रायपुर, छत्तीसगढ़ के राजधानी रायपुर के पुलिस परेड ग्राउंड मां आयोजित स्वतंत्रता दिवस समारोह के मुख्य कार्यक्रम मां घोड़सवार दल मन अपन अदम्य साहस अउ ऊर्जा के जीवंत प्रदर्शन करिन। कार्यक्रम मां महिला बैग पाईपर बैंड के लयबद्ध प्रस्तुति ला उपस्थित लोगन मन ह खूब सराहिन। एखर संगी आज के कार्यक्रम मां छत्तीसगढ़ पुलिस के डॉग स्क्वाड के रोमांचक प्रदर्शन मां दर्शक मन ला बेहद उपयोगी जानकारी घलो मिलीस।
घोड़सवार दल के हॉर्स शो आकर्षण के केंद्र
स्वतंत्रता दिवस समारोह मां घोड़सवार दल के हॉर्स शो घलो आकर्षण के केंद्र रिहिस। तीसरी वाहिनी अमलेश्वर के घोड़सवार दल ह फ्लैग मार्च, टेंट पैगिंग, नेज़ाबंदी शो, जंपिंग अउ गैलप राउंड जइसे रोमांचक प्रस्तुति दिन। आरक्षक धनेश्वर कंवर ह घोड़ा आदित्री ऊपर फ्लैग मार्च करिन। अजय कुमार यादव ह घोड़ा आभा ऊपर स्टैंडिंग सैल्यूट करिन। टेंट पैंगिंग मां घोड़ा रूद्र, अश्वत्थामा, प्रिंसेस सारा अउ शक्ति ह उत्कृष्ट प्रदर्शन करिन। घोड़ा युवराज, अवनि, कावेरी, जूही अउ ओजस ह शो जंपिंग मां अपन जलवा देखाइन। उपस्थित जनसमुदाय ह घोड़सवार दल के ताली बजा के स्वागत अभिनंदन करिन।
महिला बैगपाइपर बैंड ह दीस आकर्षक प्रस्तुति
आरक्षक सोनबती ठाकुर के अगुवाई मां प्रदेश के पहिल महिला बैगपाइपर बैंड ह स्वतंत्रता दिवस समारोह मां आकर्षक प्रस्तुति दीस। 20वीं भारत रक्षित वाहिनी छत्तीसगढ़ सशस्त्र बल के 35 सदस्य मन के ए बैगपाइपर बैंड द्वारा क्विक मार्च मां इंडिया गेट, केसरिया बाना, हार्श मेन, शांति सेना अउ पुलकित हिमालय जइसे धुन बजाइगिस। बैंड ह स्लो मार्च मां नवरंगी अउ तर्शपे रील, ड्रम कॉल घलो सुनाइन। बैंड के सदस्य मन अपन हाथ मां सेरेमोनियम मेस बैंड, बेस, टेनर, साइड ड्रम अउ बैगपाइपर जइसे बाजा मन मां मनमोहक धुन बजाके उपस्थित लोगन मन के मन ला मोह लीन।
ए बैगपाइपर महिला बैंड ह 2022 मां हरियाणा के पंचकुला मां आईटीबीपी के बीटीसी भानु मां 6 महीना तक कड़ा प्रशिक्षण पाए रिहिस। ए बैगपाइपर बैंड ह 25वीं अखिल भारतीय पुलिस बैंड प्रतियोगिता दीमापुर नागालैंड मां 2024 मां तीसर ठांव हासिल करे रिहिस। ए प्रतियोगिता असम राइफल्स के दीमापुर प्रशिक्षण केंद्र मां आयोजित होए रिहिस। 26वीं अखिल भारतीय पुलिस पाइप बैंड हैदराबाद मां आयोजित प्रतियोगिता मां उत्कृष्ट प्रदर्शन बर दल ला गोल्ड मेडल घलो मिले रिहिस। ए प्रतियोगिता मां सोनबती ठाकुर ह बेस्ट कंडक्टर अउ पूरा प्लाटून मां ऑल राउंडर द बेस्ट के खिताब घलो जीते रिहिस।
डॉग स्क्वाड द्वारा रोमांचक अउ उपयोगी प्रदर्शन
स्वतंत्रता दिवस समारोह के मुख्य कार्यक्रम मां मुख्यमंत्री विष्णु देव साय के उपस्थिति मां छत्तीसगढ़ पुलिस के डॉग स्क्वाड ह घलो अपन दक्षता, अनुशासन अउ सूंघे के शक्ति के रोमांचक प्रदर्शन करिस। स्क्वाड प्रभारी राज कपूर के अगुवाई मां 7 विधा मां डॉग स्क्वाड के श्वान मन द्वारा अपन हैंडलर मन के निर्देश ला मानत प्रदर्शन करे मां उपस्थित लोगन मन घलो रोमांच ले भर गीन। पुलिस डॉग मैक्स ह सबो अतिथि मन ला फूल के गुच्छा भेंट करके ओमन के स्वागत करिस। प्रशिक्षित श्वान मन ह कमल फूल के आकृति मां अपन आप ला सजाके खूब ताली बटोरीन। श्वान मन द्वारा गोल रिंग मां सिट, डाउन, रेस्ट, स्लीप, रोल अउ अप जइसे निर्देश ला पूरी दक्षता ले पूरा करिन। उहें गोल रिंग मां जलत आगी के बीच ले श्वान दुलार, मेरी अउ शिवा ह छलांग लगाके लोगन ला रोमांचित कर दिन। पुलिस परेड ग्राउंड मां ए प्रशिक्षित श्वान मन ह भुंइया मां दबे विस्फोटक चीज मन अउ नशीला सामान मन ला घलो बड़ तेजी ले खोज निकालिन। श्वान मन ह कतोक गंध मन के मिलावट ले एक तय गंध के पहचान करे बर रूमाल सूंघ के संबंधित आदमी ला पहचाने के घलो प्रदर्शन करिन।
