अशोक पटेल "आशु", तुस्मा (शिवरीनारायण)
तोर से दाई मोर पूछ-पुछारी हे।
अशोक पटेल “आशु”, तुस्मा (शिवरीनारायण)
तोर से ही दाई मोर चिन्हारी हे।
तोर से ही मोर संगी-संगवारी हे।
तोर से ही मोर गाँ-घर-दुवारी हे।
इही म बसे हावे छत्तीसगढ़ महतारी हे।
बागे-बगईचा-फूल- फुलवारी हे।
खेत-खार रुनझुन हरियर- बारी हे।
कन्हार-माटी- बरनहा-कछारी हे।
गेरू-लाली अउ छुही-उजियारी हे।
इही म बसे हावे छत्तीसगढ़ महतारी हे।
पान-पतई-आउ खदर के छानी हे।
परसा-झिपारी अउ राहेर-काड़ी हे।
उघरा मोहाटी पुटरूस के दुवारी हे।
छीन-भिरहा के रुधना अउ बारी हे।
इही म बसे हावे छत्तीसगढ़ महतारी हे।
गांव म गउठान अउ खेत-खारी हे।
बर-पीपर के रुखुवा म सिंगारी हे।
नान्हे-नान्हे लईका के किलकारी हे।
माटी के बईला म करय सवारी हे।
इही म बसे हावे छत्तीसगढ़ महतारी हे।
इही म सियनहा के आंट-दुवारी हे।
गां म बने मुखिया के पूछ-पुछारी हे।
ठलहा पटवा आंटय ढेरा-भवांरी हे।
जेखर बनावे सिका गेरवा-जोतारी हे।
इही म बसे हावे छत्तीसगढ़ महतारी हे।