रायपुर, विद्यार्थी मन ल शैक्षणिक कागजात बर बार-बार सरकारी दफ्तर के चक्कर लगाए ले अब राहत मिलही। स्कूल शिक्षा मंत्री गजेन्द्र यादव के पहल ले छत्तीसगढ़ माध्यमिक शिक्षा मंडल के कईेक महत्वपूर्ण सेवा मन ल लोक सेवा गारंटी अधिनियम के दायरा म लाए गे हवय। नवा व्यवस्था के तहत विद्यार्थी मन ल जरूरी कागजात तय प्रक्रिया अऊ तय समय-सीमा म उपलब्ध कराये जाही।
लोक सेवा गारंटी के तहत डुप्लीकेट माइग्रेशन सर्टिफिकेट (प्रमाण-पत्र), डुप्लीकेट मार्कशीट (अंकसूची), उत्तरपुस्तिका के पुनर्गणना, पुनर्मूल्यांकन अऊ उत्तरपुस्तिका के फोटोकॉपी कस सेवा मन ल साममिल करे गे हवय। डुप्लीकेट अंकसूची अऊ डुप्लीकेट माइग्रेशन प्रमाण-पत्र बर 60 दिन के समय-सीमा तय करे गे हवय। एही तरह उत्तरपुस्तिका से जुड़े पुनर्गणना, पुनर्मूल्यांकन अऊ फोटोकॉपी के सेवा मन घलो तय प्रक्रिया पूरा होए के बाद 60 दिन के भीतर उपलब्ध कराए जाही।
स्कूल शिक्षा मंत्री गजेन्द्र यादव ह कहिन कि विद्यार्थी मन ल अपन शैक्षणिक कागजात हासिल करे बर बेवजह परेशान होना मंजूर नइ हवय। परीक्षा रिजल्ट के बाद विद्यार्थी मन बर हर एक दिन महत्वपूर्ण होथे। हायर एजुकेशन (उच्च शिक्षा) म एडमिशन, छात्रवृत्ति अऊ कॉम्पिटिटिव एग्जाम (प्रतियोगी परीक्षा) सहित कईेक काम बर समय म कागजात उपलब्ध होना जरूरी हवय। एही बात ल ध्यान म रखत व्यवस्था ल सरल, पारदर्शी अऊ समयबद्ध बनाए जावत हवय।
उमन कहिन कि मुख्यमंत्री विष्णु देव साय के नेतृत्व म राज्य सरकार शिक्षा व्यवस्था ल जादा विद्यार्थी-केंद्रित अऊ सुविधाजनक बनाए के डहर म काम करत हवय। विद्यार्थी मन ल जरूरी कागजात बर दफ्तर मन के चक्कर लगाए के बजाय अपन समय पढ़ाई अऊ भविष्य निर्माण म लगाए के मौका मिलना चाही। सेवा मन ल लोक सेवा गारंटी के दायरा म लाये ले अधिकारी मन के जवाबदेही बढ़ही अऊ प्रक्रिया म पारदर्शिता घलो आहि।
शिक्षा मंत्री ह अधिकारी मन ल विद्यार्थी मन से जुड़े मामला म संवेदनशीलता के साथ काम करे अऊ तय समय-सीमा के कड़ाई से पालन पक्का करे के निर्देश दिन। उमन कहिन कि कागजात पावे या परीक्षा संबंधी कोनो प्रक्रिया बर विद्यार्थी मन ल बेवजह परेशानी न होवय। तय समय-सीमा के कारन अब विद्यार्थी अऊ पालक मन ल अपन आवेदन के निराकरण ल लेके साफ-साफ जानकारी मिल सकही।
नवा व्यवस्था के फायदा खासकर ओ विद्यार्थी मन ल मिलही, जेन मन ल उच्च शिक्षा म प्रवेश, छात्रवृत्ति, प्रतियोगी परीक्षा या दूसर शैक्षणिक जरूरत बर डुप्लीकेट अंकसूची, माइग्रेशन प्रमाण-पत्र अउ उत्तरपुस्तिका से जुड़े सेवा के जरूरत थोरै। सेवा मन बर समय-सीमा तय होए ले बेवजह के देरी म रोक लगही अऊ विद्यार्थी मन ल कागजात पावे के प्रक्रिया अउउरो सुगम अऊ भरोसेमंद तरीका से पूरा हो सकही।
