- ब्रेहबेड़ा के नन्ही लइका के सफल हार्ट सर्जरी, अबूझमाड़ ले रायपुर तक पहुँचे उमिद के धड़कन
रायपुर. मुख्यमंत्री विष्णुदेव साय के अगुवई मा चलत ‘प्रोजेक्ट धड़कन’ ह नारायणपुर के दुरिहा गाँव ब्रेहबेड़ा के 2 साल के नन्ही पारूल दुग्गा ला नवा जिनगी देहे । जनम ले ही हिरदे के बीमारी ले जूझत पारूल के रायपुर के श्री सत्य साईं संजीवनी अस्पताल मा सफल सर्जरी होइस, जेखर बाद ओ ह बने होके अपन घर लहुट चुके हे। ‘प्रोजेक्ट धड़कन’ अब नारायणपुर जिला मा सिरिफ़ एक ठन योजना भर नोहे, बल्कि ओ परिवार बर उमिद के नवा नाम बन चुके हे जेखर बर हर एक नन्ही धड़कन सबले कीमती हे।
थकान ले जूझत रहिस नन्ही पारूल:
अबूझमाड़ इलाका के ब्रेहबेड़ा गाँव के पारूल ह कुछ समय पहिली तक अड़बड़ जल्दी थक जावत रहिस अउ आन लइका मन सहीं खेल-कूद नइ पावत रहिस। घर के कम साधन अउ गरीबी के सेती ओखर दाई-दादा ला ओखर ए गंभीर बीमारी के बारे मा पता ही नइ रहिस।
फरवरी 2026 मा सुरु होइस ‘प्रोजेक्ट धड़कन’:
नारायणपुर जिला मा लइका मन के स्वास्थ्य के जतन बर फरवरी 2026 मा ‘प्रोजेक्ट धड़कन’ के सुरुवात करे गीस। एखर उदेश्य आंगनबाड़ी केंद्र अउ स्कूल मा लइका मन के हिरदे के जाँच करके गंभीर मामला के सुरु मा ही पहिचान करना हे। ए पहल ह ओ दुरिहा-डेहरी इलाका तक पहुँचे हे जिहा बड़े डॉक्टर अउ स्वास्थ्य सेवा के भारी कमी रहिस।
3000 लइका मन के जाँच, तीन झिन मा मिलिस बीमारी
अभियान के पहिली चरन मा स्वास्थ्य विभाग के टीम ह गाँव-गाँव जाके 3000 ले जादा लइका मन के जाँच (स्क्रीनिंग) करिन। तीन झिन लइका मन मा हिरदे रोग के लच्छन मिलिस, जेमा पारूल घलो सामिल रहिस। जानकारी मिलत ही प्रसासन ह तुरंते इलाज के बेवस्था करिस। वन अउ जलवायु परिबरतन मंत्री केदार कश्यप ह ए लइका मन ला रायपुर मा बने श्री सत्य साईं संजीवनी अस्पताल बर रवाना करिन।
10 अप्रैल के होइस सफल सर्जरी
रायपुर मा बड़े डॉक्टर मन ह जाँच के बाद पारूल के हिरदे मा गंभीर समस्या के पुसटी (पुष्टि) करिन। 10 अप्रैल 2026 के ओखर सफल हार्ट सर्जरी करे गीस। आपरेशन के बाद डॉक्टर के देख-रेख मा ओखर सेवा-जतन होइस। आज पारूल ह बने हे, खेलत-कूदत हे अउ अपन परिवार के कोरा मा नवा उमंग के संग पलत हे।
मील के पत्थर साबित होवत हे पहल ‘प्रोजेक्ट धड़कन’
कलेक्टर नारायणपुर ह कहिन कि ‘प्रोजेक्ट धड़कन’ के उदेश्य सिरिफ बीमारी के पहिचान करना नोहे, बल्कि जरूरतमंद लइका मन ला बखत मा जिनगी बचाए वाला इलाज देवाए के हे। ओमन कहिन कि दुरिहा इलाका के कोनो भी लइका ला स्वास्थ्य सुविधा के कमी के सेती दुख झन होवय, एखर बर प्रसासन ह लगातार कोसिस करत हे। ओमन स्वास्थ्य विभाग, डॉक्टर अउ मैदानी करमचारी मन के बड़ाई करत कहिन कि ए पहल ह लइका मन के स्वास्थ्य सुरच्छा के दिसा मा मील के पत्थर साबित होवत हे। आऊइया बखत मा अउ जादा लइका मन के जाँच करे जाही।
बदलाव के कहानी
पारूल के कहानी ह सिरिफ एक ठन सफल आपरेशन नोहे आय। एहा ओ बदलाव के कहानी आय जहाँ जंगल-पहाड़ के बीच बसे गाँव मन तक संवेदनसील सासन पहुँचत हे। एहा ओ भरोसा के कहानी आय जेमा दुरिहा रहइया परिवार ला घलो बिसवास हे कि ओखर लइका मन के भविष ह सुरच्छित हाथ मा हे।
