राजस्व अउ वन विभाग के संजुक्त कार्रवाई
बिना अनुमति चलत रहिस ईंटा बनाय के काम
रायपुर. राजनांदगांव जिला मा राजस्व अउ वन विभाग के संजुक्त टीम ह ग्राम माहुलझोपड़ी मा चलत एक ठन अवैध ईंटा भट्ठा ऊपर बड़े कार्रवाई करत लाखन के संख्या मा ईंटा, लकड़ी अउ दूसर सामान जब्त करिस हे। बिना कोनो सही अनुमति अउ कागज-दस्तावेज के चलत ए भट्ठा ले लगभग 3 लाख 20 हजार पक्की ईंटा, 1 लाख 60 हजार कच्ची ईंटा, 70 ट्रॉली माटी अउ 6 ट्रॉली लकड़ी जब्त करे गिस।
मिले जानकारी के मुताबिक डोंगरगांव विकासखण्ड के ग्राम माहुलझोपड़ी मा दुर्गा बाई के जमीन ऊपर दाऊ लाल कोति ले अवैध रूप ले ईंटा बनाय के काम करे जात रहिस। मामला के जानकारी मिले मा कलेक्टर के निर्देश मा संजुक्त टीम ह मउका मा पहुँच के कार्रवाई करिस अउ जम्मो काम ला तुरंते बंद करवा दीस।
कार्रवाई के बखत जब्त करे गे लकड़ी ला सुरक्षा बर वन विभाग ला सउँप दिए गे हे, उहें बाकी सामान ला आगू के कार्रवाई तक ग्राम पंचायत गिरगांव के सुपुर्द कर दिए गे हे। ए कार्रवाई मा नायब तहसीलदार चिराग रामटेके, रेंज ऑफिसर आकाश ठाकुर सहित राजस्व अउ वन विभाग के अधिकारी-कर्मचारी मन मौजूद रहिन। प्रशासन ह साफ कह दीस हे कि अवैध काम के खिलाफ अइसने कड़ा कार्रवाई आगू घलो जारी रही।