रहत हवयं। नवा बैरक मन के निर्माण अउ अभी के सुविधा मन के विस्तार ले राहत मिलही। ओमन लोक निर्माण विभाग के मैदानी अधिकारी मन, जेल अधीक्षक अउ ठेकेदार मन ला तेज गति ले बुता करके बुता मन ला तय समय म पूरा करे बर कहिन।
ए बुता मन के होईस समीक्षा
लोक निर्माण विभाग के सचिव ह बैठक म रायपुर केन्द्रीय जेल म पार्किंग शेड, पाठशाला शेड, मिले-भेंटे आये परिजन मन बर शेड अउ शौचालय निर्माण बुता मन के समीक्षा करिन। ओमन बिलासपुर के नगोई म 1500 आवास क्षमता के विशेष जेल, जिला जेल धमतरी अउ गरियाबंद म बाउंड्रीवॉल, जिला जेल जांजगीर, रामानुजगंज, सूरजपुर, कांकेर, संजारी-बालोद अउ उप जेल सारंगढ़ म बैरक निर्माण बुता मन के घलो समीक्षा करिन। विभागीय सचिव ह कवर्धा उप जेल म मुख्य भितरी (दीवार) के ऊँचाई बढ़ाये के बुता, केन्द्रीय जेल अंबिकापुर अउ जगदलपुर म कैदी मन बर बैरक अउ शौचालय निर्माण, जिला जेल दंतेवाड़ा म शौचालय निर्माण, जिला जेल सुकमा के मुख्य भितरी मन के चारो कोती कंसर्टीना वायर फेंसिंग अउ वॉच टॉवर निर्माण अउ उप जेल बीजापुर म वॉच टॉवर निर्माण बुता के प्रगति के समीक्षा करके अधिकारी मन ला जरूरी निर्देश दीस।
