रायपुर सेंट्रल जेल म तैयार होवत हे सुवादिस अचार
रायपुर, केंद्रीय जेल रायपुर म महिला बंदी मन के सब्बो डहर ले सुधार अउ समाज के मुख्यधारा म ओमन के सम्मानजनक पुनर्वास बर एक ठन अनूठा पहल के सुरूआत करे गे हे। जेल प्रशासन कोति ले चलाए जात ‘निश्चय’ कार्यक्रम के तहत महिला बंदी मनला आत्मनिर्भर बनाए बर व्यावसायिक प्रशिक्षण दिये जात हे, जेकर ले जेल के भीतर ही ओमन के रोजगार के रद्दा असान हो गे हे।
60 महिला बंदी मनला मिलिस अचार अउ मसाला बनाए के प्रशिक्षण
केन्द्रीय जेल रायपुर म अलग-अलग अपराध के तहत बंद 60 महिला बंदी मनला ‘बेसिक ऑफ पिकल’ (अचार) अउ मसाला निर्माण के व्यावसायिक उत्पादन के खास प्रशिक्षण दिये गे हे। ए प्रशिक्षण के मुख्य उद्देस्य महिला बंदी मनला खुद के व्यावसायिक इकाई (धंधा-पानी) सुरू करे के काबिल बनाना हे।
प्रशिक्षण के बखत ए बंदी मनला खाए-पिए के चीज मनला बनाए, ओकर बढ़िया गुणवत्ता नियंत्रण, साफ-सफाई, पैकेजिंग अउ सुरक्षित रख-रखाव ले जुड़े व्यावहारिक जानकारी दिये गिस। प्रशिक्षण पूरा होए के बाद महिला बंदी मन जेल के महिला प्रकोष्ठ म ही रोज दिन अचार बनाना सुरू कर दे हें।
‘आस्था गृह उद्योग’ के जरीया मिलत हे बजार, आत्मनिर्भर बनत हें बंदी
महिला बंदी मन कोति ले जेल के भीतर पूरा साफ-सफाई के संग आम, नींबू, गाजर अउ लहसुन जइसन अलग-अलग किसम के सुवादिस अउ हाइजीनिक अचार तैयार करे जात हे। ए बढ़िया क्वालिटी के समान मनला बेचे बर सुग्घर ब्यवस्था करे गे हे।
तैयार समान मनला केंद्रीय जेल परिसर म बने ‘आस्था मुंगोडी सेंटर’ (आस्था गृह उद्योग स्टॉल) अउ जेल कैंटीन के माध्यम ले आम लोगन मन बर उपलब्ध कराए जात हे। ए बिक्री ले होवइया कमाई के एक हिस्सा सोझे ए महिला बंदी मन के खाता म जमा करे जात हे, जेकर ले ओमन आर्थिक रूप ले मजबूत अउ आत्मनिर्भर बनत हें।
जेल ह सकारात्मक बदलाव के केंद्र आय- जेल अधीक्षक
ए सराहनीय काम ला लेके केंद्रीय जेल रायपुर के अधीक्षक योगेश सिंह क्षत्री ह कहिन कि:
“जेल ह सिरिफ सजा देहे के जगह नोहे, बल्कि ए ह जिनगी म सकारात्मक बदलाव लाए के घलो एक ठन केंद्र आय। जेल महानिदेशक हिमांशु गुप्ता के मार्गदर्शन म जेल मन म चलाए जात ‘निश्चय’ कार्यक्रम के माध्यम ले महिला बंदी मनला रोजगारपरक हुनर (कौशल) सिखाए जात हे।”
ए हुनर ओमनला आत्मनिर्भर बनाए के संग-संग जेल ले छूटे के बाद समाज म सम्मान के संग जिए अउ अपन रोजी-रोटी कमाए म मददगार साबित होही। जेल प्रशासन ह ए घलो साफ करे हे कि बंदी मन के उज्जर भबिस (उज्ज्वल भविष्य) बर अइसन किसम के प्रशिक्षण कार्यक्रम आगे घलो लगातार चलाए जात रही।
