सपना के उड़ान अउ जादुई दुनिया के रहस्य: डॉ. नेहा शुक्ला के नवा हिंदी वेब सीरीज ‘आभूषण’

लेखनी: चम्पेश्वर गोस्वामी 

कला अउ सिनेमा के दुनिया मं जब कोनो कलाकार अपन सपना ला सच करे बर उतरथे, त ओकर लगन अउ मेहनत पर्दा मं साफ झलकथे। छालीवुड (छत्तीसगढ़ी फिल्म इंडस्ट्री) के कतकोन सुपरहिट एलबम अउ फिलीम मन मं बतौर अभिनेत्री अपन बेहतरीन अभिनय के लोहा मनवइया, अउ मुंबई के चकाचौंध भरे टीवी सिरियल मन मं घलो अपन जलवा बिखेरइया डॉ. नेहा शुक्ला अब एक नवा अउ दमदार अवतार मं हमर आगू आवत हें।

पेशा ले डेंटिस्ट (दांत के डॉक्टर) फेर मन ले पूरा तरह से एक जुनूनी कलाकार, डॉ. नेहा के बड़ दिन के सपना रिहीस कि वो हा हिंदी मं एक शानदार वेब सीरीज बनावय। अब उंकर ये सुग्घर सपना ‘आभूषण’ के रूप मं साकार होवत हे।

जी.एस. प्रोडक्शन के बैनर तले ‘आभूषण’ के आगाज़

डॉ. नेहा शुक्ला लिखित, निर्देशित अउ अभिनित ये नवा बहुप्रतीक्षित हिंदी वेब सीरीज बहुत जल्द ‘जी.एस. प्रोडक्शन’ के ऑफिशियल यूट्यूब चैनल मं धमाका करे बर तइयार हे। ये बड़े प्रोजेक्ट के निर्माता गजेंद्र श्रीवास्तव हें, जेन हा ये वेब सीरीज ला भव्य रूप देहे मं कोनो कसर नइ छोड़े हें। अपन ये ड्रीम प्रोजेक्ट ला लेके डॉ. नेहा शुक्ला के उत्साह अउ ऊर्जा देखते बनत हे।

रहस्य, रोमांच अउ हास्य के सुग्घर संगम

आखिर का खासियत हे ये वेब सीरीज मं? ‘आभूषण’, जइसन कि नाम ले ही झलकथे, ये पूरा कहानी एक जादुई गहना के इर्द-गिर्द घूमथे। ये एक अइसन रहस्य ले भरे जादुई दुनिया के सैर आय, जेन हा दर्शक मन ला एक अलग ही लोक मं ले जाही। फिलीम मं जतका रहस्य हे, ओतकेच कॉमेडी (हास्य) घलो पिरोय गे हे। संगे-संग सस्पेंस अउ डर के अइसन गजब तड़का लगाय गे हे कि लईका ले लेके सियान तक, सबो झन के मन गदगदा जाही। कुल मिला के कहन त ‘आभूषण’ एक पूरा “पैसा वसूल” मनोरंजन आय, जेन हर वर्ग के दर्शक ला पसंद आही।

नजर नइ हटय: 20 एपिसोड के जादुई सफर

आजकल के दर्शक मन ला बांध के रखना बड़े चुनौती आय, फेर ‘आभूषण’ के टीम हा ये बात के पूरा धियान राखे हे कि दर्शक एको सेकण्ड बर उबय झन। लगभग 20 भाग (एपिसोड) मं रिलीज होवइया ये सीरीज के हर एपिसोड 20 ले 25 मिनट के हे। कहानी के कसावट अइसन हे कि डॉ. नेहा खुदे बताथें- “जेन दर्शक हा एक बार ये वेब सीरीज ला देखे बर बइठगे, वो हा बीसों एपिसोड ला एक सांस मं देख के ही उठही।” माने सस्पेंस अउ रोमांच हर कड़ी मं बढ़त जाही।

VFX के कमाल अउ मनमोहक लोकेशन

तकनीक के मामला मं घलो ये सीरीज कोनो ले कम नइ हे। दर्शक मन ला ये वेब सीरीज मं बेहतरीन VFX के काम देखे बर मिलही, जेन हा जादुई दुनिया ला एकदम जीवंत कर देथे। सीरीज के शूटिंग कई ठन सुंदर अउ मनमोहक लोकेशन मं करे गे हे। शानदार रिजॉर्ट, बर्फ ले ढंके आइस पार्क, अउ वाटर किंगडम जइसन भव्य जगह ये सीरीज के प्रमुख आकर्षण आय, जेन हा पर्दा ला अउ जादा सुग्घर बना देथे।

सुरीला गीत अउ उम्मीद के नवा अंजोर

कोनो भी सीरीज के जान ओखर संगीत होथे। ‘आभूषण’ म तीन ठन कर्णप्रिय हिंदी गीत राखे गे हे, जेन हा अभी ले यूट्यूब म काफी धूम मचावत हे अउ लोगन मन ला बड़ पसंद आवत हे। ये गीत मन ला छत्तीसगढ़ अउ मुंबई के सुरीला सिंगर मन हा अपन बेहतरीन अवाज ले सजाये हें।

लेखन, निर्देशन अउ अभिनय- तीनों मोर्चा मं अपन हुनर दिखाए के बाद, डॉ. नेहा शुक्ला ला पूरा भरोसा हे कि दर्शक मन उंकर ये नवा अउ साहसिक प्रयास ला भरपूर मया-दुलार दिहीं।

अंत मं, ‘आभूषण’ के रहस्य अउ रोमांच ला समेटत ये सुग्घर पंक्ति:

आभूषण म रहस्य हे, कला अभिनय गीत हे। 

देखहू ये फिलीम में, बड़ सुग्घर संगीत हे॥