कलेक्टर ह नदी-नाला पार करके बाइक ले पहूंचिस कोहकापार
अजादी के बाद पहिली घांव गांव म गूंजिस लइका मन के किलकारी, पहिली ही दिन 21 लइका मन के होईस दाखिला
रायपुर, दुर्गम अबूझमाड़ इलाका म बिकास अउ शिक्षा के एक ठन नवा इबारत लिखे गे हे। जिला प्रशासन कोति ले चलाए जात ‘स्कूल केइंता’ (स्कूल चलो) अभियान के तहत नारायणपुर जिला के दूरिहा ग्राम कोहकापार म अजादी के बाद पहिली घांव प्राथमिक शिक्षा के सुरूआत होईस हे। शिक्षा के ए जोत ला जगाए बर जिला के कलेक्टर ह खुद संकर (सँकरे) रद्दा, नदी-नाला, पहाड़ अउ घना जंगल मनला पार करत बाइक ले 100 किलोमीटर दूरिहा ए आखिरी गांव तक पहूंचिस अउ गांव के पहिली प्राथमिक साला के सुरूआत करिस।
परंपरागत मुकुट पिन्हा के होईस नोनिहाल मन के सुवागत
कलेक्टर ह गांव के घोटूल म चलेइया ए नवा कक्षा के फीता काटिस अउ खुद लइका मन के क्लास लेके ओमनला पढ़ाइस। साला के पहिली ही दिन गांव के 21 लइका मन के नामांकन (11 नोनी अउ 10 बाबू) होईस। कलेक्टर ह सब्बो लइका मनला परंपरागत रूप ले मुकुट पिन्हा के सुवागत करिस अउ ओमनला स्कूल बैग अउ पढ़इया किताब बांटिस। लइका मन के हौसला बढ़ावत ओमन ह कहिन कि शिक्षा ही बढ़िया भबिस अउ सब्बो डहर ले बिकास के सबले मजबूत माध्यम आय। लइका मन रोज दिन स्कूल आंय अउ मन लगा के अपन सपना मनला पूरा करंय।
घर-घर सरवे ले मिलिन 2,000 ले जादा लइका
कलेक्टर ह बताइस कि ‘स्कूल केइंता’ अभियान के माध्यम ले अबूझमाड़ के ओ लइका मनला खोजे जात हे, जेमन या तो कभू स्कूल नई गे हें या फेर बीच म ही पढ़ई ला छोड़ दे रहिन। घर-घर करे गे शैक्षणिक सरवे के बढ़िया परिणाम आघू आए हे। अब तक जिला के 2,000 ले जादा लइका मनला अलग-अलग सरकारी स्कूल अउ छात्रावास मन म दाखिला कराए जा चुके हे। कोहकापार म स्कूल खुलना ए अभियान के एक ठन ऐतिहासिक सफलता (उपलब्धि) आय।
‘माड़ संबाद’ म सुनिन गांव वाले मन के समसया
स्कूल के सुरूआत के बाद कलेक्टर ह गांव वाले मन के संग “माड़ संबाद” करिस। ओमन गांव म रासन, सुवासथ (स्वास्थ्य), आंगनबाड़ी अउ पोसन स्तर के समीक्षा करिस। ग्राम पंचायत के सरपंट मनु ध्रुव ह बताइस कि 25 परवार अउ करीब 128 के आबादी वाले ए गांव म नल-जल योजना, बिजली अउ मोबाइल टावर जइसन बुनियादी सुबिधा मन के कड़ा जरूरत हे। कलेक्टर ह ओही जगा म मौजूद अधिकारी मनला ए समसया मन के तुरंते निपटारा करे के निरदेस (निर्देश) दीस।
जनकल्याणकारी योजना मन ले जुड़े के अपील
कलेक्टर ह गांव वाले मनला रासन कार्ड, आयुष्मान कार्ड जइसन जरूरी कागज (दस्तावेज) बनवाए बर प्रेरित करिस, ताकि सरकार के योजना मन के पूरा-पूरा लाभ आखिरी मानुस तक पहूंच सके। ओमन दूरिहा इलाका म जाके सरवे करइया स्कूल समन्वयक खेमा अंगारे के मिहनत के घलो खास बड़ाई (सराहना) करिस।
