वन्य जीव संरक्षण बर राज्य सरकार हे संकल्पित: मंत्री लक्ष्मी राजवाड़े
रायपुर. महिला एवं बाल विकास मंत्री लक्ष्मी राजवाड़े ह आज गरियाबंद जिला के छुरा नगर मा प्रधानमंत्री नरेंद्र मोदी के लोकप्रिय रेडियो कार्यक्रम ‘मन की बात’ के 133वां कड़ी ला सुनिन। उमन कहिन कि प्रधानमंत्री नरेंद्र मोदी ह छत्तीसगढ़ मा करिया हिरन (काले हिरण) ला बचाए अउ ओकर संख्या बढ़ाए के कोसिस के जो तारीफ करीन, ओहा पूरा प्रदेश बर गरब अउ सीख के बात आय।
मंत्री श्रीमती राजवाड़े ह कहिन कि मुख्यमंत्री विष्णु देव साय के अगुवाई मा राज मा वन्यजीव मन ला बचाए के काम मा नवा तेजी आ हे, जेकर बढ़िया नतीजा अब साफ दिखत हे। एक बखत खतम होय के कगार मा पहुच चुके करिया हिरन के प्रजाति के फेर ले दिखना, राज्य सरकार के दमदार कोसिस के सबूत आय। उमन बताइन कि सरकार ह जंगल ला बचाए, जीव-जंतु मन के प्राकृतिक घर ला सुधारे अउ जैव विविधता ला सुरक्षित रखे बर कई ठन योजना ला बढ़िया ढंग ले चलावत हे। मुख्यमंत्री श्री साय के नेतृत्व मा पर्यावरण ला बचाए के काम मा मनखे मन ला घलो जोड़े जात हे।
मंत्री श्रीमती राजवाड़े ह अपन भासन मा कहिन कि ‘मन की बात’ कार्यक्रम समाज मा जागरूकता अउ बढ़िया सोच ला बढ़ावा दे के एक मजबूत माध्यम आय। ये कार्यक्रम ह देस भर के मनखे मन ला सामाजिक, पर्यावरणीय अउ देस के हित के विषय मा प्रेरित करथे अउ सबो ला मिल-जुल के काम करे बर जोस भरथे।
ये मऊका मा सांसद रूपकुमारी चौधरी, विधायक रोहित साहू, जिला पंचायत अध्यक्ष गौरीशंकर कश्यप के साथे-साथ कई झन जनप्रतिनिधि अउ भारी संख्या मा आम जनता उपस्थित राहिन